Les lespri diriz ou lavi e viv annakor avek ou dedikasyon
“Les Lespri diriz zot lavi, pa satisfer bann dezir natir imen.”—GAL. 5:16.
1. Ki sa de kalite batenm ki ti arive zour Lapannkot?
BANN disip Zezi ti kapab koz dan diferan langaz zour Lapannkot lannen 33 N.L., apre ki zot ti’n ganny batize avek lespri sen. Zot ti perform bann don mirakile ki lespri sen ti permet zot fer. (1 Kor. 12:4-10) Ki lefe sa don ki zot ti gannyen e sa diskour ki zapot Pyer ti fer ti annan? Bokou ti “trouble en kantite.” Parol Pyer ti pous zot pour repantir e batize. Sa resi istorik i dir: “Bokou parmi zot ti krwar dan sa mesaz e ti aksepte pour ganny batize, e anviron 3000 dimoun ti ganny azoute avek sa group krwayan.” (Akt 2:22, 36-41) Parey Zezi ti’n enstrir zot, sa bann disip ti devret ganny batize dan delo, o non di-Per, di-Fis e lespri sen.—Mat. 28:19.
2, 3. (a) Eksplik ladiferans ant ganny batize avek lespri sen e ganny batize o non lespri sen. (b) Akoz i enportan pour tou vre Kretyen ozordi ganny batize dan delo?
2 Par kont, eski i annan en diferans ant ganny batize avek lespri sen e ganny batize o non lespri sen? Wi. Sa bann ki ganny batize avek lespri sen, zot ne de nouvo konman bann garson Bondye ki’n ganny swazir par lespri sen. (Zan 3:3) Zot ganny swazir konman bann fitir lerwa ek pret dan Rwayonm Bondye ki dan lesyel e zot form par lekor spirityel Kris. (1 Kor. 12:13; Gal. 3:27; Rev. 20:6) Alor, ganny batize avek lespri sen ti sanmenm ki Zeova ti fer zour Lapannkot e osi apre, kan i swazir bann endividi ki pou dirize ansanm avek Kris. (Rom. 8:15-17) Me ki nou kapab dir lo sa batenm dan delo o non lespri sen ki ganny fer regilyerman dan bann lasanble ki pep Zeova i fer dan nou letan?
3 Batenm dan delo i en pa ki bann vre Kretyen i pran pour montre ki zot in dedye zot lavi avek Zeova avek tou zot leker. Sa i osi leka pour sa bann ki annan lespwar pour al dan lesyel. Me batenm dan delo i osi en pa neseser pour plizyer milyon zonm ek fanm dan nou letan ki annan sa lespwar aprezan pour viv pour touzour lo later. Nenport lespwar ki en dimoun i annan, ganny batize dan delo o non di-Per, di-Fis e Lespri sen i en pa neseser ki en dimoun i devret pran pour li ganny konsidere konman akseptab devan Bondye. Tou Kretyen ki ganny batize dan sa fason i devret “les Lespri diriz zot lavi.” (Lir Galat 5:16.) Eski ou pe les lespri sen diriz ou lavi e viv annakor avek ou dedikasyon?
Ki savedir “les Lespri diriz” nou
4. Ki savedir “les Lespri diriz” ou?
4 “Les Lespri diriz” nou i enplik les lespri sen azir lo nou oubyen enfliyans nou. Andotmo, nou devret les li gid nou dan tou sa ki nou fer tou le zour. Galat sapit 5 i montre ladiferans ant lenfliyans ki lespri sen i annan e osi lenfliyans ki nou laser i annan.—Lir Galat 5:17, 18.
5. Nou devret evite fer kwa si nou pe les lespri diriz nou?
5 Si ou pe les lespri sen diriz ou, ou pou fer bokou zefor pour anpes ou lekor ganny kontrole par bann aktivite natir imen. Sa bann aktivite i enplik “aksyon imoral, lenpirte, vis, ladorasyon zidol, siperstisyon, laenn, diskord, zalouzi, lakoler, egois, divizyon ant diferan parti opoze, groker, soulezon, parti bwar.” (Gal. 5:19-21) Dan en sans, “par Lespri, [nou] touy bann laksyon [nou] natir egois.” (Rom. 8:5, 13) I pou ede si ou kit ou lespri lo bann keksoz ki lespri sen i fer e korpere ler i gid ou, olye les ou ganny kontrole par ou bann dezir natir imen.
