Nouvel Rwayonm No. 37

EN MESAZ POUR LEMONN ANTYE

Lafen Fo Larelizyon I Pros!

▪ Kisisa fo larelizyon?

▪ Konman i pou trouv son lafen?

▪ Konman ou pou ganny afekte?

Kisisa fo larelizyon?

Eski ou tris ler ou vwar bann kriyote ki ganny fer onon larelizyon? Eski ou mekontan par sa bann lager, akt teroris ek koripsyon fer par sa bann ki dir zot pe servi Bondye? Akoz larelizyon i paret lakoz sitan bokou problenm? Pa tou larelizyon ki responsab pour sa bann problenm, me se zis fo larelizyon. Zezi Kri, en dimoun ki bokou i respekte, ti montre ki fo larelizyon i prodwir bann move keksoz, zis parey “en move pye fri i raport move fri.” (Matye 7:15-17) Lekel sa bann fri ki fo larelizyon i prodwir?

Fo Larelizyon i . . .

◼ MEL DAN LAGER EK POLITIK: Zournal Asiaweek i dir: “Dan Lazi e osi dan lezot landrwa, bann dirizan ki swaf pouvwar pe manipil krwayans relizye lepep pour zot prop byen.” E an rezilta, sa zournal i averti: “Lemonn i pros pour tonm dan en dezord total.” En dirizan relizye renonmen Letazini ti dir: “Ou bezwen touy bann teroris pour anpes lezot ganny touye.” Son solisyon? “Touy tou teroris onon Bondye.” Labib i dir tou lekontrer: “Si en dimoun i dir: ‘Mon kontan Bondye,’ e i ay son frer, i en manter.” (1 Zan 4:20) Zezi ti menm dir: ‘Kontinyen kontan zot lennmi.’ (Matye 5:44) Ki kantite larelizyon ou kapab mazinen ki son bann manm i partisip dan lager?

◼ ANSENNY FO LANSENNYMAN: Laplipar larelizyon i dir ki nanm oubyen lespri i en keksoz envizib ki viv apre en dimoun in mor. Akoz sa lansennyman, bokou larelizyon i profit lo zot bann manm, par fer zot donn larzan pour priy pour zot defen. Me Labib i dir en lot keksoz. “Sa nanm ki pe fer pese, li menm li ki pou mor.” (Ezekyel 18:4) “Bann vivan i konnen ki zot pou mor, me bann mor, zot pa konn nanryen ditou, zot nepli annan saler, parski zot souvenir in ganny oubliye.” (Eklezyast 9:5) Zezi li ti dir ki bann mor pou ganny resisite, me si dimoun i annan en nanm ki pa mor, alor pa fodre annan rezireksyon. (Zan 11:11-25) Eski ou larelizyon i dir ki nanm pa mor?

◼ TOLER IMORALITE SEKSYEL: Dan serten pei, bann group relizye i permet bann omoseksyel vin pret e zot met presyon lo bann gouvernman pour permet de dimoun menm sèks marye. Menm bann legliz ki kondann imoralite in toler bann pret ki’n fer labi seksyel lo bann zanfan. Me ki Labib i ansennyen konsernan imoralite seksyel? Labib i dir byen kler: ‘Pa les zot ganny anbete, ni bann ki pratik bann akt imoral, ni bann ladorater zidol, ni bann adilter, ni bann omoseksyel, . . . pa pou erit Rwayonm Bondye.’ (1 Korentyen 6:9, 10) Eski ou konn bann larelizyon ki toler imoralite seksyel?

Ki lavenir i rezerve pour bann larelizyon ki prodwir move fri? Zezi ti averti: “Tou pye dibwa ki pa raport bon fri i ganny koupe e zet dan dife.” (Matye 7:19) Wi, fo larelizyon pou ganny koupe e detrir! Me ki mannyer e kan ki sa pou arive? Larepons i trouve dan en vizyon ki en profet ti gannyen e ou kapab lir li dan Revelasyon, sapit 17 ek 18.

Konman fo larelizyon pou trouv son Lafen?

Mazin sa senn dan ou lespri. En prostitye pe asize lo ledo en bebet ki fer per. Sa bebet i annan set latet ek dis korn. (Revelasyon 17:1-4) Ki sa prostitye i reprezante? I annan lenfliyans “lo tou lerwa later.” I abiy dan lenz rouz, i servi lansan, e i annan en ta larises. Deplis, par son bann grigri, i’n ‘tronp tou nasyon.’ (Revelasyon 17:18; 18:12, 13, 23) Labib i ed nou konpran ki sa prostitye i en lorganizasyon relizye mondyal. I pa zis reprezant en serten larelizyon, me tou larelizyon ki prodwir move fri.

