Dirizan lemonn i ganny devwale

EN FWA Zezi ti dir bann dimoun: “Sef [sa] lemonn pou ganny zet deor.” Pli tar, i ti osi azoute ki ‘sa enn ki gouvern lemonn napa okenn pouvwar lo li’ e ki “sef lemonn in deza ganny kondannen.” (Zan 12:31; 14:30; 16:11) Lekel ki Zezi ti pe koz lo la?

Konsernan sa ki Zezi ti pe dir lo “sef [sa] lemonn,” i evidan ki i pa ti pe koz lo son Papa Zeova. Me, lekel alor ki “sef [sa] lemonn”? Ki mannyer i pou ganny “zet deor” e dan ki sans i’n ganny “kondannen”?

“Sef [sa] lemonn” i devwal son lekor

Zis parey en kriminel i souvan fer son vantar konsernan pouvwar ki i annan, Dyab osi ti fer parey ler i ti pe tant Zezi, Garson Bondye. Apre ki i ti’n montre Zezi “tou bann rwayonm” sa lemonn, Satan ti fer sa propozisyon avek li: “Mon a donn ou tou sa pouvwar ek laglwar sa bann rwayonm, akoz tousala in ganny livre avek mwan, e mwan, mon kapab donn nenport ki, ki mon oule. E par konsekan si ou ador mwan, tousala, a vin pour ou.”​—Lik 4:5-7.

Si Dyab ti selman sa ki mal dan nou, parey serten i dir, ki mannyer nou ti pou eksplik sa tantasyon? Eski Zezi ti pe ganny tante par en move panse ouswa eski i ti pe lalit avek lemal dan li zis apre son batenm? Si i ti le ka, eski nou kapab dir ki “dan li napa okenn pese”? (1 Zan 3:5) Zezi pa ti dir ki Dyab napa sa pouvwar lo limanite, o kontrer i ti konfirmen ki Dyab i “sa enn ki gouvern lemonn.” I ti dekrir li konman en “kriminel” e en “manter.”​—Zan 14:30; 8:44.

Apepre 60 an apre ki Dyab ti’n tant Kris, zapot Zan ti rapel bann Kretyen konsernan lenfliyans ki Dyab i annan an dizan ki “lemonn antye i dan pouvwar dyab.” Zan ti osi dir ki i sanmenm sa enn ki pe “tronp lemonn antye.” (1 Zan 5:19; Revelasyon 12:9) I kler ki Labib i koz lo en lespri envizib konman “sa enn ki gouvern lemonn.” Me, ki kantite lenfliyans i annan lo limanite?

Sef sa lemonn i donn lezot osi pouvwar

Pol ti klerman idantifye zot pli gran lennmi kan i ti pe ekrir konsernan sa lalit ki bann Kretyen i bezwen fer pour gard zot lafwa. I ti dir onnetman: “Nou pa pe lit kont dimoun, me kont bann pouvwar move lespri dan ler, bann lotorite, ek pouvwar dan lemonn teneb dan sa letan ki nou pe viv ladan.” (Efezyen 6:12) Alor, i pa en lalit ki zis antre bann imen, akoz “nou pa pe lit kont dimoun,” me plito nou pe lit “kont bann pouvwar move lespri.”

Dapre laplipar tradiksyon Labib modern, bann “pouvwar move lespri” dan sa verse pa pe refer avek sa ki mal dan nou, me plito avek bann move lanz pwisan. Serten versyon Labib i tradwir sa lekspresyon konman “bann move personnaz spirityel dan lesyel” (Revised Standard Version), “larme spirityel dan lesyel ki fer sa ki mal” (The Jerusalem Bible), “bann move lafors spirityel pwisan dan lesyel” (Bible en français courant). Alor, Dyab in servi son pouvwar atraver bann lanz rebel ki parey li menm, zot ti “abandonn zot prop demer” dan lesyel.​—Zid 6.

Dan Labib, liv profetik Danyel i dir ki mannyer sa bann “pouvwar dan lemonn” pe kontrol lemonn depi lontan. Vi ki i ti telman trakase pour bann Zwif ki ti’n retourn Zerizalenm sorti an egzil Babilonn lannen 537 Avan Nou Lepok, profet Danyel ti priy pour zot pandan trwa semenn. En lanz ki Bondye ti’n anvoye pour ankouraz sa profet ti dir li akoz i ti’n tarde arive. I ti dir: “Sa prens dan rwayonm Pers ti pe opoz mwan pandan venteen zour.”​—Danyel 10:2, 13.

Lekel sa ‘prens Pers’? I evidan ki sa lanz pa ti pe koz lo Siris, lerwa Pers akoz sa letan, Danyel ek son pep ti’n ganny son faver. Deplis, ki mannyer en senp lerwa imen ti kapab opoz en lanz pandan trwa semenn kan zis dan en lannwit en sel lanz ti touy 185,000 gerye pwisan? (Izai 37:36) Sa ‘prens Pers’ ki ti opoz lanz Bondye ti bezwen en reprezantan Dyab, setadir en demon ki ti’n ganny pouvwar pour kontrol Lanpir Pers. Pli tar dan sa resi, lanz Bondye ti dir ki i ti pou bezwen ankor enn fwa lager avek “prens Pers” e avek en lot demon, “prens Lagres.”​—Danyel 10:20.