6. Donn legzanp pour montre kwa ki neseser pour demontre fri lespri.
6 Anmezir lespri sen i travay lo ou, ou pou demontre bann kalite ki Bondye i annan, andotmo “fri lespri.” (Gal. 5:22, 23) Toudmenm, ou konnen ki sa i enplik bokou zefor lo ou par. Annou pran en legzanp: En fermye i kiltiv later. Byensir, soley ek delo i neseser; akoz san sa bann eleman i pa ekspekte rekolte nanryen. Lespri sen i parey sa soley. I neseser pour nou kapab demontre fri lespri. Me, si sa fermye pa travay dir, kwa ki pou ganny akonplir? (Prov. 10:4) Alor, kantite ek kalite fri lespri ou devlope i depan lo lafason ou kiltiv sa later, setadir ou leker. Alor, demann ou lekor: ‘Eski mon pe les lespri sen prodwi son fri dan mwan, par korpere avek li?’
7. Akoz letid ek meditasyon i vreman enportan si ou anvi devlop fri lespri sen?
7 Pour ganny en bon rekolt, bann fermye i osi bezwen aroz zot plant. Pour devlop fri lespri, dan en sans senbolik ou pou bezwen aroz ou leker avek laverite ki sorti dan Labib, ki osi disponib atraver renyon kongregasyon ozordi. (Iza. 55:1) I tre probab ki ou’n dir bokou dimoun ki Lekritir Sen in ganny enspire par lespri sen. (2 Tim. 3:16) Deplis, lesklav fidel e pridan in donn bann leklersisman ki nou bezwen pour konpran sa laverite ki sorti dan Labib. (Mat. 24:45-47) I evidan ki, pour lespri sen diriz nou, fodre absoliman nou lir e medit lo Parol Bondye. Si ou pe fer sa, ou pe imit bon legzanp bann profet ki ti “fer bann resers ek bann lenvestigasyon” lo bann lenformasyon ki ti ganny donnen. I byen pour note ki menm bann lanz in demontre en gran lentere dan laverite ki dan Labib konsernan sa Desandans ki ti ganny promet e osi lo bann Kretyen swazir.—Lir 1 Pyer 1:10-12.
Konman lespri sen i diriz nou?
8. Akoz i vreman enportan pour ou demann Zeova son lespri sen?
8 I pa zis en zafer etidye Labib e medit lo la. Ou bezwen kontinyen demann Zeova son led ek gidans. I kapab “fer bokou plis ki nou demande ou ki [nou] menm mazinen.” (Efe. 3:20; Lik 11:13) Me ki larepons ou pou donnen, si en dimoun i demann ou: “Akoz mon bezwen kontinyen demande si Bondye i deza konn ‘sa ki mon bezwen avan menm ki mon demann li’?” (Mat. 6:8) Bon, en keksoz ou kapab asire se ki, si ou priye pour ganny lespri sen, savedir ou rekonnet ki ou depan lo Zeova. Par egzanp, si en dimoun i vin rod led avek ou, ou pou fer tou sa ki ou kapab pour ed li. En rezon pour sa i akoz i’n demann ou pour ed li, ki montre ki i annan konfyans dan ou. (Konpar Proverb 3:27.) Pareyman, Zeova i kontan ler ou demann li son lespri sen e i pou donn ou.—Prov. 15:8.
9. Konman ki asiste renyon i kapab ed ou ganny led lespri sen Bondye?
9 Ou osi kapab apresye sa lot fason kot nou les lespri sen diriz nou, e sa i enplik nou bann renyon ek diferan lasanble. I vreman enportan pour fer zefor pour la sa bann zour e port byen latansyon lo bann size. Si ou fer sa, sa pou ed ou pour pli byen konpran “bann keksoz profon Bondye.” (1 Kor. 2:10, NW) Ou osi benefisye kan ou fer bann komanter regilyerman. Reflesir en pe lo bann renyon ki ou’n asiste pandan sa kat dernyen semenn. Konbyen fwa ou’n lev ou lanmen, pare pour reponn pour eksprim ou lafwa? Eski ou bezwen fer plis progre dan sa domenn? Si wi, mazinen ki ou kapab fer pandan sa bann semenn ki pe vini. Zeova pou vwar ou lanvi pour partisipe e i pou donn ou son lespri sen ki pou ed ou pour aprann bokou plis dan bann renyon ki ou asiste.