Sa bebet ki sa prostitye i monte i reprezant bann pouvwar politik dan lemonn.a (Revelasyon 17:10-13) Fo larelizyon i mont lo ledo sa bebet, dan le sans ki i esey enfliyans son bann desizyon e esey kontrol son direksyon.

Me byento en levennman sirprenan pou arive. “Sa dis korn ki ou ti war, zot ek sa bebet pou ay sa prostitye. Zot pou depouy li avek tou sa ki i posede e kit li touni. Zot pou devor son laser e bril li avek dife.” (Revelasyon 17:16) Par azir en sel kou e san ekspekte, bann pouvwar politik pou vir kont fo larelizyon e detrir li konpletman! Kwa ki pou pous zot fer sa? Liv Revelasyon i reponn: ‘Bondye in plas dan zot leker lavolonte pour akonpli son plan.’ (Revelasyon 17:17) Wi, Bondye pou fer fo larelizyon rann kont pour tou aksyon deplorab ki i’n fer onon Bondye. Bondye pou azir avek en lazistis parfe par servi bann alye politik sa prostitye pour akonpli son plan.

Ki ou bezwen fer si ou pa anvi sibir sa maler ki pe al ariv lo fo larelizyon? Mesaze Bondye i ankouraz ou: “Sorti dan sa lavil, mon pep.” (Revelasyon 18:4) Wi, ozordi i sa letan pour ou sorti dan fo larelizyon! Me kot ou pou sove? Eski savedir ou bezwen aret krwar dan Bondye? Non, ou napa en lavenir si ou pa krwar dan Bondye. (2 Tesalonisyen 1:6-9) Vre larelizyon i ofer ou sa sel landrwa kaset. Ki mannyer ou kapab idantifye vre larelizyon?

Konman pour idantifye vre larelizyon

Ki bon fri vre larelizyon i devret prodwir?—Matye 7:17.

Vre Larelizyon i . . .

◼ DEMONTRE LANMOUR: Bann vre adorater Bondye “pa fer parti lemonn.” Zot pa les zot ras oubyen kiltir diviz zot, e zot “kontan kanmarad.” (Zan 13:35; 17:16; Akt 10:34, 35) Zot pa touy kanmarad, okontrer zot pare pour mor pour kanmarad.—1 Zan 3:16.

◼ MET KONFYANS DAN PAROL BONDYE: Vre larelizyon pa ansenny zot “prop lansennyman” ek “bann konmannman ki’n fer par zonm,” okontrer vre larelizyon i baz son lansennyman lo Parol Bondye, Labib. (Matye 15:6-9) Pour ki rezon? Akoz “tou Lekritir i enspire par Bondye e i itil.”—2 Timote 3:16.

◼ BATIR LAVI FANMIY E PROMOT EN STANDAR MORAL ONIVO:

Vre larelizyon i form bann mari pour “kontan zot madanm parey zot kontan zot prop lekor” e i ed bann madanm pour devlop en ‘profon respe pour zot mari,’ e i ansenny bann zanfan pour “obei zot paran.” (Efezyen 5:28, 33; 6:1) Deplis, sa bann ki ganny serten lotorite i bezwen annan en kondwit moral egzanpler.—1 Timote 3:1-10.

Eski i annan en larelizyon ki pe fer sa bann keksoz? Liv Holocaust Politics, pibliye an 2001, i dir: “Si plis dimoun ti pratik sa ki bann Temwen Zeova i ansennyen e fer, pa ti pou’n annan Olokos e limanite ti pou nepli soufer akoz zenosid.”

Wi, dan 235 pei, bann Temwen Zeova pa pe zis koz lo standar moral Labib, me zot pe osi aplik li dan zot lavi. Nou ankouraz ou pour demann bann Temwen Zeova pour ed ou aprann sa ki Bondye i ekspekte avek ou pour ou kapab ador li dan sa fason ki i aksepte. Ou bezwen azir konmela menm. Pa tarde. Lafen fo larelizyon i pros!—Tsefanya 2:2, 3.

Si ou anvi plis lenformasyon lo sa mesaz baze lo Labib ki bann Temwen Zeova i prese, pa ezite pour kontakte zot lo enn sa bann ladres anba.

□ San okenn lobligasyon, mon demann en kopi sa brosir Kontinyen Veye!

□ Silvouple kontakte mwan pour en letid Labib gratwit.

[Not anba lo paz]

[Ekstre lo paz 3]

Fo larelizyon i annan lenfliyans “lo tou lerwa later”

[Ekstre lo paz 3]

“Sorti dan sa lavil, mon pep”