Ki mannyer nou kapab ed bann dimoun ki pa relizye pour aprann konn Bondye?

1. Dan bann dernyen lannen, ki sanzman in arive dan serten landrwa?

POUR plizyer milye lannen, laplipar dimoun dan lemonn ti annan en larelizyon. Me dan sa bann dernyen lannen, en gro sanzman in arive. Pli ale bokou plis dimoun i dir ki zot pa relizye. Anfet, dan serten pei, laplipar dimoun i dir ki zot pa relizye.b​—Mat. 24:12.

2. Akoz bokou dimoun pa relizye?

² Akoz pli ale dimoun i dir ki zot pa relizye?c Pour serten, i kapab ki bann plezir oubyen traka lavi in vin pli enportan ki Bondye. (Lik 8:14) Serten i nepli krwar dan Bondye. Lezot i krwar dan Bondye, me zot krwar ki larelizyon nepli kapab ed nou, ki i pa annakor avek lasyans e ki i pa fer sans. Petet zot in tann zot zanmi ek ansenyan dir ki lavi in konmans par evolisyon e zot in menm tann sa dan medya. Me pa souvan ki zot tann bann bon rezon pour krwar dan Bondye. Lezot in degout larelizyon akoz zot vwar bann sef relizye ki zis anvi ganny plis larzan ek pouvwar. Osi, dan serten landrwa, gouvernman in pas bann lalwa ki anpes dimoun ador Bondye.

3. Ki nou pou vwar dan sa lartik?

³ Zezi in donn nou lord pour “al kot bann dimoun dan tou nasyon e fer zot vin [son] disip.” (Mat. 28:19) Ki mannyer nou kapab ed bann dimoun ki pa relizye pour aprann kontan Bondye e vin disip Kris? Nou bezwen realize ki landrwa kot en dimoun in grandi i kapab annan en lefe lo lafason ki i reazir anver nou mesaz. Par egzanp, i kapab ki bann dimoun ki’n grandi Lerop pa pou reakte dan menm fason avek bann dimoun ki sorti Lazi. Akoz? Dan bann pei Lerop, bokou dimoun in tann koz lo Labib e zot in tann dir ki Bondye ki’n kree tou keksoz. Me dan bann pei Lazi, laplipar dimoun pa konn preski nanryen lo Labib e petet zot pa krwar dan en Kreater. Dan sa lartik, nou pou vwar ki mannyer nou kapab ed tou dimoun ki nou zwenn pour aprann konn Bondye, nenport ki landrwa zot sorti.

RESTE POZITIF

4. Akoz nou kapab annan en pwennvi pozitif?

⁴ Annan en pwennvi pozitif. Tou le-z-an i annan bann dimoun ki pa ti relizye ki vin Temwen Zeova. Bokou parmi zot ti deza annan bann bon standar moral e zot ti vwar lipokrizi dan bann larelizyon konman en keksoz degoutan. Lezot ti napa bann bon standar moral e bokou parmi zot ti annan bann move labitid ki zot ti bezwen sanze. Avek led Zeova, nou kapab asire ki nou pou zwenn bann dimoun ki “annan sa bon kondisyon leker pour ganny lavi eternel.”​—Akt 13:48; 1 Tim. 2:3, 4.

5. Souvandfwa, kwa ki fer dimoun ekout nou mesaz?

⁵ Demontre labonte e vey byen mannyer ou koze. Souvandfwa, dimoun i ekout nou, pa akoz parol ki nou dir me par lafason ki nou koze. Zot kontan ler nou demontre labonte anver zot, ler nou vey byen nou mannyer koze e ler nou demontre lentere senser dan zot. Nou pa fors zot pour ekout nou. O kontrer, nou esey konpran akoz zot santi koumsa konsernan larelizyon. Par egzanp, serten dimoun pa kontan koz lo larelizyon avek en dimoun ki zot pa konnen. Lezot i krwar ki i malelve pour demann en dimoun son pwennvi lo Bondye. Tandis ki lezot i santi zot anbarase ler dimoun i vwar zot pe lir Labib, sirtou avek en Temwen Zeova. Nenport ki rezon sa dimoun i annan, nou esey konpran son santiman.​—2 Tim. 2:24, not.

