Eski mirak i vreman arive? Trwa lobzeksyon

LOBZEKSYON 1: Mirak pa arive akoz i kont lalwa lanatir. Nou konprenezon lo lalwa lanatir i baze lo lobzervasyon ki syantis i fer lo sa ki pe arive dan lanatir tout otour nou. Sepandan, nou kapab konpar sa bann lalwa avek lareg gramer en langaz ki defwa i annan bann leksepsyon. Alor, nou konprenezon lo lalwa lanatir i kapab vreman limite. (Zob 38:4) En syantis in kapab pas tou son lavi pour etidye en lalwa spesifik dan lanatir. Me zis en leksepsyon dan sa lalwa i sifi pour fer li reevalye son konprenezon lo sa lalwa. I zis parey sa dikton ki dir: “Zis en zwa nwanr i prouve ki pa tou zwa ki blan.”

John Locke (1632-1704) i rakont en zistwar fer riye ki montre ki i fasil pour baz nou lopinyon lo bann lenformasyon ki pa konplet. Sa zistwar i baze lo en anbasader sorti Pei Ba ek lerwa Siam. Pandan ki sa anbasader ti pe dekrir son pei avek lerwa, i ti mansyonnen ki parfwa i ti posib pour en lelefan mars lo delo. Lerwa pa ti oule krwar. I ti panse ki sa anbasader ti pe koz manti avek li. Me, sa anbasader ti pe zis dekrir en keksoz ki lerwa pa ti’n zanmen trouve avek son de lizye. Lerwa pa ti realize ki kan delo i vin ays, en lelefan i kapab mars lo la. Sa ti paret enposib pour sa lerwa krwar akoz i ti napa tou lenformasyon.

Annou vwar serten devlopman dan nou letan ki detrwa dizenn lannen pase ti pou paret enposib:

● En avyon i kapab anmenn plis ki 800 pasaze sorti New York pour al Sengapour san arete a en vites 900 kilomet par erdtan.

● Dimoun lo diferan kontinan i kapab fer en konferans atraver video kot zot kapab koz avek kanmarad fas a fas.

● Plizyer mil sanson i kapab ganny mete lo en pti zafer ki pli pti ki en bwat zalimet.

● Bann dokter i kapab ranplas leker oubyen lezot lorgann en dimoun.

Ki konklizyon nou kapab tire atraver sa bann lenformasyon? Nou kapab tir sa konklizyon lozik: Si en imen i kapab fer bann devlopman remarkab ki ti paret enposib zis detrwa lannen pase, alor sirman Bondye, sa Enn ki’n kre liniver ek tou sa ki ladan i kapab fer bann keksoz pli enpresyonan ki pour lemoman nou pa ankor byen konpran oubyen kapab fer parey.a​—Zenez 18:14; Matye 19:26.

LOBZEKSYON 2: Dan Labib mirak ti ganny fer pour ki dimoun i krwar. Labib pa demann nou pour krwar dan tou mirak. Anfet, i fer tou le kontrer. Labib i averti nou pour fer byen atansyon kot i konsern met konfyans dan bann mirak ek siny ekstraordiner. Remark sa lavertisman kler: “Kan sa mesan pou vini i pou fer tou par pisans Satan; i pou fer tou sort mirak ek bann trik pour tronp dimoun.”​—2 Tesalonisyen 2:9, 10.

Zezi Kri osi ti averti ki i ti pou annan bokou dimoun ki ti pou dir ki zot son bann disip me ki an realite, zot pa ti pou son bann vre disip. Serten ti pou menm dir li: “Senyer, Senyer! an ou non nou’n profetize, an ou non, nou’n sas en kantite demon e an ou non, nou’n fer en kantite mirak.” (Matye 7:22) Me Zezi ti dir ki i pa pou aksepte sa bann dimoun konman son disip. (Matye 7:23) I evidan alor ki Zezi pa ti ansennyen ki tou mirak i sorti kot Bondye.

Bondye pa dir ki son bann fidel ti pou baz zot lafwa zis lo mirak. O kontrer, i dir ki zot lafwa i bezwen solidman baze lo lenformasyon ki vre.​—Ebre 11:1.

