Konport nou byen e ganny loue!
1 “Zot annan en trankilite dan zot ki mon pa’n zanmen vwar dan okenn lezot dimoun.” “I en plezir pour annan sa group.” Sa i enn parmi bokou komanter pozitif ki nou’n resevwar avek lezot dimoun apre bann lasanble distrik lannen pase, ki souliny sa bon repitasyon ki nou annan konman en lorganizasyon. (Prov. 27:2; 1 Kor. 4:9) Finalman, en tel loner i al pour Zeova. (Mat. 5:16) En lot pli bon loportinite pour loue Bondye i la devan nou pandan sa Lasanble Distrik pour sa lannen “Bann Ansennyan Parol Bondye.”
2 Avek bonte, sak lannen nou resevwar bann rapel konsernan kondwit apropriye dan lasanble. Akoz? Vi ki latitid, fason abiye, e konportman sa monn pe kontinyen deteryore, nou, nou refize les nou ganny enfliyanse. Nou pa anvi ki nou bon repitasyon i ganny gate. (Efe. 2:2; 4:17) Annou gard sa bann lavertisman swivan dan nou lespri.
3 Konport nou byen—dan bann Lotel: Nou ganny rekonnet konman bann dimoun onnet. (Ebr. 13:18) Alor, nou bezwen onnet konsernan lakantite dimoun ki pe reste dan nou lasanm lotel. Nou pa merit kwi manze dan lasanm si i pa permet. En sef lotel ti dir ki i kapab fer bann pri lasanm pli bonmarse pour bann Temwen Zeova akoz i pa zanmen bezwen ranplas bann servyet ki manke. I konnen ki son landrwa pou byen ganny okipe. Sirman, nou pa pou pran “bann souvenir” kot lotel. Plito, parey i en koutim, kit en pti larzan anplis pour montre lapresyasyon pour bann servis ki ou’n gannyen. E toultan montre lapolites ek pasyans dan nou relasyon avek travayer lotel.
4 Bann obzervater i enpresyonnen letan zot vwar bann zanfan konport zot dan en mannyer poli e obeisan. (Efe. 6:1, 2) Paran, silvouple veye ki zot zanfan pa vin en deranzman pour lezot, sirtou letan zot servi basen naze oubyen lezot fasilite rekreasyonnel. Evite tap laport for oubyen fer tapaz, sirtou pandan lannwit.
5 I bon pour nou kit antet ki lezot dimoun dan lotel ki pa Temwen pe osi servi sa landrwa. Serten lotel i konplent ki bann delege lasanble i servi tou glason dan masin pour ranpli zot bwat rafresisman. Pareyman, i pa apropriye pour pran manze oubyen ranpli bann resipyan avek kafe pour servi plitar. Pa zanmen krwar ki bann polisi lotel pa aplik pour nou osi.
6 Konport nou byen—kot Lasanble: I’n arive ki serten delege in refize korpere avek bann manm servis lakey, menm koz avek zot dan en fason ki pa kretyen. Loto serten delege ti ganny sezi par lapolis dan lepase akoz zot ti refize swiv lenstriksyon bann frer e park kot pa ti legalman otorize. Sertennman, sa latitid mwan dabor pa idantifye en dimoun konman enn ki konport li byen, ni menm anmenn loner pour Zeova Bondye. Alor annou annan lanmour, pasyans, ek korperasyon.—Gal. 5:22, 23, 25.
7 Letan laport i ouver 8 er bomaten, serten frer ek ser i tant pour taye e pouse pour ganny “pli bon” plas. Plizyer domaz in arive akoz sa kalite kondwit. Menm si in ganny sizere ki nou anmenn en dezennen leze pour manze midi, i pa apropriye pour mont latab dan parking pour servi en gran repa. Sa pour donn lenpresyon konmsi i annan lafet parey i komen dan bann levennman sportif.
8 Konport nou byen—par nou Labiyman: Apre enn bann lasanble distrik lannen pase, en editer en gran zournal ti ekrir: “Pli enportan, se konportman bann Temwen zot menm ki ti pli atiran. Konman ti agreab pour vwar bokou dimoun pe konport zot dan en fason diny e respektab. Santenn fanmiy ki’n abiye dan zot lenz Dimans ki pe reprezant en group rasyal ek lorizin etnik ti desann trankilman dan sa lasal. Zot konportman ti okontrer avek laplipar lafoul ki vin servi sa lasal. Annefe, sa bann Temwen i vreman diferan avek laplipar lafoul. I’n vin normal pour vwar bann manm piblik konport zot dan bann move fason. . . . Efektivman, sa lafoul Temwen i tre agreab.” Annou pa zanmen les nou labiyman oubyen nou kondwit dan okenn fason diminyen latmosfer spirityel sa lasanble.—Fil. 1:10; 1 Tim. 2:9, 10.
9 Konport nou byen—pandan Batenm: Bann kandida batenm pou oule tret sa lokazyon avek dinite. Alor, met en kostim-de-ben modes ki pour montre lapresyasyon pour sa lokazyon sakre. I pou annan plis benefis si avan asiste lasanble bann kondikter letid Labib i revwar “Kestyon Lekter” dan Latour Veyer 1 Avril, 1995 avek zot etidyan.
10 Nou konportman ek kondwit Kretyen i temwanny nou krwayans Kretyen e i fer li fasil pour bann dimoun ki annan leker senser rekonnet laverite. Annou, kontinyen “fer sa ki byen” e ganny loue letan nou asiste Lasanble Distrik “Bann Ansennyan Parol Bondye.”—Rom. 13:3.