Fer tou ou Zefor pour ‘donn en Temwannyaz oprofon’
1, 2. Kwa ki enpresyonn ou lo lafason ki Pol ti vwar predikasyon sa bon nouvel? Konman nou kapab imit son legzanp pour ‘donn en temwannyaz oprofon’?
1 Parey Zezi ek plizyer lezot serviter fidel dan lepase, zapot Pol ti en predikater devoue sa bon nouvel. I ti ‘donn en temwannyaz oprofon’ dan nenport ki sitiasyon i ti ladan. Menm ler i ti ganny anprizonnen dan en lakaz, i “ti resevwar tou bann ki ti vin war li. I ti pres Rwayonm Bondye e ansennyen konsernan Senyer Zezi-kri avek lasirans san okenn lanpesman.”—Akt 28:16-31.
2 Nou osi nou kapab fer tou nou zefor pour ‘donn en temwannyaz oprofon’ sak fwa ki nou ganny en loportinite. Sa i enkli temwanny avek dimoun ki nou zwenn ler nou pe al asiste Lasanble Distrik “Donn Bondye Laglwar” e osi apre ler nou pe retournen sorti lasanble. Nou kapab osi donn temwannyaz dan sa lavil kot lasanble pe ganny fer.—Akt 28:23, NW; Ps. 145:10-13.
3. Ki mannyer nou kapab evite ki nou temwannyaz enformel i vin zis par azar?
3 Eski sa Kalite Temwannyaz i okazyonnel ouswa i enformel? Eski i annan okenn diferans? Wi. En keksoz okazyonnel i ariv par azar ouswa san okenn lentansyon. I konmsi i pa’n ganny plàn ouswa i pa sitan enportan. Sirman nou minister pa koumsa. Parey ti leka avek Pol, donn Bondye laglwar par nou temwannyaz i enportan pour nou. I devret nou lentansyon pour donn en temwannyaz kot i apropriye letan nou pe vwayaze dan sa bann mwan ki pe vini. Me lafason ki nou apros lezot dimoun i kapab ganny dekrir konman enformel—setadir, relaks, amikal, e natirel. En tel lapros i kapab anmenn bon rezilta.
4. Ki mannyer Pol ti kapab donn temwannyaz dan sa landrwa kot i ti pe reste?
4 Prepare pour donn en Temwannyaz: Pol ti bezwen kree bann loportinite pour donn temwannyaz ler i ti anprizonnen dan en lakaz an Ronm. I ti pran linisyativ pour envit bann sef Zwif dan sa landrwa kot i ti pe reste. (Akt 28:17) Menm si ti annan en kongregasyon an Ronm, Pol ti aprann ki bann Zwif dan sa lavil pa ti konn bokou lo lafwa Kretyen. (Akt 28:22; Rom. 1:7) I pa ti ezite pour ‘donn en temwannyaz oprofon’ konsernan Zezi Kri ek Rwayonm Bondye.
5, 6. Ki loportinite nou kapab annan pour donn temwannyaz enformel? Ki preparasyon nou kapab fer pour fer li vin efikas?
5 Mazin sa kantite dimoun ou kapab rankontre ler ou pe vwayaze, ki annan en pti gin konnesans lo Temwen Zeova. Zot kapab pa ni menm konnen ki nou ofer bann letid Labib gratwit. Vey bann loportinite pour temwanny avek bann ki nou rankontre ler nou pe vwayaze, ler nou arete kot bann stasyon petrol, pe fer konmisyon, kot lotel, pe manze dan restoran, pe servi transpor piblik, eksetera. Plàn davans ki ou pou dir pour konmans en konversasyon e pour donn en temwannyaz an bref. Petet dan bann zour ki pe vini, ou kapab egzerse par donn temwannyaz enformel avek ou bann vwazen, fanmiy, koleg travay, ek lezot dimoun ki ou konnen.
6 Ou pou osi bezwen bann piblikasyon ler pe donn temwannyaz enformel. Ki piblikasyon? Ou kapab servi sa trak Eski ou ti a kontan konn plis lo Labib? Met lanfaz lo sa senk premye paragraf, kot plizyer rezon in ganny donnen lo akoz nou bezwen lir Labib. Montre sa form deryer ki en dimoun i kapab ranpli pour demann en letid Labib gratwit. Ler ou vwar en dimoun enterese, ofer brosir Ekspekte. Kot ou ekspekte zwenn bann dimoun ki koz en lot langaz, ou kapab anmenn sa pti liv Une bonne nouvelle pour toutes les nations. Paz 2 i eksplike konman pour servi li pour donn en temwannyaz. Si ou pe vwayaz dan en loto, ou kapab anmenn ennde piblikasyon pour bann ki vreman montre lentere dan sa mesaz Rwayonm.
7, 8. Ki lavertisman nou devret pran aker konsernan nou laparans fizik ek nou kondwit ler nou pe vwayaze e pandan letan lwazir?
