“Prese e anons plennman” sa bon nouvel
1. Ki bon legzanp Pol in kite lo konman pour rann temwannyaz?
1 “Fer ou servis plennman.” (2 Tim. 4:5, Byington) Sertennman zapot Pol ti annan tou rezon pour pa ezite donn sa konsey avek Timote. Anfet, ant lannen 47 ek 56 N.L., Pol ti’n konplet trwa vwayaz misyonner. Liv Akt i plizyer fwa mansyonnen ki Pol ti “rann temwannyaz plennman.” (Akt 23:11, NW; 28:23, NW) Ki mannyer nou nou kapab fer parey ozordi?
2. Ki mannyer nou kapab rann temwannyaz plennman dan predikasyon kaz an kaz?
2 Kaz an kaz: Pour zwenn bann dimoun ki pa’n zanmen tann sa bon nouvel, nou bezwen pres en lot ler pandan lazournen. Bann sef fanmir i kapab kot lakour tar dan apre midi oubyen dan wikenn. Nou devret fer zefor pour omwen koz avek en dimoun kot sak lakaz e kontinyen repas kot sa bann lakour ki nou pa ti zwenn personn. Me ki ou kapab fer si ou pa reisi zwenn personn apre tou sa zefor? Petet ou a ganny en bon rezilta si ou kontakte zot par telefonn ouswa let.
3. Ki loportinite ou annan pour pres an piblik e enformelman?
3 An piblik e enformelman: Bann serviter Zeova ozordi i fer konnen “vre lasazes” avek tou sa ki ekoute. Parfwa sa i ganny fer “dan semen” oubyen “landrwa piblik.” (Prov. 1:20, 21) Kan nou pe fer nou bann aktivite tou le zour, eski nou touzour pare pour rann en temwannyaz? Eski nou kapab dir ki nou pe “konsakre tou [nou] letan prese”? (Akt 18:5) Si wi, alor nou kapab dir ki nou pe akonplir nou lobligasyon pour “prese e anons plennman” sa bon nouvel.—Akt 10:42, NW; 17:17; 20:20, 21, 24.
4. Ki mannyer lapriyer ek meditasyon i ed nou rann temwannyaz plennman?
4 Parler nou kapab ezite rann temwannyaz akoz nou en dimoun timid oubyen annan serten febles, me pa oubliye ki Zeova i konn nou limit. (Ps. 103:14) Kan sa i arive, nou kapab demann Zeova kouraz pour koz san okenn lafreyer. (Akt 4:29, 31) Deplis, pandan letid personnel ek meditasyon lo Parol Bondye annou konsantre lo devlop plis lapresyasyon pour valer sa bon nouvel. (Fili. 3:8) Sa pou motiv nou pour anons sa bon nouvel avek devouman!
5. Ki mannyer nou kapab ede akonplir profesi Yoel?
5 Profesi Yoel ti predir ki avan sa gran zour efreyan Zeova i arive, pep Bondye pou “kontinyen ale” e pa pou les nanryen anpes zot prese. (Yoel 2:2, 7-9) Annou kontinyen fer tou sa ki nou kapab pour pran par dan sa travay ki pa pou zanmen ganny repete!