Leson 10

Bann Keksoz ki Bondye i deteste

Konman ou devret santi anver bann keksoz ki Bondye i konsider move? (1)

Ki bann kalite kondwit seksyel ki pa akseptab? (2)

Konman en Kretyen i devret konsider mansonz? (3) zwe larzan? (3) vole? (3) vyolans? (4) grigri? (5) soular? (6)

Konman en dimoun i kapab debaras li avek sa bann move keksoz? (7)

1. Bann serviter Bondye i kontan sa ki byen. Me zot bezwen osi aprann deteste sa ki mal. (Psonm 97:10) Savedir rezet bann keksoz ki Bondye i deteste. Lekel serten sa bann keksoz?

2. Kondwit seksyel ki pa akseptab: Relasyon seksyel avan maryaz, adilter, relasyon seksyel avek zannimo, relasyon seksyel avek manm prop fanmiy, omoseksyalite, tou sa i bann pese grav kont Bondye. (Levitik 18:6; Romen 1:26, 27; 1 Korentyen 6:9, 10) Si de dimoun pe viv ansanm san ki zot in marye, swa zot separe, swa zot marye biro.—Ebre 13:4.

3. Mansonz, Zwe Larzan, Vole: Zeova pa kapab koz manti. (Tit 1:2) Pour li aksepte nou, fodre ki nou rezet mansonz. (Proverb 6:16-19; Kolosyen 3:9, 10) Tou bann zwe larzan i ankouraz vorasite. Akoz sa, bann Kretyen pa partisip dan okenn zwe larzan, konman lotri, bingo oubyen genmbling. (Efezyen 5:3-5) Bann Kretyen pa vol keksoz lezot dimoun. Zot pa aste bann keksoz vole, e zot pa pran bann keksoz san ki zot ganny permisyon.—Egzod 20:15; Efezyen 4:28.

4. Lakoler, Vyolans: Lakoler ki pa ganny kontrole i kapab anmenn vyolans. (Zenez 4:5-8) En dimoun ki vyolan pa kapab vin zanmi Bondye. (Psonm 11:5; Proverb 22:24, 25) I mal pour en dimoun revanze oubyen rann mal pour mal.—Proverb 24:29; Romen 12:17-21.

5. Bonnonm dibwa ek grigri: I annan dimoun ki envok bann move lespri pour zot geri bann maladi. Lezot i zet en sor lo zot lennmi pour fer zot malad e menm pour touy zot. Lafors ki deryer tou sa bann keksoz i Satan. Bann Kretyen pa devret pran par dan okenn sa bann keksoz. (Deterononm 18:9-13) Si en dimoun i zet en sor lo ou, meyer proteksyon se reste pros avek Zeova.—Proverb 18:10.

6. Soular: I pa mal pour bwar en pe diven, labyer oubyen lezot labwason alkolik. (Psonm 104:15; 1 Timote 5:23) Me abiz lo lalkol e vin en soular i mal dan lizye Bondye. (1 Korentyen 5:11-13; 1 Timote 3:8) Bwar tro bokou i kapab afekte ou lasante e kas ou fanmiy. I kapab osi fer ou tonm fasilman dan lezot tantasyon.—Proverb 23:20, 21, 29-35.

7. Bann dimoun ki pratik bann keksoz ki mal dan lizye Bondye “pa pou erit Rwayonm Bondye.” (Galat 5:19-21) Si ou vreman kontan Bondye e ou oule fer li plezir, ou kapab aret fer sa bann keksoz. (1 Zan 5:3) Aprann deteste sa ki Bondye i dir i mal. (Romen 12:9) Frekant bann dimoun ki annan en bon labitid Kretyen. (Proverb 13:20) Bann konpanyon Kretyen ki annan leksperyans i kapab ed ou. (Zak 5:14) Anplis ki sa, rod led Bondye dan lapriyer.—Filipyen 4:6, 7, 13.

[Portre lo paz 20, 21]

Bondye i deteste lavi bwar, vole, zwe larzan ek vyolans