Annou vwar en mirak ki bokou dimoun i konnen ki’n ganny rikorde dan Labib. Sa i rezireksyon Zezi Kri. Plizyer lannen apre ki sa ti arive, serten Kretyen dan lavil Korent ti konmans doute si Zezi ti’n resisite. Ki mannyer zapot Pol ti ed sa bann Kretyen? Eski i ti zis dir zot: “Zot devret annan plis lafwa”? Non. Remarke ki mannyer i ti rapel zot serten fe. I ti dir ki Zezi “ti ganny antere e i ti resisite son trwazyenm zour dapre Lekritir, i ti aparet avek Pyer e apre avek son douz zapot. Answit i ti aparet avek plis ki 500 son bann disip ansanm, laplipar i ankor vivan.”​—1 Korentyen 15:4-8.

Eski i ti enportan si sa bann Kretyen ti krwar dan sa mirak? Pol ti kontinyen eksplike: “Si Kris pa’n resisite, sa ki nou prese i anven e zot lafwa osi i anven.” (1 Korentyen 15:14) Pol pa ti pran sa size alalezer. Sa mirak konsernan rezireksyon Zezi ti swa vre oubyen fo! Pol ti konnen ki sa ti vre akoz i ti annan plizyer santenn temwen ki ti ankor vivan dan son letan. Anfet, sa bann temwen ti pare pour mor dan plas demanti ki sa ti’n arive.​—1 Korentyen 15:17-19.

LOBZEKSYON 3: Mirak i en fenomenn natirel ki bann dimoun ki pa edike pa byen konpran. Serten spesyalis Labib i dir ki bann mirak ki’n ganny rikorde dan Labib i bann fenomenn natirel e ki zot napa nanryen pour fer avek Bondye. Zot panse ki sa i fer bann levennman ki Labib i dekrir, pli fasil pour krwar. I vre ki i’n annan serten fenomenn natirel ki asosye avek serten sa bann mirak, par egzanp tranblemandter, lepidemi ek lavalas. Me i annan en pwen an komen avek sa bann fenomenn. Zot pa pran kont sa moman ki sa mirak ti arive parey Lekritir i eksplike.

Par egzanp, serten dimoun i dir ki sa premye fleo lo Lezip, setadir kan Larivyer Nil ti vin disan, delo pa ti vreman vin disan, o kontrer i ti later rouz ki ti’n ganny balye dan sa larivyer ansanm avek bann bakteri rouz. Par kont, sa resi Labib i dir ki sa larivyer ti vin disan, pa en labou rouz. Egzod 7:14-21 i montre ki sa mirak ti arive o moman ki Moiz ti tap Larivyer Nil avek son baton. Menm si i ti en fenomenn natirel ki ti’n fer larivyer sanze, dek ki Moiz ti tap sa larivyer sa delo ti vin rouz e sa ti en mirak dan li menm!

En lot legzanp pour montre ki sa moman ki en mirak i arive i enportan i sa ki ti arive kan pep Izrael ti pros pour antre dan Later Promiz. Larivyer Zourden ti’n deborde e sa ti blok zot semen. Sa resi Labib i dir nou sa ki ti arive apre: “O moman ki sa ki ti pe anmenn Lars ti ariv kot larivyer Zourden e lipye bann pret ki ti pe anmenn Lars ti’n tranp dan delo . . . , delo ki ti pe desann ti arete. I ti vin parey en danm byen lwen ziska Adan.” (Zozye 3:15, 16) Eski sa ti rezilta en tranblemandter oubyen lavalas? Sa resi pa dir. Me moman ki sa levennman ti arive i mirakile. I ti ariv egzakteman sa moman ki Zeova ti dir i pou arive.​—Zozye 3:7, 8, 13.

Alor, eski mirak i vreman arive? Labib i dir wi, i arive. Dapre sa ki i dir nou, mirak i plis ki zis bann fenomenn natirel. Alor, eski i lozik pour dir ki i enposib pour zot arive zis akoz zot pa ariv tou le zour?

[Not anba lo paz]