Ki si sa lespri sen?

ENN fwa Zezi ti demann son bann disip: “Lekel sa papa parmi zot, ki si son garson i demann li en pwason, i a donn li en serpan olye en pwason; oubyen si i demann li en dizef, i a donn li en skorpyon?” (Lik 11:11, 12) Bann zanfan Galile ti kontan manz dizef ek pwason, zot konn tre byen ki kalite manze zot ti anvi manze.

Zezi ti dir ki nou devret kontinyen demann lespri sen, parey en zanfan ki lafen i demann son manze. (Lik 11:9, 13) Kan nou konnen ki si sa lespri sen, sa pou permet nou konpran ki rol enportan i kapab annan dan nou lavi. Alor, premyerman annou egzaminen ki Labib i dir lo sa size.

Pwisans Bondye

Labib i fer kler ki lespri sen i en lafors ki Bondye i servi pour akonplir son lavolonte. Kan lanz Gabriyel ti anons Mari ki i ti pou donn nesans en garson menm si i ti en vyerz, sa lanz ti dir li: “Lespri Sen i a desann lo ou, Bondye i a kouver ou avek son pisans; e pour sa rezon, sa zanfan ki pou ne pou sen, i pou apel Garson Bondye.” (Lik 1:35) Dapre sa ki Gabriyel ti dir, lespri sen ek “pwisans” Bondye i relye avek kanmarad.

Dan lezot liv Labib i osi donn sa menm lide lo lespri sen. Profet Mika ti dir: “Mwan mon ranpli avek lafors, akoz lespri Zeova.” (Mika 3:8) Zezi ti promet son bann disip: “Zot pou ranpli avek en pouvwar ler Sent-Espri pou desann lo zot.” (Akt 1:8) Zapot Pol ti osi koz lo “pisans Sent-Espri.”—Romen 15:13, 19.

Alor ki konklizyon nou kapab tire avek sa ki nou fek lir? I annan en lyen pros ant lespri sen ek pwisans Bondye. Lespri sen i sa mwayen atraver ki Zeova i egzers son pouvwar. Senpleman nou kapab dir ki lespri sen i pwisans Bondye oubyen lafors aktif Bondye. Pa sa i en lafors ekstraordiner! Nou pa kapab arive konpran sa pwisans ki ti neseser pour kree liniver antye. Atraver profet Izai, Zeova in demann nou pour reflesir lo sa panse swivan: “Lev zot lizye anler e gete. Lekel ki’n kree sa bann keksoz? Se sa Enn ki pe fer marse sa larme, zot tou zot la. I apel zot tou par zot non. Akoz i annan en kantite lenerzi e akoz i for e pwisan, napa enn parmi zot ki manke.”—Izai 40:26.

Alor Labib i fer resorti ki sa lord ek larmoni ki egziste dan liniver i gras a sa “kantite lenerzi” oubyen pwisans ki Bondye Tou pwisan i annan. I kler ki lafors aktif Bondye i imans e nou legzistans i depan lo la.—Vwar bwat “Lespri sen an aksyon.”

Zeova i kapab servi son lespri sen lo en gran lesel parey i ti fer pour kree liniver. Me i kapab osi servi lespri sen an faver bann imen. I annan en kantite legzanp dan Labib ki montre ki lafors aktif Bondye i donn lafors son bann serviter.

“Lespri Senyer i lo mwan”

Minister Zezi i donn nou en lide enteresan an bref lo ki mannyer lespri sen Bondye i kapab donn lafors son bann serviter. Zezi ti dir avek bann zabitan Nazaret “Lespri Senyer i lo mwan.” (Lik 4:18) Ki Zezi ti akonplir par “pisans lespri sen.” (Lik 4:14) I ti geri tou sort kalite maladi, kalme tanpet e servi zis detrwa bar dipen ek pwason pour donn manze plizyer milye dimoun. I ti menm resisit dimoun mor. Zapot Pyer ti dekrir Zezi konman en “zonm ki Bondye ti swazir . . . par bann mirak, bann mervey ek bann siny ekstraordiner ki Bondye ti fer par li.”—Akt 2:22.

Dan nou letan dimoun nepli ganny pouvwar pour fer mirak par led lespri sen. Me kantmenm sa, i kapab fer bann keksoz merveye pour nou. Zis parey Zezi ti asir son bann disip, Zeova i volonterman donn son bann adorater son lespri sen. (Lik 11:13) Alor, zapot Pol ti kapab dir: “Mon kapab fer fas avek tou par [sa enn] ki donn mwan lafors.” (Filipyen 4:13) Eski lespri sen i kapab annan sa kalite lefe lo ou lavi? Sa lartik swivan pour abord sa size.

[Box/​Picture on page 5]

Akoz lespri sen pa en personnaz?

Labib i konpar lespri sen avek delo. Kan i ti pe promet pour donn son pep benediksyon a lavenir, Bondye ti dir: “Mon pou devers delo lo bann ki swaf, e en pti sours delo lo en landrwa sek. Mon pou devers mon lespri lo zot desandans, e mon benediksyon lo zot desandans.”—Izai 44:3.

Kan Bondye i devers son lespri lo son bann serviter, zot “ranpli avek Lespri sen.” Zezi, Zan Batis, Pyer, Pol, Barnabas ek bann disip ki ti rasanble ansanm zour Lapannkot lannen 33 N.L., zot tou zot ganny dekrir konman bann ki ti ranpli avek lespri sen.—Lik 1:15; 4:1; Akt 4:8; 9:17; 11:22, 24; 13:9.

Reflesir lo sa bann kestyon: Si lespri sen ti en personnaz eski nou ti pou kapab ‘devers’ li lo plizyer dimoun? Eski ou ti pou dir ki en dimoun i kapab ‘ranpli’ en group dimoun? Sa pa lozik. Labib i refer avek bann dimoun ki ranpli avek lasazes, konprenezon oubyen menm konnesans egzakt, me i pa zanmen dir ki en dimoun i ranpli avek en lot personnaz.—Egzod 28:3; 1 Lerwa 7:14; Lik 2:40; Kolosyen 1:9.

Sa mo “lespri sen” i sorti dan sa mo Grek ki ganny tradwir pneuʹma ki donn sa lide en pwisans envizib. Dapre Expository Dictionary of New Testament Words sa mo pneuʹma i “premyerman vedir divan . . . souf e espesyalman lespri ki parey divan i envizib, i napa okenn laform e i pwisan.”

I kler alor ki lespri sen pa en personnaz.a

[Not anba lo paz]