Demontre respe pour lezot

1. Akoz dimoun i kontan ler lezot i demontre respe anver zot? (Proverb 22:1)

ESKI ou kontan ler dimoun i demontre respe anver ou? San dout ou kontan. Tou dimoun i bezwen santi ki lezot i annan respe pour zot. Nou santi nou byen ler lezot i demontre respe anver nou. I pour sa rezon ki Labib i dir “i pli bon . . . ganny respekte ki [ganny] larzan ek lor.”—Lir Proverb 22:1.

2-3. Anver lekel ki nou devret demontre respe?

² Parfwa nou kapab vwar li difisil pour demontre respe pour lezot. En rezon i akoz nou vwar bann defo ki lezot i annan. Osi, nou pe viv dan en letan kot bokou dimoun pa demontre respe anver lezot. Me nou, nou bezwen diferan. Akoz? Parski Zeova i anvi ki nou onor oubyen demontre respe pour “tou kalite dimoun.”—1 Pyer 2:17.

³ Dan sa lartik, nou pou aprann ki i vedir pour demontre respe pour lezot e ki mannyer nou kapab demontre respe pour (1) nou fanmir, (2) bann frer ek ser dan kongregasyon e (3) bann dimoun an deor kongregasyon. Nou pou vwar ki mannyer nou kapab demontre respe sirtou ler i difisil.

KI SAVEDIR DEMONTRE RESPE POUR LEZOT?

4. Ki i vedir pour demontre respe anver lezot?

⁴ Ki sa mo respe i vedir? Dan serten langaz, sa mo “respe” ek “loner” i relye avek kanmarad. Ki mannyer? Sa mo “respe” i prensipalman refer avek lafason ki nou konsider en dimoun. Ler nou annan respe pour lezot, nou konsider zot konman bann dimoun ki merit nou latansyon ek konsiderasyon. Petet sa i akoz bann kalite ki zot annan, bann keksoz enpresyonan ki zot in fer oubyen akoz zot pozisyon. De lot kote, “loner” i refer avek lafason ki nou tret en dimoun. Ler nou onor lezot, nou tret zot dan en fason ki fer zot santi ki zot presye, ki nou apresye zot e ki zot enportan. Byensir, pour nou kapab senserman demontre loner, nou bezwen vreman anvi fer li.—Mat. 15:8.

5. Kwa ki kapab ed nou pour demontre respe anver lezot?

⁵ Zeova i anvi ki nou demontre respe pour lezot. Par egzanp, i dir ki nou devret demontre respe pour “bann lotorite.” (Rom. 13:1, 7) Me serten i kapab dir: “Mon pare pour demontre respe anver lezot tan ki zot konport zot byen.” Eski sa fason panse i byen? Konman bann serviter Zeova, nou realize ki sa respe ki nou demontre anver bann imen pa depan zis lo zot bann aksyon me i depan lo en keksoz pli enportan. Sa i nou lanmour pour Zeova e lefet ki nou anvi fer li plezir.—Zoz. 4:14; 1 Pyer 3:15.

6. Eski i posib pour demontre respe pour en dimoun ki napa respe pour ou? Eksplike. (Vwar portre.)

⁶ Serten dimoun i kapab demande: ‘Eski i vreman posib pour demontre respe anver en dimoun ki pa tret nou avek respe?’ Wi. Annou vwar detrwa legzanp. Lerwa Sail ti imilye son garson, Zonatan devan lezot. (1 Sam. 20:30-34) Kantmenm sa, Zonatan ti demontre respe anver son papa e i ti siport li dan lager ziska ki Sail ti mor. (Egz. 20:12; 2 Sam. 1:23) Granpret Eli ti akiz Ana konmkwa i sou. (1 Sam. 1:12-14) Me Ana ti koz avek Eli avek respe menm si tou dimoun an Izrael ti konnen ki Eli pa ti’n koriz son bann garson parey i ti’n devret konman zot papa e konman granpret. (1 Sam. 1:15-18; 2:22-24) Osi bann zonm Atenn ti ensilte zapot Pol e zot ti dir ki i pe “rabase.” (Akt 17:18) Malgre sa, Pol ti koz avek zot avek respe. (Akt 17:22) Sa bann legzanp i montre ki sa gran lanmour ki nou annan pour Zeova e sa dezir ki nou annan pour fer li plezir, i kapab motiv nou pour demontre respe anver lezot pa zis ler i fasil me osi ler i difisil. Aprezan annou vwar lekel ki merit nou respe e akoz.

