“Zot lalimyer i devre klere”
1. Nou annan privilez pour partaz kwa?
1 Sa lalimyer soley ki nou vwar depi gran maten ziska tar apre midi i anmenn laglwar pour Zeova. Me i pa sa kalite lalimyer ki Zezi ti ankouraz son bann disip pour annan. I ti pe plito koz lo “lalimyer lavi.” (Zan 8:12) Pour annan “lalimyer lavi,” setadir sa leklersisman spirityel, i en gran privilez me i osi vin avek bokou responsabilite. Zezi ti donn sa lord: “Zot lalimyer i devre klere devan tou dimoun.” Dan sa fason i pou anmenn byenfe pour lezot osi. (Mat. 5:16) Ozordi, plis ki oparavan, sa lalimyer spirityel ki nou’n gannyen i bezwen ganny partaze akoz sa lemonn i dan fernwanr spirityel. Parey Kris, ki mannyer nou kapab les nou lalimyer klere?
2. Ki mannyer Zezi ti montre lenportans pour partaz sa lalimyer spirityel?
2 Atraver sa travay predikasyon: Zezi ti servi son letan, lenerzi ek resours pour fer dimoun konn sa lalimyer spirityel kot zot lakour, dan landrwa piblik, lo latet montanny e nenport landrwa kot i ti zwenn zot. I ti konn byenfe dirab ki dimoun ti pou gannyen atraver sa vre leklersisman spirityel. (Zan 12:46) Alor, Zezi ti prepar son bann disip pour vin “lalimyer lemonn” pour ki plis dimoun i konn laverite. (Mat. 5:14) Zot les zot lalimyer klere par fer dibyen zot prosen e partaz sa leklersisman spirityel.
3. Ki mannyer nou kapab montre ki nou vreman apresye sa lalimyer spirityel?
3 Pep Bondye i pran o serye sa responsabilite pour kontinyen “mars konman zanfan lalimyer” e zot pres partou kot zot zwenn dimoun. (Efe. 5:8) Zot in kapab konmans koz avek lezot lo Labib zis par lir Labib oubyen lezot piblikasyon baze lo Labib kot lezot dimoun i vwar zot, par egzanp pandan brek kot travay oubyen lekol. En zenn ser ti konmans en letid Labib e i ti plas bann liv avek 12 son bann kanmarad lekol dan sa fason.
4. Akoz nou devret annan en bon kondwit pour nou ‘lalimyer klere’?
4 Atraver nou bon aksyon: Nou osi les nou lalimyer klere atraver sa ki nou fer tou le zour. (Efe. 5:9) Akoz dimoun i remark nou bon kondwit kot lekol, travay ek lezot landrwa piblik, sa i kree bann bon loportinite pour nou partaz sa laverite avek zot. (1 Pyer 2:12) Par egzanp, en ansenyan ti apel paran en pti garson senk an ki ti annan en bon kondwit. I ti dir: “Mon pa’n zanmen vwar en zanfan ki konpran tre byen lenportans pour fer sa ki byen!” Wi, nou travay predikasyon ek bon kondwit i atir dimoun ver “lalimyer lavi” e i anmenn laglwar pour nou Bondye.