Vre Linite parmi Kretyen—Konman?
1 Kwa ki kapab ini plis ki sis milyon dimoun dan 234 pei ek apepre 380 langaz? Zis ladorasyon Zeova. (Mik. 2:12; 4:1-3) Atraver zot prop leksperyans, bann Temwen Zeova i konnen ki vre linite parmi bann Kretyen i en realite ozordi. Konman “en sel troupo” anba nou “sel berze,” nou determinen pour reziste bann tandans lemonn ki kree divizyon.—Zan 10:16; Efe. 2:2.
2 Bondye in toultan anvi ki tou lanz ek imen i ini dan vre ladorasyon. (Rev. 5:13) Vi ki Zezi ti konn lenportans linite, i ti priy seryezman pour ki i egziste parmi son bann disip. (Zan 17:20, 21) Konman ki sakenn ant nou i kapab kontribye pour annan linite dan kongregasyon Kretyen?
3 Lafason ki Linite i ganny akonpli: Linite parmi bann Kretyen ti pou enposib san Parol Bondye ek son lespri sen. Ler nou aplik sa ki nou lir dan Labib, sa i permet lespri sen Bondye azir libreman dan nou lavi. Sa i permet nou “prezerv linite ki Sent-Espri i donnen par lape ki ini [nou] ansanm avek kanmarad.” (Efe. 4:3) I pous nou pour siport kanmarad avek lanmour. (Kol. 3:13, 14; 1 Pyer 4:8) Eski ou promot linite par reflesir lo Parol Bondye sak zour?
4 Nou travay predikasyon e pour fer disip i osi fer nou ini. Ler nou travay avek lezot dan predikasyon, “konbat ansanm pour lafwa dan levanzil,” nou vin ‘bann konpanyon travay pour laverite.’ (Fili. 1:27; 3 Zan 8) Pandan ki nou fer sa, sa lyen lanmour ki ini nou ansanm dan kongregasyon i vin pli for. Akoz ou pa envit en dimoun ki ou pa’n travay avek resaman pour akonpanny ou dan predikasyon sa semenn?
5 Pa nou annan privilez pour form parti sa sel vre lasosyasyon frer enternasyonal lo later ozordi! (1 Pyer 5:9) Resaman, plizyer milye dimoun in eksperyans sa linite pour zot menm dan bann Lasanble Enternasyonal “Donn Bondye Laglwar.” Fotespere ki sakenn ant nou i kontribye pour sa linite presye par lir Parol Bondye sak zour, par rezourd bann diferans avek lanmour, e par pres sa bon nouvel “tou ansanm.”—Rom. 15:6.