6. Ki mannyer zapot Pol ti sanz son fason koze e ki mannyer nou kapab swiv son legzanp?

⁶ Ki nou kapab fer si nou ganny lenpresyon ki en dimoun pa tro kontan ler nou servi bann mo parey “Labib,” “Kreater,” “Bondye” oubyen “larelizyon”? Nou kapab swiv legzanp zapot Pol e sanz nou fason koze. Ler Pol ti pe koz avek bann Zwif, i ti rezonn avek zot lo Lekritir. Par kont, ler Pol ti Lareopaz, i ti rezonn avek bann filozof Grek san dir ki i ti pe koz lo Labib. (Akt 17:2, 3, 22-31) Ki mannyer nou kapab swiv legzanp Pol? Si ou zwenn en dimoun ki pa krwar ki Labib i Parol Bondye, petet i ti a pli byen ki ou pa refer direkteman avek Labib ler ou pe koz avek li. Si ou remarke ki en dimoun pa kontan ki lezot i vwar li pe lir Labib avek ou, esey montre li bann verse Labib dan en fason ki dimoun pa pou remarke, petet lo en lekipman elektronik.

7. Ki nou bezwen fer pour swiv legzanp zapot Pol ki ganny dekrir dan 1 Korentyen 9:20-23?

⁷ Esey konpran e ekout zot. Nou bezwen fer zefor pour konpran akoz bann dimoun ki dir ki zot pa relizye i santi koumsa. (Prov. 20:5, NWT) Ankor enn fwa, annou vwar legzanp zapot Pol. I ti grandi parmi bann Zwif. Alor, i ti bezwen sanz son fason koze ler i ti pres avek bann non Zwif, parski zot pa ti konn preski nanryen lo Zeova ek Lekritir. Petet nou osi nou pou bezwen fer en pe resers oubyen koz avek bann proklanmater dan kongregasyon ki konnen ki mannyer pour pres avek bann dimoun ki pa relizye. Sa pou ed nou pou pli byen konpran santiman ek fason panse bann dimoun dan teritwar.​—Lir 1 Korentyen 9:20-23.

8. Ki en fason nou kapab konmans en konversasyon lo Labib?

⁸ Zezi in donn nou lord pour rod bann ki “merite.” (Mat. 10:11) Pour atenn sa lobzektif, nou bezwen demann dimoun zot lopinyon e apre nou bezwen ekout zot byen. En frer Langleter i kontan demann dimoun zot lopinyon lo kwa ki kapab ed en koup annan en bon lavi maryaz, kwa ki kapab ed bann paran elve zot zanfan oubyen kwa ki kapab ed nou fer fas avek lenzistis. Apre ki i’n ekout zot byen, i dir, “Ki ou panse lo sa konsey ki’n ganny ekrir preski 2,000 an pase?” Apre, san mansyonn Labib, i servi son telefonn pour montre zot en verse ki al avek sa topik.

ED BANN DIMOUN KI PA RELIZYE POUR APRANN KONN BONDYE

9. Ki mannyer nou kapab ed bann dimoun ki tant pour evite koz lo Bondye?

⁹ Ki mannyer nou kapab ed bann dimoun ki tant pour evite koz lo Bondye? Nou kapab koz avek zot lo en keksoz ki enteres zot. Par egzanp, bokou dimoun i admir lanatir. Alor nou kapab dir: “Petet ou’n deza tande ki en kantite keksoz ki bann syantis in envante i akoz zot in kopye en keksoz ki deza egziste dan lanatir. Par egzanp, bann dimoun ki fer mikro ek kamera, i etidye zorey ek lizye bann zensek. Ki ou panse? Avek ki bann syantis pe aprann ler zot etidye lo bann keksoz parey zorey ek lizye?” Apre ki ou’n ekout zot byen, ou kapab dir: “Mon’n vwar en keksoz ki en poet ti ekri dan lepase vreman enteresan. Sa poet ti dir: ‘Eski sa enn ki’n fer zorey pa antann? Eski sa enn ki’n fer lizye pa war kler? . . . Pa li menm ki donn zonm konnesans.’ Serten syantis i dakor avek sa parol e zot krwar ki i annan en Kreater.” (Ps. 94:9, 10) Apre sa, nou kapab montre li en lartik lo jw.org^®. (Al lo Lo Labib > Lasyans ek Labib.) Oubyen nou kapab donn zot enn ant sa de brosir, Was Life Created? oubyen The Origin of Life​—Five Questions Worth Asking.