10. Ki lenvitasyon nou pe ofer si nou les lespri sen diriz nou?
10 Les lespri diriz nou i osi enplik aksepte sa lenvitasyon ki nou lir dan Revelasyon 22:17: “Lespri avek Nouvel-Marye i dir: ‘Vini!’ Ki tou sa ki tande i dir: ‘Vini!’ Ki sa ki swaf i vini, e ki sa ki anvi, i pran delo lavi gratwitman!” Anba lenspirasyon lespri sen, bann Kretyen swazir ki form sa nouvel marye pe ofer sa lenvitasyon konsernan delo lavi. Si ou’n aksepte sa lenvitasyon pour “vini!,” eski ou determinen pour ou osi dir: “Vini!”? Pa i en gran privilez pour partisip dan sa travay ki sov lavi!
11, 12. Konman ki lespri sen i enplike dan sa travay predikasyon?
11 Sa travay vreman enportan pe ganny akonplir anba gidans lespri sen. Nou’n lir lo lafason ki lespri sen ti gid bann misyonner dan premye syek pour kapab travay dan bann nouvo teritwar. “Sent-Espri ti anpes [Pol ek son bann konpanyon] pres Laparol dan provens Lazi” e osi Bitini. Nou pa konnen egzakteman ki mannyer lespri sen ti anpes zot al sa bann landrwa, me pourtan i kler ki lespri sen ti gid Pol ver Lerop, sa gran teritwar. I ti ganny en vizyon kot i ti vwar en zonm Masedwann pe sipliy li pour ganny led.—Akt 16:6-10.
12 Pareyman ozordi, lespri sen Zeova pe diriz sa travay predikasyon ki pe ganny fer dan lemonn antye. Napa vizyon par mirak ki pe ganny servi pour donn gidans, me Zeova i gid bann Kretyen swazir atraver son lespri sen. Lespri sen i osi pous bann frer ek ser pour fer tou sa ki zot kapab pour prese e ansennyen. San dout, ou pe partisip dan sa travay enportan. Eski ou kapab ogmant ou lazwa dan sa travay eksitan?
13. Ki mannyer ou kapab soumet avek gidans lespri sen? Donn legzanp.
13 Ou kapab soumet avek gidans lespri sen par aplik sa lenformasyon ki pep Bondye i fourni. Egzamin legzanp Mihoko, en zenn fiy ki reste Zapon. Konman en nouvo pionye, i ti santi ki i pa ti kalifye pour fer bann retourn vizit; i ti santi ki i pa ti konnen konman pour koz dan en fason ki sa met lakour ti pou enterese. O menm moman, bann sizesyon pratik lo konman pour fer en retourn vizit kourt ti ganny pibliye dan Nou Minister Rwayonm. Apre sa, sa brosir A Satisfying Life—How to Attain It ti ganny pibliye. Sa brosir ti vreman efikas Zapon. Mihoko ti aplik sizesyon ki i ti gannyen lo konman pour servi sa brosir, sirtou lo konman pour fer en retourn vizit kourt. I pa ti pran bokou letan apre pour li konmans letid Labib avek sa bann ki petet oparavan ti pou’n refize etidye. I dir: “Mon’n ganny sitan kantite letid, en fwa mon’n ganny menm 12 en sel kou, e sa ti fer ki mon ti bezwen demann serten pour esper en pe letan avan kapab konmans letid avek zot!” I vre, si ou les lespri sen diriz ou e aplik gidans ki ou gannyen avek bann serviter Zeova, ou pou ganny bokou bon rezilta.
Depan lo lespri sen Bondye
14, 15. (a) Dan ki fason i posib pour bann imen enparfe viv annakor avek zot dedikasyon? (b) Konman ou kapab trouv bann bon zanmi?
14 Konman en minis sa bon nouvel, ou annan en minister pour akonplir. (Rom. 10:14) I kapab ki ou pa santi ou sitan kalifye pour annan en tel responsabilite. Me, parey i leka pour bann Kretyen swazir, Bondye ki’n donn ou sa responsabilite. (Lir 2 Korentyen 3:5.) Ou kapab viv annakor avek ou dedikasyon si ou fer tou sa ki ou kapab e depan lo lespri sen Bondye.
