Akoz nou devret respekte lotorite?

1, 2. (a) Nou devret swiv gidans lekel? (b) Ki nou pou diskite dan sa sapit?

LER ou ti en zanfan, parfwa i bezwen ki ou paran ti demann ou pour fer serten keksoz ki ou pa ti anvi fer. Ou ti kontan ou paran e ou ti konnen ki ou bezwen obei zot. Kantmenm sa, i posib ki pa toultan ki ou ti anvi obei zot.

² Nou konnen ki nou Papa, Zeova, i kontan nou. I pran swen avek nou e i’n fer sir ki nou annan tou sa ki nou bezwen pour ki nou lavi i gou. I gid nou pour ki nou reisi dan nou lavi. Parfwa i osi servi lezot dimoun pour gid nou. Nou bezwen respekte lotorite Zeova. (Proverb 24:21) Me akoz parfwa i difisil pour aksepte gidans ki lezot i donn nou? Akoz Zeova i demann nou pour aksepte konsey? Ki mannyer nou montre ki nou respekte son lotorite?​—Vwar Lezot lenformasyon nimero 9.

AKOZ I DIFISIL?

3, 4. Ki mannyer bann imen ti vin enparfe? Akoz i kapab difisil pour nou respekte lotorite?

³ Konman imen, nou vwar li difisil pour aksepte lotorite. Sa in leka depi ki premye zonm ek premye madanm, Adan ek Ev ti fer pese. Menm si zot ti’n ganny kree parfe, zot pa ti aksepte lotorite Bondye. Depi sa, tou zot desandans in ne enparfe. En rezon akoz i difisil pour nou aksepte gidans sorti kot Zeova ek lezot imen i akoz nou enparfe. En lot rezon i akoz bann ki Zeova i servi pour gid nou, i bann imen enparfe.​—Zenez 2:15-17; 3:1-7; Psonm 51:5; Romen 5:12.

⁴ Vi ki nou enparfe, nou annan tandans pour vin orgeye oubyen tro fyer. Lorgey i fer li difisil pour aksepte gidans. Par egzanp, dan lepok pep Izrael, Zeova ti swazir Moiz pour gid Son pep. En zonm ki ti apel Kora, ki ti’n servi Zeova pour plizyer lannen ti devlop lorgey oubyen larogans. I ti demontre en gran mank respe pour Moiz. Menm si Moiz ti pe gid pep Bondye, i pa ti en dimoun orgeye. Anfet, sa letan, i ti ganny dekrir konman sa zonm ki annan plis limilite. Me Kora pa ti oule aksepte lotorite Moiz. I ti menm konvenk en kantite dimoun pour zwenn avek li e rebel kont Moiz. Ki ti arive avek Kora ek sa bann rebel? Zot ti ganny touye. (Nonm 12:3; 16:1-3; 31-35) I annan en kantite legzanp dan Labib ki montre nou ki lorgey i danzere.​—2 Kronik 26:16-21; vwar Lezot lenformasyon nimero 10.

5. Ki mannyer serten dimoun in mal servi zot lotorite?

⁵ Petet ou’n deza remarke ki pouvwar i fer dimoun vin koronpi. Tou dilon listwar, en kantite dimoun in mal servi zot lotorite. (Lir Eklezyast 8:9.) Par egzanp, Sail ti en bon dimoun e i ti annan limilite ler Zeova ti swazir li pour vin lerwa Izrael. Me i ti devlop lorgey ek zalouzi e akoz sa, i ti persekit David, en zonm inosan. (1 Samyel 9:20, 21; 10:20-22; 18:7-11) Pli tar, David ti vin lerwa e i ti enn parmi bann pli bon lerwa ki Izrael ti gannyen. Toudmenm avek letan, David osi ti mal servi son lotorite. I ti annan relasyon seksyel avek Bat-Seba, madanm en zonm ki apel Ouriya. Apre, David ti esey kasyet son pese par fer Ouriya ganny touye dan lager.​—2 Samyel 11:1-17.

AKOZ NOU DEVRET RESPEKTE LOTORITE ZEOVA

6, 7. (a) Ki nou lanmour pour Zeova i motiv nou pour fer? (b) Kwa ki pou ed nou obei menm ler i pa fasil?