10. Ki mannyer nou kapab konmans en konversasyon avek en dimoun ki pa anvi koz lo Bondye?

¹⁰ Laplipar dimoun ti a kontan en pli bon lavenir. Par kont, bokou i per ki later pou ganny detrir oubyen ki avek letan i pou nepli annan bann keksoz ki imen i bezwen pour sirviv lo later. En sirveyan rezyonal Lanorvez i dir ki souvan dimoun ki pa oule koz lo Bondye i pare pour koz lo sa ki pe arive dan lemonn. Apre ki i’n dir bonzour, i demann zot: “Eski ou krwar ki keksoz pou amelyore en zour? Lekel ki ou krwar pou kapab anmenn sanzman? Bann politisyen, syantis oubyen en lot personnaz?” Apre ki i’n ekout zot, i sit oubyen lir en verse Labib ki montre ki nou pou annan en pli bon lavenir. Serten dimoun i anvi aprann plis ler zot vwar ki Labib in promet ki later pa pou ganny detrir e ki bann bon dimoun pou kapab reste lo later pour touzour.​—Ps. 37:29, NWT; Ekle. 1:4.

11. Akoz nou pa devret servi menm prezantasyon e ki mannyer nou kapab swiv legzanp zapot Pol ki ganny dekrir dan Romen 1:14-16?

¹¹ Nou pa devret servi menm prezantasyon avek tou dimoun ki nou zwenn. Akoz? Parski tou dimoun i diferan. Sa ki atir en dimoun ver laverite, i kapab fer en lot dimoun pa anvi ekoute. Serten i pare pour koz lo Bondye oubyen lo Labib, tandis ki pour lezot i pli bon pour koz avek zot lo en lot keksoz avan. Dan nenport ki sityasyon, nou devret sezi loportinite pour koz avek tou sort kalite dimoun. (Lir Romen 1:14-16.) Byensir, nou gard antet ki Zeova i sa Enn ki fer pouse laverite dan leker bann ki kontan sa ki byen.​—1 Kor. 3:6, 7.

KI MANNYER NOU KAPAB ANONS LAVERITE AVEK DIMOUN SORTI LAZI?

12. Ki nou kapab fer pour ed bann dimoun sorti Lazi ki pa’n zanmen reflesi lo si i annan en Kreater?

¹² En kantite proklanmater partou dan lemonn pe zwenn dimoun sorti dan bann pei Lazi, enkli serten ki sorti dan bann landrwa kot gouvernman in pas bann lalwa ki anpes dimoun ador Bondye. Dan plizyer pei Lazi, bokou dimoun pa’n zanmen reflesi lo si i annan en Kreater oubyen non. Serten dimoun i kontan aprann bann nouvo keksoz, alor zot aksepte ler zot ganny ofer en letid Labib, me lezot pa enterese pour aprann nouvo keksoz. Ki nou kapab fer pour ed zot? Bann proklanmater eksperyanse in vwar ki i bon pour konmans avek en senp pti konversasyon, pour demontre lentere personnel dan sa dimoun e ler i apropriye, zot rakonte ki mannyer zot lavi in sanze ler zot in aplik en prensip Labib spesifik.

13. Kwa ki kapab ed dimoun pour anvi aprann plis lo Labib? (Vwar portre lo kouvertir.)

¹³ En kantite dimoun i ganny atire ver laverite ler zot aprann ki Labib i kapab ed zot dan zot lavi toulezour. (Ekle. 7:12) En ser New York ki pres avek bann Sinwan ki koz langaz Mandarin, i dir: “Mon esey demontre lentere dan bann dimoun e ekout zot. Si zot dir mwan ki zot fek vin reste isi, mon demann zot: ‘Ki mannyer ou pe adapte isi? Eski ou’n ganny en travay? Eski bann dimoun isi pe tret ou byen?’” Parfwa sa i ed li pour entrodwi en topik Labib. Kan i apropriye, sa ser i dir: “Dapre ou, kwa ki kapab ed nou pou annan en bon relasyon avek lezot? Eski mon kapab montre ou en proverb dan Labib? Sa proverb i dir: ‘Sa enn ki konmans en dispit, pe provok en linondasyon. Alor, arete avan ki bagar i konmanse.’ Eski ou krwar sa konsey i kapab ed nou pour annan en bon relasyon avek lezot?” (Prov. 17:14) Ler nou esey fer bann konversasyon parey sa ser, sa i kapab ed nou konnen lekel ki ti pou kontan aprann plis.

