KESTYON 5

Ki mon pou fer si mon pe ganny bouli kot lekol?

AKOZ I ENPORTAN

Lafason ki ou reazir i kapab amelyor oubyen fer sa sityasyon vin pli pir.

KI OU TI POU FER?

Imazin sa senaryo: Thomas pa anvi al lekol, ni ozordi, ni demen, ni zanmen ankor. Tou ti konmans trwa mwan pase ler son bann kanmarad lekol ti fann bann fo rimer lo li. Apre zot ti donn li bann pti non. Parfwa, manrmay ti zet son bann liv ater e fer konmsi zot pa’n fer ekspre. Lezot fwa bann manrmay ti pous li e letan Thomas i vire, zot fer konmsi zot pa konnen lekel. Pli move ankor, yer en group manrmay ti menas pou bat Thomas.

Si ou ti Thomas, ki ou ti pou fer?

ARETE E REFLESIR!

Ou pa konpletman san defans. Anfet, ou kapab bat en bouli san servi koudpwen. Ki mannyer?

PA REAKTE. Labib i dir: “En fou i tal tou son bann santiman; me sa enn ki saz i reste kalm.” (Proverb 29:11) Si ou esey reste kalm e pa montre ki ou ankoler, kekfwa sa bann ki pe bouli ou pou arete.
PA REVANZE. Labib i dir: “Pa rann personn mal pour mal.” (Romen 12:17) Revanze pou zis fer sityasyon pli grav.
EVIT PROBLENM. Labib i dir: “Ler maler i vini, en zonm pridan i war e i al kasyet.” (Proverb 22:3) Otan ki posib, evit bann dimoun ki kapab fer problenm e evit bann sityasyon kot ou kapab ganny bouli.
ESEY REPONN DAN EN FASON KI ZOT PA EKSPEKTE. Labib i dir: “En larepons trankil i repous lakoler.” (Proverb 15:1) Ou menm kapab esey fer en dyok. Par egzanp, si en dimoun i dir ou ki ou tro gro, ou kapab fer en pti sourir e dir, “Ou annan rezon, kekfwa mon kapab perdi detrwa kilo.”
SORTI ALE. Nora ki annan 19 an i dir: “Letan ou reste trankil, sa i montre ki ou matir e ki ou pli for ki sa dimoun ki pe bouli ou. I osi montre ki ou annan kontrol lo ou lekor, en keksoz ki sa enn ki pe bouli ou napa.”—2 Timote 2:24.
DEVLOP KONFIDANS DAN OU LEKOR. Bann ki kontan bouli lezot i kapab rekonnet bann ki annan en pwennvi negatif lo zot menm e ki pa pou neseserman defann zot lekor. Par kont, bokou zot pou arete si zot vwar ki ou pa per zot.
DIR EN DIMOUN. En dimoun ki ti fer lekol lontan i dir: “Mon ti pou ankouraz nenport ki manrmay ki pe ganny bouli pour koz lo sa sityasyon. I sa pli bon keksoz pour fer e i kapab anpes lezot ganny bouli.”

Avek konfidans en zenn garson i fer fas avek en bouli — Konfidans dan ou lekor pou fer ou pli for ki sa enn ki pe bouli ou

ESKI OU TI KONNEN?

Apard labi fizik, ganny bouli i kapab osi enkli:

Bann parol blesan. “Mon pa pou zanmen oubliy bann pti non ki zot ti donn mwan oubyen bann keksoz ki zot ti dir. Zot ti fer mwan santi konmsi mon’n ganny rezete, ki mon napa okenn valer e ki mon pa vo nanryen. Mon ti pou’n plifere ganny en koudpwen dan mon figir.”—Celine, 20 an.
Lezot i evit ou. “Mon bann kanmarad lekol ti konmans evit mwan. Zot ti fer konmsi ti napa plas lo latab dan lasal a manze pour mwan pa vin asiz o bor zot. Pour enn an, mon ti plere e asiz mon tousel pour manze.”—Haley, 18 an.
Ganny menase lo Enternet. “Zis par pez detrwa bouton lo en konpiter, ou kapab gat repitasyon en dimoun oubyen menm afekte son lavi. Menm si i paret en pe egzazere, i kapab arive.”—Daniel, 14 an.

**KI OU TI POU REPONN?**
VRE OUBYEN FO	LAREPONS
1 Bann bouli in egziste pour plizyer milye lannen.	1 Vre. Par egzanp, Labib i koz lo bann Nefilim, ki zot non i vedir “bann ki fer lezot tonbe.”—Zenez 6:4.
2 Bouli lezot i pa sitan grav. I zis en zwe.	2 Fo. En kantite zenn ki ganny bouli i swiside.
3 Pli bon fason pour anpes en dimoun bouli ou i pour revanze.	3 Fo. Laplipar ditan, bann bouli i pli for ki zot bann viktim alor i pa vo lapenn revanze.
4 Si ou vwar en dimoun pe bouli en lot i pli byen pour zis inyor li.	4 Fo. Dan sa ka, napa sa zafer zis debout gete. Si ou vwar en dimoun pe bouli en lot e ou pa dir nanryen, ou kapab form par sa problenm olye form par sa solisyon.
5 Menm si zot vantar, bann bouli i souvandfwa napa konfidans dan zot prop lekor.	5 Vre. Kantmenm bann bouli i byen vantar, bokou zot i mank konfidans dan zot lekor e zot abes lezot pour zot santi zot pli byen.
6 Bann bouli i kapab sanze.	6 Vre. Avek led, bann bouli i kapab sanz zot fason panse e azir.