Ki nou kapab aprann atraver sa? Senpleman ki i annan bann personnaz envizib ki pe diriz lemonn, setadir bann prens oubyen demon ki pe kontrol sa lemonn anba lotorite zot sef Satan. Me ki zot lobzektif ziska aprezan?

Sa dirizan lemonn i montre sa ki i vreman ete

Dan Revelasyon, dernyen liv Labib, zapot Zan i rakonte ki mannyer Zezi, Misel arkanz, ti defet Dyab ek son bann demon. I osi koz lo bann move konsekans ki ti pou arive lefet ki Dyab ek son bann demon in ganny pouse dan lesyel. Nou lir: “Maler, later . . . parski dyab in desann kot zot avek en gran lakoler, akoz i konnen ki i reste li ankor zis en pti pe letan.”​—Revelasyon 12:9, 12.

Ki mannyer Dyab in demontre son lakoler? Zis parey bokou kriminel ki pare pour fer nenport kwa pour ‘dirize si non touye.’ Dyab ek son bann demon osi i determinen pour detrir sa later ek son bann zabitan. Vi ki i konnen ki i pa reste li bokou letan, Dyab i servi enn bann eleman enportan dan lasosyete imen ki anba son kontrol e sa i bann gro biznes. I servi zot pour promouvwar en leta lespri kot dimoun i mazin zis aste e servi en kantite keksoz. Finalman, sa in annan en lefe negatif lo bann resours natirel e andomaz lanvironnman dan lemonn antye e menas legzistans limanite.​—Revelasyon 11:18; 18:11-17.

Depi konmansman listwar imen, Dyab in montre atraver politik ek larelizyon ki i swaf pouvwar. Liv Revelasyon i dekrir bann pouvwar politik konman bann bebet sovaz ki Dyab in donn “en gran pouvwar.” I osi dekrir sa relasyon imoral ki egziste ant politik ek larelizyon konman en adilter spirityel ki degoutan. (Revelasyon 13:2; 17:1, 2) Zis mazin sa labi, lesklavaz, lager ek bann konfli ant diferan group etnik kot plizyer milyon dimoun in perdi zot lavi diran plizyer syek. Eski nou kapab dir onnetman ki tou sa bann levennman sokan e kriyel ki’n mark listwar imen i bann keksoz normal? Oubyen eski se bann move lespri envizib ki par deryer tou sa la?

Labib i klerman idantifye e devwal sa enn ki pe manipil bann sef lemonn ek pouvwar mondyal. Ki swa zot konsyan oubyen non, bann imen an zeneral i reflekte personnalite ek mantalite zot dirizan, setadir zot oule ‘dirize si non touye.’ Me pour konbyen letan ankor limanite pou bezwen soufer anba dominasyon Dyab?

Byento Dyab pou rann son dernyen souf

Sa ki Kris ti fer ler i ti lo later dan premye syek i montre ki Dyab avek son bann demon pou ganny detrir byento. Ler bann disip Zezi ti rakont li konman ki zot ti’n sas bann demon, i ti dir zot: “Mon ti war Satan sap dan lesyel, tonbe parey zekler.” (Lik 10:18) Ler Zezi ti dir sa parol, i ti dan lazwa akoz laviktwar ki i ti pou gannyen a lavenir lo sef sa lemonn ler i ti pou retourn dan lesyel konman Misel Arkanz. (Revelasyon 12:7-9) En letid o profon lo Labib i montre ki Zezi ti ganny sa laviktwar dan lesyel an 1914 oubyen zis apre.a

Depi sa, Dyab i konnen ki i pa reste bokou letan pour li ganny detrir. Menm si ‘lemonn antye i dan pouvwar dyab,’ plizyer milyon dimoun ozordi pa’n ganny anbete par tou sa ki i’n esey fer pour kontrol zot. Labib in ed zot pour idantifye li ek son bann lentansyon. (2 Korentyen 2:11) Atraver parol zapot Pol pour bann Kretyen, nou annan sa lespwar: “Bondye, ki donn lape, i a byento kraz Satan anba zot lipye.”b​—Romen 16:20.

Byento, Dyab pou rann son dernyen souf! Anba bon dominasyon Kris, later pou ganny transformen dan en paradi par bann dimoun drwat. Vyolans, laenn e vorasite pou disparet pour touzour. Labib i dir: “Bann keksoz dan lepase pa pou vin dan nou lespri.” (Izai 65:17) Pa i pou en gran soulazman pour bann ki reisi sorti anba lotorite sa enn ki pe diriz lemonn ansousekre!

[Not anba lo paz]

[Ekstre lo paz 9]

Anba bon dominasyon Kris, later pou ganny transformen dan en paradi par bann dimoun drwat