Proklanm Mesaz Rwayonm
1 “Mon bezwen anons Bonn Nouvel konsernan Rwayonm Bondye . . . , parski se pour sa, ki Bondye in anvoy mwan.” (Lik 4:43) Avek sa parol, Zezi ti pe spesifye tenm son minister. Son tenm se Rwayonm Bondye. Sa mesaz ki nou proklanmen ozordi i osi konsantre lo Rwayonm, parey i’n ganny predir dan Matye 24:14: “Sa Bonn Nouvel Rwayonm pou ganny anonse partou dan lemonn pour tou dimoun konnen; e apre sa, lafen pou arive.” Ki laverite konsernan Rwayonm Bondye ki dimoun i bezwen tande?
2 Rwayonm Bondye pe aprezan dominen dan lesyel e byento i pou ranplas tou gouvernman imen. Dyab in deza fini ganny tire dan lesyel, e sa lemonn mesan ki nou pe viv ladan in antre dan son bann dernyen zour. (Rev. 12:10, 12) Sa lemonn mesan Satan pou ganny detrir konpletman, me Rwayonm Bondye li, pa pou ganny afekte. I pou reste pour touzour.—Dan. 2:44; Ebr. 12:28.
3 Sa Rwayonm pou satisfer dezir tou bann imen obeisan. I pou retir soufrans koze par lager, krim, lopresyon, ek lapovrete. (Ps. 46:8, 9; 72:12-14) I pou annan dekwa manze pour tou dimoun. (Ps. 72:16; Iza. 25:6) Maladi ek dezabilite pou bann keksoz lepase. (Iza. 33:24; 35:5, 6) Anmezir ki imen i vin parfe, later pou ganny transformen dan en paradi, e dimoun pou viv ansanm dan linite.—Iza. 11:6-9.
4 Nou montre ki nou anvi vin sitwayen Rwayonm Bondye par fason ki nou pe viv. Sa mesaz Rwayonm i devret enfliyans nou lavi antye, enkli nou bann lobzektif ek nou bann priyorite. Par egzanp, menm si nou annan sa responsabilite pour port swen nou lakour, nou pa kapab les preokipasyon pour keksoz materyel etouf bann lentere Rwayonm. (Mat. 13:22; 1 Tim. 5:8) Plito, nou devret ekout lavertisman Zezi: “Rod plito Rwayonm Bondye ek son lazistis, e limenm i a donn zot anplis tou lezot keksoz [bann keksoz materyel ki nou bezwen] osi.”—Mat. 6:33.
5 I byen irzan ki dimoun i antann e azir anver sa mesaz Rwayonm pandan ki i ankor annan letan. Annou ed zot pour fer sa, par persyad zot lo size Rwayonm Bondye.—Akt 19:8.