DEMONTRE RESPE POUR NOU FANMIR

7. Kwa ki kapab fer li difisil pour nou tret nou fanmir avek respe?

⁷ Kwa ki kapab fer li difisil? Nou pas en kantite letan avek nou fanmir. Sa i fer ki nou konn zot bann bon kalite ek zot defo. Serten i kapab annan en maladi ki fer li difisil pour nou pran swen avek zot oubyen zot kapab enkyet tro bokou. Lezot i kapab menm dir oubyen fer bann keksoz ki bles nou santiman. Olye fer zot lakour vin en landrwa kot tou dimoun i kapab repoze e santi zot anpe, serten pa tret zot fanmir avek respe e sa i kree problenm ki fer ki napa linite. Zis parey rematis i anpes serten parti lekor travay byen ansanm. Ler bann fanmir pa demontre respe anver kanmarad, sa i fer zot pa ini. Me kontrerman avek rematis ki pa vreman annan en gerizon, i posib pour en fanmir annan e demontre respe anver kanmarad.

8. Akoz i enportan pour demontre respe pour nou fanmir? (1 Timote 5:4, 8)

⁸ Akoz nou devret demontre respe? (Lir 1 Timote 5:4, 8.) Dan sa premye let ki Pol ti ekrir Timote, i ti koz lo lafason ki bann manm fanmir i devret pran swen avek kanmarad. I ti eksplike ki nou devret onor nou fanmir pa akoz nou oblize me akoz nou annan “devosyon pour Bondye.” Sa i vedir ki nou onor nou fanmir akoz nou kontan Zeova e akoz sa i form parti nou ladorasyon pour li. Zeova in etabli sa laranzman fanmir. (Efe. 3:14, 15) Alor ler nou onor en manm fanmir, nou pe onor Zeova, sa enn ki’n kree sa laranzman. (Vwar not letid dan nwtsty-E dan 1 Timote 5:4.) Pa sa i en rezon enportan pour nou demontre respe pour nou fanmir.

9. Ki mannyer en msye ek en madanm i kapab demontre respe anver kanmarad? (Vwar portre.)

⁹ Ki mannyer nou kapab demontre respe? En msye ki onor son madanm i montre ki son madanm i presye pour li, pa zis an prive me osi an piblik. (Prov. 31:28; 1 Pyer 3:7) I pa zanmen bat son madanm, imilye li oubyen fer li santi ki i pa vo nanryen. En frer ki apel Ariel,a ki reste Larzantin i dir: “Mon madanm i malad e sa i fer ki parfwa i dir bann keksoz ki bles mon santiman. Ler sa i arive, mon esey gard antet ki sa ki i pe dir, i pa sa ki i vreman santi. Dan bann moman entans, mon esey rapel 1 Korentyen 13:5 ki motiv mwan pour koz dan en fason ki annan respe olye dan en fason ki abes li.” (Prov. 19:11) De lot kote, en madanm i onor son msye ler i koz an byen lo li. (Efe. 5:33) I pa koz koze mirak, boufonnen e ensilte son msye parski i realize ki bann kondwit koumsa i parey larouy ki andomaz en maryaz. (Prov. 14:1) En ser ki reste Itali ki son msye i enkyet tro bokou i dir: “Parfwa mon santi ki mon msye i enkyet tro bokou lo bann keksoz ki pa neseser. Dan lepase, sa ki mon ti dir ek lekspresyon lo mon figir ti montre ki mon napa respe pour li. Me mon’n vwar ki pli mon pas letan avek lezot ki koz lo lezot avek respe, pli mon anvi demontre respe anver mon msye.”