⁶ Nou respekte lotorite Zeova akoz nou kontan li. Vi ki nou kontan Zeova plis ki nenport keksoz oubyen dimoun, nou anvi fer li kontan. (Lir Proverb 27:11; Mark 12:29, 30.) Depi lepok sa premye koup imen dan zarden Edenn, Satan in toultan anvi ki dimoun i kestyonn lotorite Zeova. Dyab i anvi nou krwar ki Zeova napa drwa dir nou ki pour fer. Me nou konnen ki sa i en mansonz. Nou dakor avek sa parol: “Zeova nou Bondye, ou merit laglwar, loner ek pwisans, parski ou’n kree tou keksoz.”​—Revelasyon 4:11.

⁷ Petet ler ou ti en zanfan, ou ti ganny demande pour obei ou paran menm ler ou pa ti anvi. Pareyman, konman bann serviter Zeova, parfwa i kapab difisil pour obei li. Me vi ki nou kontan e respekte Zeova, nou fer tou sa ki nou kapab pour obei li. Zezi ti kit en bon legzanp pour nou. I ti obei Zeova menm ler i pa ti fasil oubyen i pa ti dan son lavantaz. Sanmenm sa i ti kapab dir son Papa: “Pa dapre mon lavolonte, me dapre ou lavolonte.”​—Lik 22:42; vwar Lezot lenformasyon nimero 11.

8. Ki serten fason ki Zeova i servi pour diriz nou? (Vwar bwat “Ekout konsey.”)

⁸ Ozordi, Zeova i diriz nou dan diferan fason. Par egzanp, i’n donn nou Labib. I’n donn nou osi bann ansyen dan kongregasyon. Nou montre ki nou respekte lotorite Zeova ler nou respekte bann ki i servi pour diriz nou. Si nou rezet zot led, dan en sans nou pe rezet Zeova. Ler bann Izraelit ti rezet Moiz, Zeova pa ti kontan ditou. Pour li, i ti konmsi zot ti’n rezet li.​—Nonm 14:26, 27; vwar Lezot lenformasyon nimero 12.

9. Ki mannyer lanmour pou motiv nou pour swiv lenstriksyon?

⁹ Ler nou respekte lotorite, sa i osi montre ki nou kontan nou bann frer ek ser. Reflesir lo sa legzanp. Ler i annan en dezas natirel, souvan i annan en lekip sekour ki travay ansanm pour sov otan dimoun ki zot kapab. Me pour sa lekip travay byen, en dimoun i bezwen organiz sa lekip e sak manm sa lekip i bezwen swiv lenstriksyon. Ki pou arive si en dimoun pa swiv lenstriksyon e fer sa ki li i anvi fer? Menm si sa dimoun i annan bon lentansyon, son dezobeisans i kapab kree problenm pour lezot dan sa lekip e menm fer zot ganny dimal. Pareyman, si nou pa swiv gidans sorti kot Zeova oubyen bann dimoun ki Zeova in donn lotorite, lezot dimoun i kapab soufer. Me ler nou obei Zeova, sa i montre ki nou kontan nou bann frer ek ser e ki nou respekte lotorite Zeova.​—1 Korentyen 12:14, 25, 26.

10, 11. Ki nou pe al diskite aprezan?

¹⁰ Tou sa ki Zeova i demann nou pour fer i pour nou prop byennet. Ler nou respekte lotorite dan nou fanmir, kongregasyon oubyen bann zofisye gouvernman, tou dimoun pou benefisye.​—Deterononm 5:16; Romen 13:4; Efezyen 6:2, 3; Ebre 13:17.

¹¹ Ler nou konpran akoz Zeova i anvi nou respekte lotorite lezot, sa i kapab ed nou pour fer li. Annou vwar plis detay lo konman nou kapab demontre respe dan trwa domenn.

