Rezet fo relizyon!

Satan ek son bann demon pa oule ou servi Bondye. Zot anvi detourn tou dimoun kont Bondye si zot kapab. Ki mannyer zot esey fer sa? En fason se atraver fo relizyon. (2 Korentyen 11:13-15) En larelizyon i fo si i pa ansenny laverite ki dan Labib. Fo relizyon i parey fo biye—i kapab annan menm laparans avek sa ki vre, me i napa valer. I kapab koz ou bokou problenm.

Mansonz relizye pa zanmen kapab fer plezir Zeova, Bondye laverite. Ler Zezi ti lo later, ti annan en group relizye ki ti anvi touy li. Zot ti panse ki zot fason adore i sa fason ki korek. Zot ti dir: “Nou annan en sel Papa, Bondye.” Eski Zezi ti dakor avek zot? Non! I ti dir zot: “Zot, zot papa dyab.” (Zan 8:41, 44) Ozordi bokou dimoun i panse ki zot pe ador Bondye, me zot pe vreman servi Satan ek son bann demon!—1 Korentyen 10:20.

Zis parey en pye dibwa pouri i prodwi move fri, fo relizyon i prodwi dimoun ki fer bann move keksoz. Lemonn i ranpli avek problenm akoz bann move keksoz ki dimoun i fer. I annan limoralite, lager, vol, lopresyon, mert, ek vyol. Bokou bann ki fer sa bann keksoz mal, i annan en relizyon me zot relizyon pa ensit zot pour pratik sa ki byen. Zot pa kapab vin bann zanmi Bondye amwen ki zot arete fer sa bann move keksoz.—Matye 7:17, 18.

Fo relizyon i ansenny zot dimoun pour priy avek bann zidol. Bondye i dir pa priy avek bann zidol. Sa i rezonnab. Eski ou ti a kontan si en dimoun pa zanmen koz avek ou me i koz selman avek ou portre? Eski sa dimoun ti a kapab vin ou vre zanmi? Non, i pa ti pou kapab. Zeova i anvi dimoun koz avek li, pa avek en stati oubyen en zimaz, ki napa lavi dan zot.—Egzod 20:4, 5.

Fo relizyon i ansennyen ki i byen pour touy lezot dan letan lager. Zezi ti dir ki bann zanmi Bondye ti pou annan lanmour antre zot. Nou pa touy dimoun ki nou kontan. (Zan 13:35) I menm mal pour touy bann move dimoun. Kan bann lennmi Zezi ti vin aret li, i pa ti les son bann disip lager pour protez li.—Matye 26:51, 52.

Fo relizyon i ansennyen ki bann dimoun mesan pou soufer dan lanfer dife. Pourtan, Labib i ansennyen ki pese i anmenn ver lanmor. (Romen 6:23) Zeova i en Bondye lanmour. Eski en Bondye lanmour ti a tourmant dimoun pour touzour? Byensir non! Dan Paradi, pou annan zis en relizyon, sa enn ki Zeova i aprouve. (Revelasyon 15:4) Tou relizyon ki baze lo bann mansonz Satan, pou’n disparet.