Larises spirityel i kapab vin pour ou!
1 Eski ou pe rod en pli gran lazwa ek satisfaksyon dan ou lavi? Eski ou ganny satisfaksyon e trouv li en plezir pour ou ed lezot? Eski ou annan sa dezir pour ogmant ou servis pour Zeova? Si ou reponn wi pour tou sa bann kestyon, alors ou devret mazin fer servis pionye ordiner. Byensir, nou bezwen pran an konsiderasyon responsabilite dan fanmir e lezot responsabilite ki nou annan konman Kretyen. I annan osi bann limitasyon akoz problenm fizik oubyen lasante.
2 Dan Lekritir enspire ki Salomon ti ekrir i ti konpar benediksyon Zeova avek larises materyel. (Prov. 10:22) Denozour, benediksyon ki nou gannyen sorti kot Zeova i prensipalman larises spirityel. Bann pionye ordiner i annan en tel larises annabondans. Par egzanp, zot eksperyans en pli gran lazwa pour donnen kan zot “servi byen tou lokazyon” oubyen letan ki zot ti pou’n kapab pas dan bann aktivite personnel. (Kol. 4:5; Akt 20:35) Zeova i remark e apresye travay ki zot fer avek lanmour. En tel “larises dan lesyel” pa pou zanmen perdi son valer. (Mat. 6:20; Ebr. 6:10) Anplis, ler bann pionye i gard en lavi senp e met zot konfyans dan Zeova pour donn zot bann keksoz ki zot bezwen dan lavi tou le zour, zot relasyon avek li pou vin pli for.—Mat. 6:22, 25, 32; Ebr. 13:5, 6.
3 Kan nou esey rod larises materyel sa i souvandfwa anmenn “en kantite dezir bet e move.” (1 Tim. 6:9, 10; Zak 5:1-3) Sa pa zanmen leka avek benediksyon Zeova. Vi ki bann pionye ordiner i pas bokou zot letan dan predikasyon, sa i ed zot pour gard en bon lekilib spirityel e konsantre lo bann keksoz pli enportan. (Fili. 1:10) En frer ki ti enzenyer ti kit son travay ki ti pran bokou son letan pour li kapab fer pionye. I ti dir: “Mon ti anba en kantite presyon dan mon travay. Me i pa leka dan servis pionye. Aprezan mon ganny sans ed bann dimoun e ansenny zot laverite. I bokou pli enteresan kan ou pe ed dimoun aksepte laverite e sa i donn mwan en pli gran satisfaksyon.”
4 Benediksyon pour lezot: Ozordi, tou dimoun pe fer fas avek “letan difisil.” (2 Tim. 3:1) Dimoun partou i vreman bezwen en lespwar. Bann proklanmater Rwayonm i ganny bokou lazwa kan zot ed dimoun ki dan dezespwar pour aprann e aksepte sa bon nouvel. Pa lazwa sa bann pionye ordiner ki pas plis ki 800 erdtan sak lannen dan sa travay ki sov lavi i vreman gran!—1 Tim. 4:16.
5 Eski ou’n mazin seryezman konsernan pran servis pionye ordiner? Nou pou bezwen “servi byen tou bann lokazyon” oubyen letan ki nou pase dan bann keksoz mwen enportan. (Efe. 5:15, 16) Bokou frer ek ser in fer sa e zot in senplifye zot lavi ki’n permet zot pour redwir lakantite letan ki zot pase dan travay pour kapab dedye plis letan pour lentere Rwayonm. Eski ou kapab aranz ou progranm pour ou zwenn zot?
6 Priy Zeova pour ganny lasazes pour ou fer en progranm ki pratik. (Zak 1:5) Ki benediksyon ou kapab ekspekte an retour? Larises spirityel annabondans! Zeova pou osi beni ou avek ou bann bezwen materyel. (Mat. 6:33) Bann ki teste Zeova dan sa laspe pou ganny “en benediksyon lo zot ziska ki i ava nepli annan ankor bezwen.”—Mal. 3:10.
[Kestyon]
1. Akoz ou devret mazin konsernan fer servis pionye ordiner?
2. Mansyonn serten larises spirityel ki bann pionye ordiner i gannyen.
3. Ki diferans i annan ant larises spirityel ek larises materyel?
4. Konman ki bann pionye ordiner i ganny beni kan zot partisip dan sa travay ki sov lavi?
5, 6. Kwa ki kapab ed ou pour pran servis pionye ordiner?