Kontant ou avek sa ki ou annan
1 Lekritir i konsey nou pour pran swen avek nou fanmiy lo plan materyel, me sa pa devret vin nou lobzektif prensipal dan lavi. Bann keksoz spirityel i devret vin premye. (Mat. 6:33; 1 Tim. 5:8) Pour nou kapab arive byen balans nou lavi i en defi dan sa “letan difisil.” (2 Tim. 3:1) Kwa ki pou ed nou pour fer sa?
2 Adopte Pwenn-vi Labib: Parol Bondye i averti nou ki rod larises i kapab detri nou spirityelman. (Ekle. 5:10; Mat. 13:22; 1 Tim. 6:9, 10) Dan sa letan kritik, i pou danzere pour okenn parmi nou vin sitan okipe avek travay profann oubyen traka larzan ki nou met bann aktivite spirityel—bann renyon, letid, ek servis—dan dezyenm plas dan nou lavi. (Lik 21:34-36) Parkont, Labib i konseye: “Si nou annan manze ek lenz sa i ase.”—1 Tim. 6:7, 8.
3 Sa pa vedir ki bann Kretyen i ganny demande pour met zot lekor dan lapovrete. Me i ed nou pour idantifye kwa ki vreman nou bann bezwen materyel—manze, lenz, landrwa reste ki sifizan dan pei kot nou pe viv. Si nou annan bann nesesite lavi, nou pa devret kontinyelman pourswiv en pli o standar lavi. Ler nou pe mazin aste en keksoz oubyen aksepte plis travay, nou bezwen demann nou lekor, ‘Eski sa i vreman neseser?’ An fezan sa, pou ed nou pour port latansyon lo sa konsey enspire: “Pa les lanmour pour larzan domin zot lavi, me kontant zot avek sa ki zot annan.”—Ebr. 13:5.
4 Si nou annan konfyans dan Zeova, i pou beni nou. (Prov. 3:5, 6) Menm si nou bezwen travay dir pour ganny sa ki nou bezwen toulezour, nou pa konsantre nou lavi lo sa bann keksoz. Ki swa nou annan pti gin oubyen bokou, nou depan lo Zeova pour satisfer nou bezwen. (Fili. 4:11-13) Alafen, nou rezwir satisfaksyon ki sorti kot Bondye ansanm avek bokou lezot benediksyon.
5 Imit Lafwa lezot: En paran tousel ki ti pe elve son fiy dan semen laverite ti senplifye son lavi ptit-a-pti. Kantmenm i ti rezwir konfor son lakour, i ti sorti e enstal li dan en pli pti lakaz e plitar dan en apartman. Sa ti permet li redwir lakantite letan ki i pase dan son travay profann afen ki i ti pou kapab dedye plis letan dan minister. Apre ki son fiy ti’n grandi e marye, sa manman ti pran retret boner, menm si sa ti diminyen plis ankor larzan ki i ti pe gannyen. Nou ser i aprezan dan son setyenm lannen konman en pionye ordiner e i napa okenn regre pour bann sakrifis materyel ki i’n fer pour met bann lentere Rwayonm premye dan son lavi.
6 En ansyen ek son madanm ti fer pionye pour bokou lannen anmezir ki zot ti pe elve trwa zanfan. Konman en fanmiy, zot ti aprann kontant zot avek satisfer zot bezwen olye ki zot dezir. Sa frer i fer sa komanter: “Nou ti bezwen viv pli senp. Menm si nou’n rankontre serten peryod letan difisil, Zeova in toultan fourni sa ki nou bezwen. . . . Kan mon vwar mon fanmiy pe met bann lentere spirityel premye koumsa, mon santi ki tou keksoz i egzakteman parey ki i ti devret ete, e mon santi ki mon’n akonpli en keksoz.” Son madanm i azoute: “Kan mon vwar [mon msye] okipe avek bann keksoz spirityel, mon santi en lakontantman profon dan mwan.” Bann zanfan osi i kontan ki zot paran in deside servi Zeova aplentan.
7 Pour tou sa bann ki swazir pour annan latasman avek Bondye olye ki pourswiv bann keksoz materyel, Labib i promet bokou benediksyon konmela menm e dan lavenir.—1 Tim. 4:8.