KESTYON 7

Ki mon pou fer si lezot i met presyon lo mwan pour fer sèks?

AKOZ I ENPORTAN

Ou bann desizyon konsernan sèks pou annan en lefe lo ou lavenir.

KI OU TI POU FER?

Imazin sa senaryo: I fer zis de mwan depi ki Heather ek Mike pe pwente. Me pour Heather i konmsi zot in toultan ansanm. Zot tèks kanmarad tou lazournen, koz lo telefonn zanmen fini e i konmsi zot konn tou keksoz lo kanmarad. Me aprezan Mike i oule plis.

Pandan sa de mwan, Mike ek Heather in zis atrap lanmen e fer en pti anbrase. Heather pa anvi fer plis ki sa me i pa anvi perdi Mike osi. Mike i fer li santi li spesyal, konmsi i sa pli zoli fiy dan lemonn. Heather i dir dan li menm: ‘Tou fason, mwan ek Mike nou anmoure . . .’

Si ou laz pwente e ou ti dan plas Heather, ki ou ti pou fer?

ARETE E REFLESIR!

En lenz pe ganny servi konman en sifon netwaye — Sèks i en kado sorti kot Bondye zis pour bann dimoun ki’n marye. Ler ou fer sèks avan maryaz, ou pe mal servi kado Bondye. I konmsi ou’n servi en zoli lenz ki en dimoun in donn ou pour netwaye

Pa oubliye ki tou aksyon i annan son konsekans. Par egzanp, si ou mont anler lo pye mang e sot anba, ou ekspekte ganny dimal. I parey si ou kas lalwa Bondye ki dir: “Rezet imoralite seksyel.”—1 Tesalonisyen 4:3, NW.

Si ou dezobei lalwa Bondye, ki kapab arive? Labib i dir: “Sa ki pratik imoralite seksyel i fer pese kont son prop lekor.” (1 Korentyen 6:18, NW) Ki savedir sa?

Bann resers i montre ki bokou zenn ki’n fer sèks avan maryaz in eksperyans enn oubyen plis sa bann konsekans ki swiv.

REGRE. Laplipar zenn ki’n fer sèks avan maryaz i dir ki zot ti regrete apre.
DOUTANS. Apre ki zot in fer sèks, zot tou le de zot demann zot lekor, ‘Avek lekel ankor in deza fer sèks?’
DEZAPWENTMAN. Laplipar fiy ti pou prefer en dimoun ki pou protez zot dan plas servi zot. Bokou garson i perdi lentere pli vit dan en fiy ki fasilman aksepte pour fer sèks avek li.
Sa ki enportan konnen: Si ou fer sèks avan maryaz, ou abes ou lekor e ou perdi en keksoz presye. (Romen 1:24) Ou lekor i annan bokou plis valer.

Montre ki ou determinen pour “rezet imoralite seksyel.” (1 Tesalonisyen 4:3, NW) Koumsa si ou marye en zour, ou pou kapab fer sèks san okenn lenkyetid, regre oubyen bann dout ki souvan arive ler ou fer sèks avan maryaz.—Proverb 7:22, 23; 1 Korentyen 7:3.

KI OU PANSE?

Eski en dimoun ki vreman kontan ou ti pou fer bann keksoz ki kapab afekte ou fizikman oubyen emosyonnelman?
Eski en dimoun ki vreman enterese avek ou ti pou oule ou fer bann keksoz ki kapab kas ou relasyon avek Bondye?—Ebre 13:4.