En bon larelizyon i ankouraz pour annan standar moral o nivo
EN BON larelizyon i fer nou mazin bann bon keksoz e i montre nou ki mannyer pour amelyor nou kondwit. I donn nou sipor dan nou lalit pour fer sa ki byen e i ed nou pour vin en pli bon dimoun. Ki mannyer nou konnen ki en bon larelizyon i fer sa?
Remark sa ki zapot Pol ti ekrir bann Kretyen dan premye syek ki ti reste dan lavil Korent, Lagres. Sa ansyen lavil ti renonmen pour zot fason viv imoral. Zapot Pol ti averti zot: “Ni bann ki pratik bann akt imoral, ni bann ladorater zidol, ni bann adilter, ni bann omoseksyel, ni bann voler, ni bann anvye, ni bann soular, ni bann ki fer kalomni, ni bann ki akapar byen zot prosen, pa pou erit Rwayonm Bondye.” Apre zapot Pol ti azoute: “Koumsa menm ki serten parmi zot ti ete. Me zot in ganny lave, zot in ganny pirifye, zot in ganny zistifye o non Senyer Zezi-Kri e dan Lespri nou Bondye.” (1 Korentyen 6:9-11) Zis mazin sa, sa bon larelizyon ti ed serten dimoun ki oparavan ti napa standar moral dan zot lavi pour vin bann serviter Bondye ki pir e drwat!
Me parkont Labib i averti: “En letan pe vini, kot dimoun pou nepli siport lansennyman laverite. Me zot pou swiv zot prop dezir; zot pou rasanble en kantite ansennyan otour zot pour dir zot sa ki zot zorey i oule tande.”—2 Timote 4:3.
Ki mannyer bann larelizyon ki ou konnen pe fer dan sa domenn? Eski zot swiv bann standar o nivo ki dan Labib? Oubyen eski zot zis dir dimoun “sa ki zot zorey i oule tande” e zot pa atas bokou valer avek bann konsey byen kler ki dan Parol Bondye?
Pour ed ou rekonnet si i annan en larelizyon an partikilye ki pe raport bon fri, akoz ou pa pran letan pour reponn sa bann kestyon swivan?
TOPIK: Maryaz.
KI LABIB I DIR: “Ki maryaz i ganny onore par tou dimoun, e ki bann ki’n marye i reste fidel avek kanmarad. Bondye pou ziz bann ki anmenn en lavi dezordonnen e adilter.”—Ebre 13:4.
KESTYON: Eski sa larelizyon i ekspekte ki tou bann koup ki viv ansanm parmi son bann manm i marye legalman?
TOPIK: Divors.
KI LABIB I DIR: Kan Zezi ti ganny demande si i annan okenn rezon valab ki en dimoun i kapab divorse, i ti reponn: “Si en zonm i divors son madanm pour okenn rezon, eksepte si i’n tronp li, e i marye avek en lot madanm, i komet adilter.”—Matye 19:9.
KESTYON: Eski sa larelizyon i respekte lansennyman Zezi e i pa permet en dimoun pour divorse e remarye eksepte si i’n ganny tronpe?
TOPIK: Seksyalite.
KI LABIB I DIR: “Elwanny zot avek bann pratik imoral. Tou lezot pese ki en dimoun i fer i andeor son lekor, me en dimoun ki livre li dan limoralite i fer pese kont son prop lekor.”—1 Korentyen 6:18.
“Menm zot madanm i sanz zot relasyon natirel pour bann relasyon kont natir. Bann zonm osi, i’n abandonn zot relasyon natirel avek en madanm pour ganny lanvi seksyel antre zot. Zonm i pratik antre zot bann aksyon ki fer onte, e se pour sa rezon ki zot ganny pini dan en fason ki zot merite pour bann tel forfe.”—Romen 1:26, 27.
KESTYON: Eski sa larelizyon i ansenny nou ki limoralite seksyel ant en msye ek en madanm ouswa ant bann koup menm sèks i en pese?
TOPIK: Pa per pour fer son bann manm swiv bann prensip dan Labib.
KI LABIB I DIR: “Zot pa devre asosye zot avek personn ki annan non frer, si i annan en lavi imoral, ki anvye, ki en ladorater zidol, ki kalomni son prosen, ki en soular ou en voler; pa ni menm manz avek en tel dimoun.” (1 Korentyen 5:11) Ki devret arive avek bann dimoun ki dir i en Kretyen me ki pa oule repantir? Parol Bondye i dir: “Sas bann dimoun ki komet sa ki mal parmi zot.”—1 Korentyen 5:13.
KESTYON: Eski sa larelizyon i retir okenn dimoun parmi son bann manm ki inyor prensip Labib e pa oule repantir?
[Portre lo paz 6]
Ki larelizyon ki annan sa repitasyon pour swiv bann standar o nivo ki dan Labib?