15 Toudmenm, i pa fasil pour nou bann imen enparfe viv annakor avek nou dedikasyon anver nou Bondye parfe. En difikilte ki kapab arive i ki serten ki ou ti frekante oparavan i kapab sirprann pour vwar ou viv en nouvo kalite lavi e i kapab arive ki zot ‘kritik ou.’ (1 Pyer 4:4) Me, pa oubliye ki pandan sa bann letan ou’n devlop bann bon lanmitye e sa enn pli enportan i sa enn ki ou annan avek Zeova ek Zezi Kri. (Lir Zak 2:21-23.) I vreman enportan osi pour konn bann frer ek ser dan ou kongregasyon, ki form par “tou lasosyasyon bann frer” dan lemonn antye. (1 Pyer 2:17, NW; Prov. 17:17) Atraver son lespri sen, Zeova pou ed ou annan bann zanmi ki pou kontinyen annan en bon lenfliyans lo ou.
16. Akoz, parey Pol, ou osi ou kapab “satisfe avek ou febles”?
16 Menm avek bann zanmi ki ed ou dan kongregasyon, petet ou pou kontinyen vwar li difisil pour fer fas avek bann difikilte tou le zour. Sa ki ou bezwen fer fas avek i kapab parfwa fer ou santi konmsi ou’n perdi, konmsi ou dan en gran trou ki ranpli avek problenm. Kan sa i arive, i lemoman pour ou tourn ver Zeova, demann li son lespri sen. Pol ti ekrir: “Ler mon feb, lanmenm ler ki mon for.” (Lir 2 Korentyen 4:7-10; 12:10.) Pol ti konnen ki lespri sen Bondye i kapab ed nou malgre nenport ki febles nou annan. Alor, nenport ki ler ou santi ou dekouraze ouswa bezwen led, lafors aktif Bondye i kapab donn ou lafors. Pol ti ekrir ki i ti “satisfe avek [son] febles,” akoz sirtou ler i ti feb, i ti santi led lespri sen. Ou osi ou kapab ganny menm santiman!—Rom. 15:13.
17. Ki mannyer lespri sen i kapab ed ou anmezir ou al ver ou destinasyon?
17 Nou bezwen lespri sen Bondye pour kapab viv annakor avek nou dedikasyon anver li. Fer krwar ou kaptenn en bato lavwal. Ou bi, se pour servi Zeova pour touzour. Lespri sen i parey sa divan ki ou anvi al ladan pour ki ou ariv ver ou destinasyon sen e sof. Ou pa anvi ganny soufle gos drwat avek lespri sa lemonn Satan. (1 Kor. 2:12) Ou annan zis pour ou idantifye sa bon divan e al ladan. Lespri sen i parey sa bon divan. Atraver Parol Bondye ek son lorganizasyon ki ganny dirize par lespri sen, lespri sen pou anmenn ou dan sa bon direksyon.
18. Ki ou determinasyon la konmela e akoz?
18 Si ou deza pe etidye Labib avek Temwen Zeova, ou kontan sa lasosyasyon spirityel avek zot, me ou pa ankor pran sa pa enportan pour dedye ou lavi avek Zeova e batize, demann ou lekor: ‘Pour ki rezon mon pe ezite?’ Si ou rekonnet rol lespri sen dan lakonplisman lavolonte Zeova ozordi e apresye led ki i ofer, alor, pran sa bann pa neseser ki ou’n aprann. Zeova pou beni ou en kantite. I pou donn ou son lespri sen avek gran ker. Si ou’n batize depi detrwa lannen oubyen plizyer dizenn lannen pase, sirman ou’n santi led lespri sen dan ou lavi. Ou’n vwar e santi ki Bondye i kapab ed ou avek son lespri sen. Sa i kapab kontinyen pour touzour a lavenir. Alor, reste determinen pour kontinyen les lespri diriz ou.
Eski ou rapel?
• Ki savedir “les Lespri diriz” ou?
• Kwa ki kapab ed ou pour kontinyen “les Lespri diriz” ou?
• Ki mannyer ou kapab viv annakor avek ou dedikasyon?
[Portre lo paz 17]
I demann zefor pour devlop ou kondisyon leker
[Portre lo paz 18]
Eski ou pe les lespri sen diriz ou?