RESPEKTE LOTORITE DAN FANMIR

12. Ki mannyer en msye i montre ki i respekte lotorite Bondye?

¹² Zeova in kree fanmir e i’n donn sak dimoun en rol. Ler sak dimoun i konpran ki Zeova i ekspekte avek zot, sa laranzman fanmir pou mars byen e fanmir antye pou benefisye. (1 Korentyen 14:33) Dapre laranzman Zeova, en msye i sef fanmir. Sa i vedir ki Zeova i oule ki en msye i pran swen e gid son madanm ek zanfan avek lanmour. Alor, en msye i bezwen rann kont avek Zeova lo lafason ki i pran swen avek son fanmir. En msye Kretyen i bezwen bon e zantiy. I bezwen tret son fanmir byen e annan lanmour parey Zezi i tret kongregasyon. Ler en msye i fer sa, i montre ki i respekte lotorite Zeova.​—Efezyen 5:23; vwar Lezot lenformasyon nimero 13.

13. Ki mannyer en madanm i montre ki i respekte lotorite?

¹³ En madanm Kretyen osi i annan en rol enportan e onorab. I ed son msye anmezir ki pe fer zefor pour vin en bon sef fanmir. Ansanm avek son msye, i annan responsabilite pour elve zot zanfan. I kapab ansenny son zanfan pour annan respe pour lezot par son prop legzanp. (Proverb 1:8) Sa madanm i annan respe pour son msye e i korpere pour ki desizyon son msye i reisi. Menm ler i pa dakor avek li lo en keksoz, i eksplik son santiman dan en fason dous e respektab. En madanm Kretyen ki’n marye avek en msye ki pa Temwen i fer fas avek plis defi ankor. Me si i kontinyen demontre lanmour ek respe pour son msye, petet en zour son msye pou anvi konn Zeova e ador li.​—Lir 1 Pyer 3:1.

14. Ki mannyer bann zanfan i kapab respekte lotorite?

¹⁴ Bann zanfan i presye pour Zeova e zot vreman bezwen proteksyon ek gidans zot paran. Ler bann zanfan i obei zot paran, zot fer zot paran kontan. Pli enportan ankor, ler zanfan i obei, zot montre ki zot respekte Zeova e fer li plezir. (Proverb 10:1) Dan bokou fanmir, i annan zis en paran tousel ki elve son zanfan. Sa i kapab difisil pour sa paran e pour sa zanfan osi. Me ler bann zanfan i obeisan e siport zot manman oubyen papa, lavi fanmir pou pli gou. Ki swa tou le de paran i la oubyen non, napa fanmir ki parfe. Par kont tou fanmir pou pli ere kan sak manm fanmir i swiv lenstriksyon Zeova. Sa i glorifye Zeova, sa Enn ki’n fer li posib pour tou fanmir egziste.​—Efezyen 3:14, 15.

RESPEKTE LOTORITE DAN KONGREGASYON

15. Ki mannyer nou montre ki nou respekte lotorite dan kongregasyon?

¹⁵ Zeova i diriz nou atraver kongregasyon Kretyen e i’n donn Zezi tou lotorite lo kongregasyon. (Kolosyen 1:18) Zezi li in donn “lesklav fidel e pridan” sa responsabilite pour pran swen avek pep Bondye lo later. (Matye 24:45-47) Ozordi, sa “lesklav fidel e pridan” i Konsey Direkter. Konsey Direkter i donn nou sa ki nou bezwen dan sa moman apropriye pour ed nou annan en lafwa for. Bann ansyen, serviter kongregasyon ek sirveyan rezyonal i ed bann kongregasyon partou dan lemonn. Sa bann frer i ganny bann lenstriksyon sorti kot Konsey Direkter. Tou sa bann frer i annan sa responsabilite pour pran swen avek nou. Zot bezwen rann kont avek Zeova lo lafason ki zot desarz sa responsabilite. Alor, ler nou respekte lotorite sa bann zonm, nou respekte lotorite Zeova.​—Lir 1 Tesalonisyen 5:12; Ebre 13:17; vwar Lezot lenformasyon nimero 14.

