Bann Renyon i Benefisye Bann Zenn
1 En fiy adolesan ti deklare: “Parfwa mon mazinen ki bann zenn i pas dan bann moman pli difisil dan lavi. Nou parmi bann dimoun ki komet fornikasyon, servi drog, e bwar.” Eski i koumsa ki ou santi? Si wi, dapre ou, kwa ki pou ed ou pour lit kont sa bann move lenfliyans? Ou bezwen lafwa, lafwa for ki bann prensip Zeova i bon, parski san sa, “personn pa kapab fer plezir Bondye.” (Ebre 11:6) Kan ou asiste bann renyon kongregasyon, sa pou ed ou fortifye ou konviksyon Kretyen ek ou determinasyon pour evit sa ki mal.
2 Renyon i Annan Bokou pour Ofer Ou: Kwa ki fer en repa delisye ansanm avek bann zanmi pros rezwisan? Eski i pa konbinezon en bon manze ek konpanni agreab dan en latmosfer detant? Anfet, nou bann renyon i ofer menm leksperyans agreab, me dan en sans spirityel.
3 Bann keksoz ki ganny diskite dan renyon i batir nou, e i kouver kestyon lo bann problenm toulezour, ensi ki bann letid lo profesi Labib ki vreman enteresan. Lenstriksyon pratik i ganny prezante, ki ansenny ou konman pour viv en meyer lavi e konman pour fer fas avek bann lobstak ki ou konfronte. Bann konpanyon ki ou trouve dan bann renyon i pli bon konpanyon ki ou kapab rankontre, e sa latmosfer spirityel i agreab e en proteksyon. (Ps. 133:1) I pa sirprenan ki en zenn ti dir: “Mon lekol toudilon lazournen, e sa i epwiz mwan. Me bann renyon i parey en oazis dan dezer, kot mon ganny rafresi pour arive fer ankor en lazournen lekol son lannmen.” En lot ti dir: “Mon’n realize ki relasyon etrwat avek bann ki kontan Zeova i ed mwan pour reste pros avek li.”
4 Kan ou enskrir dan Lekol Minister Teokratik, ou aprann rasanble bann lenformasyon Biblik, devlop li dan en ekspoze, e apre prezant li dan laform en konversasyon avek lodyans Lasal Rwayonm. Mazin benefis ganny formen pour abilman servi Parol Bondye pour ansenny laverite ki prezerv lavi! Kote ankor bann zenn i kapab ganny en tel formasyon sitan itil?
5 Konman Tir Plis Profi dan Renyon: Pour ganny plis benefis dan bann renyon, i annan trwa keksoz ki enplike. Sa se preparasyon, partisipasyon, ek laplikasyon.
6 Prepare: Progranm en letan pour prepar bann renyon dan en fason regilye. Pa les devwar lekol, en travay amitan, oubyen bann aktivite rekreasyonnel pran ou letan ki ou bezwen pour revwar davans, size ki pou ganny diskite dan sak renyon. I pou meyer si ou annan en bon routin. Premyerman e avan tou, ou devret mentenir en progranm lektir Labib lasemenn pour Lekol Minister Teokratik. I demann zis detrwa minit sak zour pour lir e medit lo bann sapit ki’n ganny dezinyen. Met en letan dekote, pour prepar Letid Liv Kongregasyon ek Letid La Tour de Garde. Serten i fer li omwen enn ou de zour avan sa bann renyon. Dan mezir ki sa i posib, fer parey pour bann porsyon ki’n ganny progranmen pour Renyon Servis sak semenn.
7 Partisipe: Labib i dir ki alaz 12 an, Zezi ti dan tanp pe ekoute, demann kestyon e donn larepons. (Lik 2:46, 47) Andotmo, i ti antyerman enplike. Ou pou benefisye plis dan bann renyon kan ou fer zefor pour partisipe.—Prov. 15:23.
8 Premyerman, ou bezwen konsantre aktivman lo sa ki pe ganny ansennyen dan bann renyon. Parfwa ekout en diskour i pli difisil ki fer enn. Akoz? Detanzaot nou lespri i kapab mazin lezot keksoz kan sa dimoun pe koze. Konman nou kapab konbat sa? Pran not. Met an ekrir bann pwen enportan ki ou ti a kontan repas lo la plitar. Pran bann not pou ed ou pour gard ou lespri konsantre lo progranm. En lot keksoz, se rod bann teks dan ou Labib e swiv lektir sa orater.
9 Anplis, fer li en lobzektif pour partisip dan sak diskisyon par kestyon ek repons dan bann renyon. Ou pou pli benefisye ankor si ou fer komanter dan ou prop mo. Proverb 15:28 i dir: “Leker en dimoun zis i medite pour reponn.”
10 Pratik Sa ki Ou Aprann: Dernyen pa se ki ou fer sir ki sa ki ou aprann i ‘aktif dan ou.’ (1 Tesa. 2:13) Ofiramezir ki ou aplik bann bon pwen ki ou aprann dan sak renyon, ou pou apros pli pre avek Zeova. I pou reel pour ou e ou pou resanti en gran lazwa ek satisfaksyon kan ou pe kontinyen “swiv laverite,” e pran li aker.—3 Zan 4.
11 Zenn frer ek ser, kan ou regilyerman prepare pour bann renyon, partisipe e met an pratik sa ki ou’n aprann, ou pou vreman pran plezir dan zot. Anmenmtan, ou pou tir tou benefis ki ou kapab ladan. Ou lafwa pou fortifye, zis parey ou rezolisyon pour reste fidel avek ou Papa seles, Zeova.—Ps. 145:18.