7 Vey ou Laparans fizik ek ou Kondwit: Nou devret fer sir ki nou kondwit osi byen ki nou labiyman ek laparans fizik pa donn lezot en move lenpresyon oubyen fer zot “koz kont” lorganizasyon Zeova. (Akt 28:22) I pa aplik zis ler nou pe asiste lasanble me osi ler nou pe vwayaze e pandan bann letan lwazir. Latour Veyer le 1 Out, 2002, paz 30, paragraf 14, i donn sa lavertisman: “Nou labiyman pa devret atir latansyon lo nou, i pa devret drol, ni provokan, ni montre serten parti nou lekor ki pa sipoze deor, oubyen montre ki nou pe toultan swiv bann dernyen lanmod. Anplis ki sa, nou fason sanze i devret reflekte ‘en respe profon pour Bondye.’ Pa sa i fer nou reflesir bokou? Toutfwa, i pa senpleman en kestyon sanz dan en fason apropriye zis ler nou pe asiste renyon kongregasyon e apre pa fatig nou avek sa dan bann lezot lokazyon. Nou laparans fizik i devret touzour reflekte en latitid respektab e onorab vi ki nou bann Kretyen ek minis 24 lo 24.”—1 Tim. 2:9, 10.
8 Nou devret sanz dan en fason respektab e avek dinite. Si nou laparans fizik ek nou kondwit i toultan reflekte nou krwayans dan Bondye, nou pa pou zanmen santi nou ezite pour donn temwannyaz enformel akoz nou laparans i pa akseptab pour en minis sa bon nouvel.—1 Pyer 3:15.
9. Ki sikse Pol ti gannyen dan son temwannyaz an Ronm?
9 Temwannyaz enformel i anmenn bon Rezilta: Pandan sa de zan ki Pol ti anprizonnen dan sa lakaz an Ronm, i ti vwar bann bon rezilta ki i ti gannyen atraver zefor ki i ti fer pour donn temwannyaz. Lik ti raporte ki “ti annan ki ti aksepte sa ki i ti pe dir.” (Akt 28:24) Pol ti evalye lefikasite son temwannyaz oprofon ki i ti donnen ler i ti ekri: “Mon oule ki zot konnen ki sa ki’n arive avek mwan in vreman servi pour fer levanzil progrese. Annefe tou bann gard dan pale ek tou lezot ankor in konnen ki mon dan prizon pour Kris, e konfyans laplipar bann frer dan Senyer, in ogmante, akoz mon letan dan prizon, e deplizanpli zot in vin pli brav pour pres mesaz Bondye san okenn lafreyer.”—Fili. 1:12-14.
10. Ki bon rezilta en koup ti gannyen ler zot ti donn temwannyaz lannen pase?
10 Lannen pase, apre ki zot ti’n pas en lazournen dan lasanble distrik, en koup ti ganny en bon leksperyans ler zot ti donn temwannyaz enformel avek en servez ki ti demann zot kestyon lo zot badz lasanble. Zot ti koz avek li lo sa lasanble e osi lo lespwar ki Labib i donnen pour bann imen. Zot ti donn li sa trak Eski ou ti a kontan konn plis lo Labib? e eksplik li laranzman letid Labib. Sa madanm ti dir ki i ti a kontan en dimoun i vizit li. I ti met son non ek ladres deryer sa trak, e demann sa koup pour fer laranzman. Ki bon rezilta ou kapab gannyen sa lannen si ou fer tou ou zefor pour ‘donn en temwannyaz oprofon’?
11. Ki bann kalite nou devret devlope pour kapab propaz sa bon nouvel par ‘donn en temwannyaz oprofon’ sa lannen?
11 Propaz sa bon Nouvel oprofon: Zis mazinen konman Pol ti kontan ler i ti tande ki son bann konpanyon Kretyen ti pe imit son devouman! Annou fer tou sa ki nou kapab pour propaz sa bon nouvel par donn temwannyaz enformel lo nou krwayans ki baze lo Labib pandan ki nou benefisye avek sa lasanble distrik ki pe vini.
[Bwat lo paz 3]
Piblikasyon ki nou bezwen pour donn Temwannyaz enformel
■ Eski ou ti a kontan konn plis lo Labib? (trak)
■ Sa ki Bondye i ekspekte nou fer (brosir)
■ Une bonne nouvelle pour toutes les nations (pti liv)
■ Lezot piblikasyon
[Bwat lo paz 4]
Pa oubliy zot!
Oubliy lekel? Tou bann dimoun enterese ki ti asiste Memoryal lanmor Kris ouswa sa diskour spesyal. Eski nou’n envit zot pour asiste lasanble distrik pour sa lannen? I probab ki bokou parmi zot pou asiste, si zot ganny en bon lankourazman. Zot pou vin pli pros avek Zeova ek son lorganizasyon pandan ki zot rezwir sa bon lasosyasyon dan lasanble e sa progranm spirityel tre ankourazan. Akoz ou pa envit zot e vwar si zot pou vini? Donn zot tou detay ki zot bezwen. Sa i enkli dat lasanble, fason pour ariv kot landrwa lasanble, ler ki bann sesyon pou konmanse e terminen, e sa apersi lo progranm ki trouve lo paz deryer Réveillez-vous! le 8 Zen, 2003.