16. Akoz nou kapab dir ki bann ansyen ek serviter kongregasyon i ganny swazir par lespri sen?

¹⁶ Bann ansyen ek serviter kongregasyon i ed kongregasyon reste fidel e ini. Byensir, zot enparfe parey nou menm. Alor, ki mannyer zot ganny swazir? Sa bann frer i bezwen annan sa bann kalite oubyen kalifikasyon ki ganny detaye dan Labib. (1 Timote 3:1-7, 12; Tit 1:5-9) Zeova ti servi lespri sen pour ed bann ekriven Labib koz lo sa bann kalifikasyon. Bann ansyen i osi demann Zeova son lespri sen ler zot pe diskite lekel ki pou ganny apwente konman en ansyen oubyen serviter kongregasyon. Alor, i kler ki se Zeova ek Zezi ki diriz kongregasyon. (Akt 20:28) Sa bann zonm ki ganny swazir pour ed e pran swen avek nou i bann kado sorti kot Bondye.​—Efezyen 4:8.

17. Par ler, ki en ser i bezwen fer pour demontre respe pour lezot dan kongregasyon?

¹⁷ Parfwa, i kapab napa en ansyen oubyen serviter kongregasyon pour fer serten keksoz dan kongregasyon. Normalman lezot frer batize i kapab ede, me si napa, en ser i kapab fer en travay ki normalman en frer batize i fer. Si sa i arive, i bezwen kouver son latet avek en skarf oubyen sapo. (1 Korentyen 11:3-10) Dan sa fason, i montre ki i respekte laranzman Zeova dan fanmir e dan kongregasyon.​—Vwar Lezot lenformasyon nimero 15.

RESPEKTE LOTORITE BANN ZOFISYE GOUVERNMAN

18, 19. (a) Ki nou aprann dan Romen 13:1-7? (b) Ki mannyer nou montre respe pour bann gouvernman?

¹⁸ Zeova i permet bann gouvernman pour annan en serten lotorite e nou devret respekte zot. Zot organiz pei ek bann distrik dan en fason ki tou keksoz i mars byen e zot ofer bann diferan servis. Bann Kretyen i obei lenstriksyon ki ganny trouve dan Romen 13:1-7. (Lir.) Nou respekte bann “lotorite” e obei lalwa en pei oubyen kominote kot nou reste. Sa bann lalwa i kapab konsern nou fanmir, biznes oubyen nou bann byen materyel. Par egzanp, nou pey taks e donn lenformasyon ki gouvernman i demann nou. Me ki nou devret fer si gouvernman i demann nou pour fer en keksoz ki kont lalwa Bondye? Zapot Pyer ti dir: “Nou devret obei Bondye plito ki zonm.”​—Akt 5:28, 29.

¹⁹ Si nou bezwen koz avek en zofisye gouvernman, parey en ziz oubyen gard, nou bezwen toultan demontre respe. Bann zenn Kretyen i devret annan respe pour zot ansenyan ek lezot travayer kot lekol. Kot nou travay, nou devret annan respe pour nou anplwayer menm si lezot anplwaye pa fer li. Ler nou fer sa, nou imit legzanp zapot Pol, ki ti annan respe pour bann zofisye menm si i pa ti toultan fasil. (Akt 26:2, 25) Menm si lezot dimoun pa tret nou byen, nou devret demontre respe anver zot.​—Lir Romen 12:17, 18; 1 Pyer 3:15.

20, 21. Ki i kapab arive si nou montre ki nou annan respe pour lezot?

²⁰ Partou dan lemonn, pli ale dimoun napa okenn respe pour lezot. Me pep Zeova i diferan. Nou fer sir ki nou respekte tou dimoun. Nou swiv sa konsey zapot Pol: “Annan respe pour tou kalite dimoun.” (1 Pyer 2:17) Dimoun i remarke ler nou annan respe pour zot. Zezi ti dir nou: “Zot lalimyer i devret briye devan dimoun, pour ki zot kapab vwar zot bon aksyon e glorifye zot Papa dan lesyel.”​—Matye 5:16.

²¹ Ler nou respekte lotorite dan nou fanmir, dan nou kongregasyon e dan lezot domenn, nou bon legzanp pou fer lezot anvi aprann konn Zeova. Par demontre respe anver lezot, nou montre ki nou annan respe pour Zeova. Sa i fer Zeova kontan e i montre ki nou kontan li.