En bon larelizyon i ankouraz pour annan respe pour Parol Bondye

ZEZI ti ankouraz dimoun pour annan respe pour Parol Bondye, Labib. Sa i evidan par lafason ki i ti reponn kan Dyab ti tant li. (Matye 4:4-11) Par egzanp, ki mannyer Zezi ti reazir kan Satan ti esey met li dan en pyez pour fer li fer detrwa ros vin dipen? Zezi ti reziste sa tantasyon an sitan sa parol ki Moiz ti ganny enspire pour ekrir, ki ou kapab lir dan Deterononm 8:3. Kan Dyab ti dir Zezi ador li e i a donn li dominasyon lo tou bann rwayonm partou lo later, ki Zezi ti reponn? I ti refize e i ti refer avek en prensip dan Lekritir ki ou kapab trouve dan Deterononm 6:13.

Zis mazin sa! Menm si Zezi ti Garson Bondye, kan i ti pe ansennyen i ti servi Labib konman son lotorite e i ti depan lo la. Sirman i pa ti zanmen prefer tradisyon zonm ki Parol Bondye. (Zan 7:16-18) Parkont, plizyer sef relizye dan letan Zezi pa ti annan sa menm kalite respe pour Parol Bondye. Akoz sa? Akoz zot ti’n les tradisyon zonm annan plis valer ki Lekritir Sakre. Byen fran Zezi ti dir avek sa bann zonm relizye: “Zot detri valer parol Bondye pour swiv zot prop lansennyman. Bann iprokrit! Ezai ti annan rezon ler i ti dir sa bann parol lo zot: ‘Sa pep, i onor mwan avek zot labous, Me zot leker i lwen avek mwan. Zot ladorasyon i initil, zot ansenny bann konmannman ki’n fer par zonm!’”—Matye 15:6-9.

Bokou larelizyon dan lemonn, ki swa Kretyen oubyen bann ki pa Kretyen, zot tou zot dir ki zot annan respe pour Labib. Toudmenm, konbyen larelizyon ou konnen ki refize pour swiv bann tradisyon zonm kan sa bann tradisyon pa an armoni avek bann lansennyman kler ki dan Parol Bondye? Egzamin de legzanp.

TOPIK: Bann tit pour bann sef relizye.

KI LABIB I DIR: Zezi ti kondann bann sef relizye dan son letan akoz zot ti kontan ganny apele par bann tit e zot ti annan sa dezir pour ganny remarke par lezot. I ti dir ki sa bann zonm ti kontan “premye plas dan lafet e rezerv premye plas dan sinagog; Zot kontan ganny salye dan bann landrwa piblik e ganny apele ‘Met.’” Apre Zezi ti dir son bann disip: “Zot pa devre apel personn ‘Met’ akoz zot tou, zot frer e zot annan zis en sel Met. E pa apel personn isi lo later ‘Papa,’ akoz zot annan zis en sel Papa ki dan lesyel.”—Matye 23:1-10.

KESTYON: Eski bann sef relizye dan sa larelizyon i kontan ganny apele par bann tit pour ganny loner spesyal e eski zot anvi ganny remarke dan kominote oubyen eski zot obeir lord Zezi pour evite fer sa?

TOPIK Servi zimaz dan ladorasyon.

KI LABIB I DIR: “Ou pa devret fer pour ou menm en stati, oubyen en laform ki resanble okenn keksoz ki dan lesyel anler oubyen lo later anba oubyen ki dan delo anba later. Ou pa devret prostern devan zot oubyen servi zot.”—Egzod 20:4, 5, English Standard Version.

Zapot Zan ti ekrir bann Kretyen: “Prezerv zot kont bann zidol.”—1 Zan 5:21.

KESTYON: Eski sa larelizyon i obeir sa komannman kler ki dan Labib pour evite servi zimaz ek zidol kan zot ador Bondye?

Ou kapab trouv sa bon semen

Malgre sa kantite larelizyon ki fer dimoun konfize ozordi, ou kapab trouv sa enn ki anmenn ver lavi. I annan plizyer keksoz ki kapab ed ou pour idantifye sa larelizyon ki “Bondye nou Papa i konsider konman en larelizyon pir e san defo.” (Zak 1:27) Ou kapab servi bann verse ki sa lartik i fer referans avek konman bann lansenny ki pou ed ou trouv sa larelizyon.

Akoz ou pa demann Temwen Zeova pour donn en leksplikasyon pour larepons ki zot in donnen pour sa bann kestyon ki’n ganny souleve dan sa bann lartik? Anmezir ou egzamin sa ki zot dir, swiv sa bon legzanp ki bann ki ti viv dan premye syek dan lavil Bere in kite. Apre ki zot ti tann zapot Pol prese, “zot ti etidye Lekritir pour war si sa ki Pol ti dir zot ti vre.” (Akt 17:11) Si ou annan respe pour Parol Bondye e ou etidye li o profon parey bann Bereen, ou pou trouv sa semen ki anmenn ver lavi. I depan lo ou pour fer sa swa pour mars lo sa semen.

[Portre lo paz 9]

Ki larelizyon ki ankouraz dimoun pour etidye Labib pour vwar si sa ki zot pe aprann i vre?