10. Ki mannyer bann zenn i kapab montre ki zot annan respe pour zot paran?

¹⁰ Zenn, obei bann lareg ki ou paran in mete. (Efe. 6:1-3) Ler ou koz avek ou paran, fer li avek respe. (Egz. 21:17) Anmezir ki ou paran i vin pli aze, petet zot pou bezwen plis led. Fer ou mye pour pran swen avek zot. Annou vwar legzanp María, ki son papa pa en Temwen Zeova. Ler son papa ti malad, i ti fer li difisil pour María pran swen avek li parski i pa ti tret María dan en bon fason. María i dir: “Mon ti priye pour mon kapab annan respe pour mon papa me osi pour mwan kapab demontre sa respe. Mon ti mazinen ki si Zeova i demann mwan pour onor mon paran, sa ti vedir ki i kapab donn mwan sa lafors pour fer li. Avek letan, mon’n realize ki mon bezwen demontre respe anver mon papa menm si i pa sanz son latitid.” Ler nou onor nou fanmir menm ler i difisil, nou montre ki nou respekte sa laranzman ki Zeova in etabli.

DEMONTRE RESPE ANVER BANN FRER EK SER DAN KONGREGASYON

11. Akoz i kapab difisil pour tret nou bann frer ek ser avek respe?

¹¹ Kwa ki kapab fer li difisil? Nou bann frer ek ser i viv dapre bann standar ki dan Labib. Me parfwa zot kapab tret nou dan en move fason, mazin bann keksoz ki pa vre lo nou oubyen irit nou. Si en frer oubyen ser i fer nou “annan rezon pour konplent,” nou kapab vwar li difisil pour kontinyen tret li avek respe. (Kol. 3:13) Kwa ki kapab ed nou pour kontinyen demontre respe?

12. Akoz i enportan pour demontre respe anver bann frer ek ser? (2 Pyer 2:9-12)

¹² Akoz nou devret demontre respe? (Lir 2 Pyer 2:9-12.) Dan sa dezyenm let ki Pyer ti ekrir, i ti dir ki serten Kretyen dan premye syek ti pe koz an mal lo bann ki’n “ganny onore par Bondye” setadir bann ansyen. Ki mannyer bann lanz ki ti vwar sa ti reazir? “Par respe pour Zeova,” zot pa ti dir nanryen mal lo sa bann dimoun. Zis mazin sa! Sa bann lanz parfe ti fer sir ki zot pa koz an mal lo sa bann zonm arogan. O kontrer, zot ti les Zeova ziz sa bann zonm e disiplin zot. (Rom. 14:10-12; konpar Zid 9.) Nou kapab aprann en leson avek bann lanz. Si nou pa devret mank respe anver bann ki opoz nou, ki kantite plis ankor nou pa devret mank respe pour nou bann frer ek ser. O kontrer nou devret “premye” pour onor zot. (Rom. 12:10) Ler nou fer sa, nou montre ki nou annan respe pour Zeova.

13-14. Ki mannyer nou kapab demontre respe anver bann frer ek ser dan kongregasyon? Donn legzanp. (Vwar portre.)

¹³ Ki mannyer nou kapab demontre respe? Ansyen, fer zefor pour ansenny lezot avek lanmour. (Filem. 8, 9) Si ou bezwen konsey en dimoun, fer li avek labonte e pa ler ou fristre. Ser, ou kapab ed lezot dan kongregasyon pour demontre respe anver kanmarad par evite donn nouvel oubyen koz an mal lo lezot. (Tit 2:3-5) Nou tou nou kapab demontre respe pour bann ansyen par korpere avek zot e par demontre lapresyasyon pour sa travay ki zot fer pour kondwir renyon, pour diriz sa travay predikasyon e pour ed bann ki’n pran “en move semen.”—Gal. 6:1; 1 Tim. 5:17.

¹⁴ En ser ki apel Rocío ti vwar li difisil pour annan respe pour en ansyen ki ti donn li konsey. I dir: “Mon ti santi ki i ti’n mal koz avek mwan. Ler mon ti kot mwan, mon ti koz an mal lo li. Menm si mon ti esey pa montre, mon ti dout son motivasyon e mon pa ti aksepte son konsey.” Kwa ki ti ed Rocío? I dir: “Pandan mon lektir Labib, mon ti lir 1 Tesalonisyen 5:12, 13. Ler mon ti realize ki mon pa ti pe demontre respe pour sa frer, mon konsyans ti konmans fatig mwan. Mon ti priy Zeova e mon ti fer resers dan nou bann piblikasyon pour trouv bann lenformasyon spesifik ki ti kapab ed mwan pour sanz mon latitid. Mon ti realize ki problenm pa ti sa frer me i ti lefet ki mon ti orgeye. Aprezan, mon konpran ki si mon napa limilite, i pou difisil pour mwan demontre respe anver lezot. Mon ankor bezwen amelyore me anmezir mon fer zefor pour demontre respe anver lezot, mon santi ki Zeova i apresye mon zefor.”