14. Ki mannyer en frer Lazi i ed dimoun ki dir zot pa krwar dan Bondye?

¹⁴ Ki nou kapab fer ler en dimoun i dir nou ki i pa krwar dan Bondye? En frer Lazi ki’n pas plizyer lannen pe pres avek bann dimoun ki pa relizye, i dir: “Normalman, ler en dimoun isi i dir, ‘Mon pa krwar dan Bondye,’ i pe dir ki i pa krwar dan bann bondye ki laplipar dimoun dan sa landrwa i adore. Alor laplipar ditan mon dir zot ki mon dakor ki laplipar bondye in ganny envante par imen e ki zot pa vre. Souvan mon montre zot Zeremi 16:20 ki dir: ‘Eski zonm i kapab fer son bann bondye, alor ki li menm i pa en vre bondye?’ Apre mon demann zot: ‘Ki mannyer nou kapab konnen ki bondye ki vre e ki bondye ki’n ganny envante?’ Mon ekout zot byen e apre mon lir Izai 41:23 ki dir: ‘Dir nou sa ki pou arive apre; konmsa, nou ava konnen ki zot en bann bondye.’ Apre, mon montre zot en legzanp lo ki mannyer Zeova in predir lavenir.”

15. Ki nou kapab aprann avek legzanp en frer Les Lazi?

¹⁵ Annou vwar ki mannyer en frer Les Lazi i fer son bann retourn vizit. I dir: “Mon montre zot ki mannyer bann prensip Labib i kapab ed nou dan nou lavi toulezour, nou diskit lo bann profesi Labib ki’n ganny akonplir e lo bann lalwa ki kontrol liniver. Apre, mon montre zot ki tousala i prouve ki i annan en Kreater vivan e saz. Ler en dimoun i konmans mazinen ki petet en Bondye i egziste, mon konmans montre li sa ki Labib i dir lo Zeova.”

16. Dapre Ebre 11:6, akoz bann etidyan Labib i bezwen annan lafwa dan Bondye ek Labib? Ki mannyer nou kapab ed zot pour devlop sa lafwa?

¹⁶ Kan nou fer letid Labib avek bann dimoun ki’n grandi dan en fanmir ki pa relizye, nou bezwen kontinyen ed zot ranforsi zot lafwa ki Bondye i egziste. (Lir Ebre 11:6.) Nou osi bezwen ed zot pour krwar dan sa ki Labib i dir. Pour fer sa, petet nou pou bezwen diskit lo menm keksoz plizyer fwa. Sak fwa ki nou fer zot letid, petet nou pou bezwen diskit lo bann levidans ki prouve ki Labib i Parol Bondye. Par egzanp, nou kapab pran detrwa minit pour koz lo en profesi Labib ki’n ganny akonplir, lo en legzanp ki montre ki Labib i egzakt ler i koz lo lasyans ek listwar oubyen lo en prensip Labib ki kapab ed nou dan nou lavi toulezour.

17. Ki i kapab arive ler nou demontre lanmour pour lezot?

¹⁷ Nou ed dimoun vin disip Kris ler nou demontre lanmour pour zot, ki swa zot relizye ouswa non. (1 Kor. 13:1) Anmezir ki nou ansenny zot, nou anvi montre zot ki Bondye i kontan nou e ki i anvi nou kontan li. Tou le-z-an, plizyer milye dimoun ki pa ti relizye i batize akoz zot in aprann pour kontan Bondye. Alor annan en pwennvi pozitif e demontre lanmour ek en lentere personnel dan tou sort kalite dimoun. Ekout zot. Esey konpran zot santiman ek zot fason panse. Par ou legzanp, ansenny zot ki mannyer pour viv parey en disip Kris.