“Les Ou Lalimyer Briye”
1 Lemonn otour nou i dan fernwanr moral e spirityel. Lalimyer laverite i ekspoz “bann aksyon initil” sa fernwanr afen ki bann pyez i kapab ganny evite. Se pour sa ki, lapot Pol ti ankouraz bann Kretyen pour kontinyen “mars konman zanfan lalimyer.”—Efe. 5:8, 11.
2 “Lalimyer i fer prodwi bokou kalite” ki klerman diferan avek teneb sa monn. (Efe. 5:9) Pour prodwi sa bann kalite nou bezwen vin bann legzanp remarkab dan nou fason viv konman en Kretyen, sa kalite dimoun ki Zezi i aprouve. Nou devret osi demontre bann kalite tel konman senserite, lantouzyasm ek en leker konplet pour laverite. Sa bann kalite i bezwen ganny manifeste dan nou lavi toulezour e dan nou minister.
3 Briye dan Tou Loportinite: Zezi ti dir son bann disip: “Zot lalimyer i devre klere devan tou dimoun.” (Mat. 5:16) An imitan Zezi, nou reflekte lalimyer Zeova par pres konsernan Rwayonm Bondye ek son plan. Nou briye konman bann lalimyer ler nou vizit bann lakour e ler nou propaz laverite dan travay, kot lekol, avek nou vwazen, oubyen nenport lezot landrwa kot nou ganny loportinite.—Fili. 2:15.
4 Zezi ti dir ki serten pou ay lalimyer. (Zan 3:20) Alor nou pa dekouraze ler lamazorite i refize pour les “lalimyer Bonn Nouvel, konsernan laglwar Kris” briye pour zot. (2 Kor. 4:4) Zeova i lir leker imen e i pa anvi bann ki pratik sa ki mal parmi son pep.
5 Kan nou swiv bann prensip Zeova e rezwir lalimyer spirityel, nou kapab an retour reflekte li avek lezot. Si lezot i rekonnet atraver nou kondwit ki nou posed “lalimyer lavi,” alor zot osi zot kapab ganny motive pour fer bann sanzman neseser pour vin bann porter lalimyer.—Zan 8:12.
6 Par les nou lalimyer briye, nou anmenn loner pour nou Kreater e ed bann ki senser pour konn li e ganny lespwar lavi eternel. (1 Pyer 2:12) Vi ki nou annan lalimyer, annou servi li pour gid lezot pour sorti dan sa fernwanr spirityel e fer bann aksyon ki annan rapor avek lalimyer.