DEMONTRE RESPE ANVER BANN DIMOUN AN DEOR KONGREGASYON

15. Akoz i kapab difisil pour nou demontre respe anver bann dimoun an deor kongregasyon?

¹⁵ Kwa ki kapab fer li difisil? Dan predikasyon, souvan nou zwenn bann dimoun ki paret pa kontan sa laverite ki dan Labib. (Efe. 4:18) Serten i swazir pour pa ekoute akoz lafason ki zot in grandi. I kapab ki nou bezwen travay oubyen al lekol avek bann dimoun ki brit e petet nou anplwayer oubyen ansenyan pa apresye sa ki nou fer. Avek letan, nou kapab perdi respe pour sa bann dimoun e nou pa tret zot parey nou ti ava kontan ganny trete.

16. Akoz i enportan pour demontre respe anver bann dimoun ki pa ankor servi Zeova? (1 Pyer 2:12; 3:15)

¹⁶ Akoz nou devret demontre respe? Gard antet ki Zeova i port latansyon lo lafason ki nou tret bann dimoun ki pa servi li. Zapot Pyer ti rapel bann Kretyen ki zot bon kondwit i kapab fer serten anvi “glorifye Bondye.” I pour sa rezon ki i ti ankouraz zot pour toultan pare pour defann zot lafwa “avek ladouser ek bokou respe.” (Lir 1 Pyer 2:12; 3:15.) Ki swa sa bann Kretyen ti pou bezwen defann zot lafwa devan en ziz oubyen en lot dimoun, zot ti toultan bezwen demontre respe anver lezot. Apre tou, Zeova pe obzerv nou e i pe ekout sa ki nou dir e lafason ki nou dir li. Pa sa i en bon rezon pour tret bann ki an deor kongregasyon avek respe!

17. Ki mannyer nou kapab demontre respe anver bann dimoun an deor kongregasyon?

¹⁷ Ki mannyer nou kapab demontre respe? Ler nou dan predikasyon, nou pa zanmen anvi fer lezot santi ki nou krwar ki zot enferyer parski zot pa konn nanryen lo Labib oubyen zot pa konn bokou keksoz lo la. O kontrer, nou anvi konsider lezot konman presye pour Bondye e pli siperyer ki nou. (Aga. 2:7; Fili. 2:3) Si en dimoun i ensilte ou akoz ou krwayans, pa ensilte li ou osi par koz li koze mirak. (1 Pyer 2:23) Si ou dir en keksoz ki ou regrete, demann sa dimoun pardon deswit. Ki mannyer ou kapab demontre respe pour bann dimoun kot ou travay? Vin en bon travayer e fer zefor pour vwar bann bon kalite ki ou bann koleg travay ek anplwayer i annan. (Tit 2:9, 10) Ler ou onnet e travay dir, bann dimoun kot ou travay i kapab apresye ou oubyen zot kapab pa apresye ou. Me ou kapab asire ki ou pou fer Bondye plezir.—Kol. 3:22, 23.

18. Akoz i vo lapenn pour devlop e demontre respe anver lezot?

¹⁸ Nou annan bann bon rezon pour devlop e demontre respe anver lezot. Nou’n vwar ki ler nou montre ki nou annan respe pour nou fanmir, nou onor Zeova, ki nou Sef fanmir. Pareyman, ler nou montre ki nou annan respe pour nou bann frer ek ser dan kongregasyon, nou onor nou Papa ki dan lesyel. Osi ler nou montre ki nou annan respe pour bann dimoun an deor kongregasyon, nou fer li fasil pour zot anvi glorifye oubyen onor nou Bondye. Menm si serten dimoun pa zanmen demontre respe anver nou, i vo lapenn pour devlop e demontre respe anver zot. Akoz? Parski Zeova pou beni nou e i promet: “Mon pou onor bann ki onor mwan.”—1 Sam. 2:30.