“ Gard sa linite ki [nou] annan gras a lespri sen”

“Sa linite” ki i annan parmi nou i “gras a lespri sen.” Sa i vedir ki lafors aktif Bondye ki fer li posib pour nou ini. Me parey Pol ti dir, nou bezwen fer zefor pour nou kapab kontinyen reste ini. Lekel ki bezwen fer zefor? Anfet, sak Kretyen i bezwen fer son par pour “gard sa linite ki [nou] annan gras a lespri sen.”

Annou vwar en legzanp ki pou ed nou konpran sa. Meton en dimoun i donn ou en loto nef. Lekel ki devret fer sir ki sa loto i reste dan en bon leta? Larepons i kler. Ou pa kapab blanm sa dimoun ki’n donn ou sa loto si sa loto i aret marse akoz ou pa ti pran swen avek.

Dan menm fason, menm si sa linite ki i annan parmi nou i en kado sorti kot Bondye, nou tou nou annan sa responsabilite pour gard sa linite. Si i napa lape ant ou ek en frer oubyen en ser, ou bezwen ou lekor, ‘Eski mon pe fer mon par pour gard linite dan kongregasyon?’

“FER BOKOU ZEFOR” POUR GARD LINITE

Parey Pol ti dir, parfwa nou bezwen fer bokou zefor pour gard sa linite ki i annan parmi nou. Sa i kapab leka sirtou si en frer oubyen en ser in ofans nou. Me eski sa i vedir ki nou bezwen apros sa dimoun e koz lo sa problenm sak fwa sa i arive? Pa neseserman. Demann ou lekor, ‘Eski si mon koz lo la, sa pou amelyor sa sityasyon oubyen i pou fer li pli grav?’ Parfwa i pli saz pour zis les pase oubyen pour pardonnen.—Prov. 19:11; Mark 11:25.

Parey zapot Pol ti ekri, annou kontinyen “siport kanmarad avek lanmour.” (Efe. 4:2) En liv resers i dir ki sa lekspresyon i kapab ganny tradwir “aksepte zot parey zot ete.” Sa i vedir ki nou aksepte ki nou bann frer ek ser i fer pese, zis parey nou. Anfet, nou tou nou pe esey devlop “sa nouvo personnalite.” (Efe. 4:23, 24) Me i napa enn parmi nou ki kapab fer sa dan en fason parfe. (Rom. 3:23) Si nou aksepte sa, i pou pli fasil pour nou kontinyen siport kanmarad, pardonnen e pour “gard sa linite ki [nou] annan gras a lespri sen.”

Ler nou pardonnen, menm si nou fer li zis dan nou leker, nou pou kontinyen annan sa “lape [ki] ini [nou] tou ansanm.” Sa mo Grek ki’n ganny tradwir “ini zot tou ansanm” dan Efezyen 4:3 in ganny tradwir “ligaman” dan Kolosyen 2:19. Ligaman i bann laser ki parey bann lakord for ki konekte en lezo avek en lot. Dan menm fason, lape ek lanmour pour nou bann frer ek ser i ed nou pour reste pros avek zot menm si nou annan bann dezakor.

Alor ler en frer oubyen en ser i ofans ou, i fer ou ankoler oubyen irit ou, demontre konpasyon e esey konpran sa dimoun olye kritik li. (Kol. 3:12) Vi ki nou tou nou fer fot, i tre probab ki ou osi ou’n deza ofans en dimoun. Ler ou gard sa antet, sa pou ed ou fer ou par pour “gard sa linite ki [nou] annan gras a lespri sen.”