Aprann Ekout Byen
1 Pour ekout atantivman i demann disiplin. I osi egziz en dezir delapar sa enn ki pe ekoute pour aprann e benefisye atraver sa ki i pe tande. Se pour sa rezon alor, ki Zezi ti fer resorti sa nesesite pour “fer byen atansyon konman zot ekoute.”—Lik 8:18.
2 Sa i aplikab sirtou ler nou asiste bann renyon kongregasyon ek diferan lasanble. Zot bann lokazyon kot nou devret ekout avek bokou latansyon. (Ebr. 2:1) La detrwa pwen ki pou ed nou pour aprann ekout byen pandan sa bann rasanbleman Kretyen.
◼ Apresye valer bann renyon. Zot en mwayen tre esansyel par ki nou pe ganny “ansennyen par Zeova” atraver “serviter fidel.”—Iza. 54:13; Lik 12:42.
◼ Prepar davans. Egzamin lenformasyon ki pou ganny diskite, e fer sir ki ou anmenn ou Labib ek ou kopi personnel sa piblikasyon ki pou ganny servi.
◼ Pandan bann renyon, fer en zefor spesyal pour konsantre. Ou devret evite koz avek sa bann ki pe asiz obor ou e osi gete ki lezot dan lodyans pe fer. Pa les ou ganny distrer par bann mazinasyon lo sa ki ou pe al fer apre renyon oubyen lo lezot keksoz personnel.
◼ Egzamin oprofon sa ki pe ganny prezante. Demann ou lekor: ‘Konman sa i aplik pour mwan? Kan mon pou met li an pratik?’
◼ Pran bann not bref lo bann pwen kle ek verse Labib. Sa i ed ou pour fikse ou latansyon lo sa ki pe ganny diskite e i kontribye pour ou mazin bann pwen kle pour servi plitar.
3 Aprann Ou Zanfan pour Ekoute: Zanfan i bezwen lenstriksyon spirityel. (Det. 31:12) Dan letan ansyen, “tou ki ti annan ase lentelizans pour ekoute” parmi pep Bondye ti bezwen atantif pandan ki Lalwa ti ganny lir avek zot. (Nee. 8:1-3) Si paran i pran par dan renyon e port bokou latansyon, i tre probab ki zot zanfan pou fer parey. I pa saz pour anmenn zouzou oubyen liv penn pour gard zanfan okipe. Bann ale vini dan twalet ki pa sitan neseser i osi enteronp zanfan pour ekoute. Vi ki “sotiz i atase avek leker en garson,” paran i devret fer bokou zefor pour fer zot zanfan asiz trankil e ekoute dan bann renyon.—Prov. 22:15.
4 Ler nou aprann ekout byen, nou prouve ki nou vreman saz e ki nou anvi “pran plis lenstriksyon.”—Prov. 1:5.