Eski ou kapab krwar dan bann mirak ki’n ganny rikorde dan Labib?
POUR ou krwar dan en zistwar enkrwayab, pa i ti pou bezwen ganny rakonte par en dimoun ki diny konfyans? I pa ti pou depan zis lo si i’n rakont ou sa zistwar dan en fason konvenkan. I ti pou bezwen en dimoun ki abitye koz laverite. Apre tou, si i abitye koz laverite avek ou e i pa’n zanmen koz manti par ekspre, pa ou ti pou annan bon rezon pour krwar son zistwar enkrwayab?
I parey avek bann mirak ki dan Labib. Napa enn ant nou ki ti vivan kan sa bann levennman ti arive. Me nou kapab konnen si sa bann zistwar i vre. Ki mannyer? La serten fakter ki fer nou annan konfyans ki bann mirak ki Labib in rikorde ti vreman arive:
Bokou mirak ti ganny fer dan bann landrwa piblik. Parfwa, i ti annan plizyer mil e menm kekfwa plizyer milyon dimoun ki ti temwen sa bann mirak. (Egzod 14:21-31; 19:16-19) Zot pa ti ganny fer an sekre kot manm piblik pa ti vwar.
Sa bann mirak ti senp. I ti napa okenn lefe spesyal oubyen trik avek lalimyer. Laplipar mirak ki ganny rikorde dan Labib ti ganny fer san planifye e i ti bann endividi ki ti demande ki sa bann mirak i ganny fer. (Mark 5:25-29; Lik 7:11-16) Dan bann ka koumsa, i ti pou enposib pour sa dimoun ki ti fer sa mirak plàn sa levennman.
Motivasyon bann ki ti fer mirak pa ti pour zot ganny popilarite, laglwar ek larises. O kontrer, zot ti fer li pour rann glwar Bondye. (Zan 11:1-4, 15, 40) Bondye ti kondann okenn dimoun ki ti anvi ganny larises atraver mirak.—2 Lerwa 5:15, 16, 20, 25-27; Akt 8:18-23.
I ti enposib pour en imen fer sa bann mirak ki’n ganny rikorde dan Labib akoz i ti annan diferan kalite. Par egzanp, lanmer ek divan ti ganny kalmi, delo ti vin diven, lapli ti aret e rekonmans tonbe, bann dimoun malad ti ganny geri e bann dimoun ki ti ne aveg ti vwar kler apre. Tou sa bann mirak ek plizyer lezot ankor i montre ki i ti bezwen annan en lafors plis ki ordiner par deryer zot. En lafors ki kapab kontrol tou form kreasyon.—1 Lerwa 17:1-7; 18:41-45; Matye 8:24-27; Lik 17:11-19; Zan 2:1-11; 9:1-7.
Bann opozan relizye ki ti vwar sa bann mirak arive pa ti demanti ki zot ti arive. Kan Zezi ti resisit son zanmi Lazar, son bann lennmi pa ti kestyonnen si Lazar ti’n vreman mor. Zot pa ti pou kapab fer sa akoz Lazar ti’n ganny antere depi kat zour. (Zan 11:45-48; 12:9-11) Menm plizyer syek apre lanmor Zezi, bann ekriven Talmud, en liv Zwif, ti ankor pe dir ki Zezi ti annan pouvwar pour fer mirak. Zot ti zis kestyonn sours son pouvwar. Pareyman, kan bann disip Zezi ti ganny anmennen devan lakour Zwif, zot pa ti ganny demande si zot ti’n vreman fer en mirak. Zot ti plito ganny demande: “Par ki pouvwar ou par ki non ki zot in fer sa gerizon?”—Akt 4:1-13.
Alor, eski ou kapab krwar sa ki Labib i dir nou lo mirak? Dan sa ki nou’n fek vwar, i kler ki nou kapab annan konfyans ki bann resi Labib lo mirak i vre. I annan lezot rezon pour krwar dan sa bann resi Labib. Par egzanp, kan Labib i koz lo en levennman, i souvan mansyonn ler, landrwa ek non sa bann dimoun ki ti enplike. Menm bann dimoun ki kritik Labib in enpresyonnen avek bann detay egzakt dan Labib konsernan bann levennman ki’n pase. Plizyer santenn profesi Labib in ganny akonplir dan tou pti detay. Deplis, dan Labib i annan bokou konsey lo konman nou kapab annan en bon relasyon avek kanmarad. Sa bann konsey in ed bann dimoun diferan laz e ki sorti dan diferan ran sosyal. I napa en lot landrwa kot nou kapab ganny bann pli bon konsey konsernan relasyon imen.
Si ou pa ankor devlop konfyans total dan Labib, akoz ou pa pran en pe letan pour egzamin li pli byen? Pli ou pou fer sa, ou pou annan plis konfyans dan sa ki i dir. (Zan 17:17) Ou pou realize ki ou kapab krwar ki sa bann mirak ki’n ganny rikorde ladan ti vreman arive. Sa pou donn ou en bon rezon pour annan konfyans dan sa ki Labib i dir pou arive tre byento.
[Portre lo paz 5]
Bann lennmi Zezi pa ti demanti ki Lazar ti’n mor