Ki mannyer mon kapab aret mazin sèks?

“Mon pa konnen kote sa bann dezir seksyel i sorti, mon zis pa kapab tir sa bann panse dan mon lespri. I konmsi en lot dimoun pe kontrol mon lespri.”​—Vera.

“I paret enposib pour kontrol sa bann panse imoral. Mon seye me mon pa kapab.”​—John.

Eski ou annan menm santiman parey Vera oubyen John? Si wi, sa lartik i kapab ed ou.

• Akoz i enportan?

• Akoz i vreman difisil?

• Ki ou kapab fer?

• Ki lezot zenn i dir?

Akoz i enportan?

Alex, en zenn garson i dir: “Mon tonton ti dir mwan ki Bondye pa ti pou’n donn mwan sa dezir pour fer sèks si i pa ti anvi ki mon satisfer li.”

I annan en keksoz ki tonton Alex in dir ki korek. I vre Bondye in kree nou avek sa dezir pour fer sèks e i’n fer li pour en bon rezon. I vre ki bann imen i egziste ozordi gras a relasyon seksyel. Alor, akoz ou bezwen kontrol bann panse seksyel dan ou lespri? I annan de bon rezon akoz:

• Labib i dir ki Bondye ti’n plan pour ki selman en msye ek en madanm ki’n marye avek kanmarad i fer sèks ansanm.​—Zenez 1:28; 2:24.

  Si ou dakor avek pwennvi Bondye e ki ou en selibater, i pou zis fer ou fristre si ou les bann panse lo sèks vin dan ou lespri. I kapab menm tant ou pour fer sèks ler i pou annan en lokazyon. Plizyer ki’n les zot tonm dan sa latrap i dir ki zot ti regrete pli tar.

• Aprann kontrol ou bann panse oubyen dezir seksyel pou ed ou devlop kontrol lo ou lekor.​—1 Korentyen 9:25.

Sa abilite pou vreman ed ou reisi la konmela e dan lavenir. Anfet, en letid in montre ki bann zenn ki annan kontrol lo zot lekor in annan mwens problenm lasante, mwens problenm finansyel ek problenm avek lalwa.a

Akoz i vreman difisil?

Bann sibstans dan nou lekor ki apel ormonn e lefet ki nou pe viv dan en lemonn ki obsede avek sèks i kapab fer li vreman difisil pour kontrol bann dezir seksyel.

“I paret ki tou progranm televizyon i montre ki sèks avan maryaz i oke e ki konmsi napa okenn danze avek sa. Alor, i fasil pour mazin relasyon seksyel dan en fason ki pa apropriye ler film i montre ki napa okenn move konsekans.”​—Ruth.

“Dan travay, mon tann en kantite dimoun koz lo sèks dan en fason vilger e sa i fer mwan anvi konn plis. Zot fer ou krwar ki sa bann dezir seksyel i normal e sa i fer li difisil pour krwar ki i vreman mal.”​—Nicole.

“Ou kapab lo en rezo sosyal e en sel kou ou vwar en portre ki sal e sa i kapab reste dan ou lespri e fer li vreman difisil pour oubliy sa portre!”​—Maria.

Sa bann keksoz i kapab fer ou santi parey zapot Pol. I ti ekri: “Ler mon ti a kontan fer sa ki byen, sa tandans pour fer sa ki mal i dan mwan.”​—Romen 7:21.

Ki ou kapab fer?

Mazin en lot keksoz. Esey mazin bann keksoz ki napa nanryen pour fer avek sèks. Ou kapab swa rod en pastan, fer sport, legzersis oubyen okenn lezot aktivite ki kapab distrer ou. En fiy ki apel Valerie i dir: “I ede ler mon lir Labib. I annan bann panse ki pli spirityel ki sa ki dan mon lespri e sa i fer ki mon napa letan pour mazin lo lezot keksoz.”

I vre, ou kapab ganny bann panse lo sèks. Me sa ki ou deside fer avek sa bann panse i tou depan lo ou. Si ou anvi, ou kapab tir sa bann lide dan ou lespri.

“Ler mon lespri i konmans al dan en move direksyon, mon fer zefor pour reflesi lo en lot keksoz. Mon osi esey vwar kwa ki’n fer mwan konmans mazin en keksoz imoral. I kapab swa en sanson oubyen portre e mon tir zot lo mon lekipman elektronik.”​—Helena.

Prensip Labib: “Tou sa ki drwat, tou sa ki pir, . . . kontinyen mazin sa bann keksoz.”​—Filipyen 4:8.

Swazir bann bon zanmi. Si ou bann zanmi pe toultan koz lo sèks, i pou difisil pour ou gard ou lespri prop moralman.

“Ler mon ti adolesan, i ti difisil pour pa mazin lo sèks, en rezon i mon bann zanmi. Ler ou parmi bann dimoun ki pa vwar nanryen mal avek limoralite seksyel, be sa i ankouraz ou pour mazin lo sèks e sa i zis met dibwa dan dife.”​—Sarah.

Prensip Labib: “Si ou frekant en [dimoun] saz, ou menm ou ava vin saz. Si ou frekant dimoun ki bet, ou pou ganny problenm.”​—Proverb 13:20.

Rezet bann divertisman ki pa apropriye. I pa en sekre ki sèks i partou kote dan bann divertisman. Nicole i dir: “Pour mwan, lanmizik i sa keksoz ki afekte mwan plis. I kapab eksit mon bann dezir ziska ki mon preski pa kapab kontrol zot.”

“Mon ti konmans get bann film ek progranm televizyon ki ti annan bann senn sèks ladan. San realize, mon ti konmans mazin lo sèks souvan. I pa ti difisil pour idantifye kwa ki ti pe fer mwan annan sa bann panse. Enn fwa ki mon ti aret get sa bann film ek progranm televizyon, mon ti nepli pe mazin lo sèks. Ler mon swazir byen sa ki mon pou fer dan mon letan lwazir, sa i fer li pli fasil pour lalit kont bann move dezir.”​—Joanne.

Prensip Labib: “Imoralite seksyel, tou sort kalite lenpirte ek vorasite pa devret ni menm ganny mansyonnen parmi zot.”​—Efezyen 5:3.

A lafen dizour: Serten dimoun i panse ki zot bann dezir seksyel i sitan enportan ki zot pa devret kontrol zot oubyen ki i menm enposib pour kontrol zot. Me Labib i dir lekontrer. Labib i prezerv nou dinyite par dir ki nou kapab kontrol sa ki nou mazin lo la.

Prensip Labib: “Zot devret kontinyen renouvle zot fason panse.”​—Efezyen 4:23.