Progranm Lafanmiy—Predikasyon an Fanmiy
1 Zeova i kontan ler i vwar bann zenn loue son non. (Ps. 148:12, 13) Dan letan Zezi, menm “bann zanfan ek bann pti baba” ti loue Bondye. (Mat. 21:15, 16) Menm keksoz pe arive ozordi. Paran, ki mannyer ou kapab ed ou zanfan loue Zeova avek devouman dan predikasyon? Ankor enn fwa, parey ti ganny aksantye dan sa lartik konsernan bann renyon, ou legzanp i en fakter enportan. En papa ti koz pour bann paran ler i ti dir: “Zanfan pa fer parey ou dir; zot fer parey ou fer!”
2 En ser ki’n ganny elve par bann paran ki ador Bondye ti rapel: “Zanmen nou ti leve dan Sanmdi bomaten pour demande si nou pe al dan predikasyon. Nou ti konnen ki nou pe ale.” Dan menm fason, ou kapab ed ou zanfan pour konpran lenportans travay predikasyon par etablir en progranm sak semenn pour partisip dan predikasyon an fanmiy. Sa pa zis permet ou zanfan aprann ler zot obzerv ou me ou osi ou kapab vwar zot latitid, konportman, ek bann abilite ki zot devlope.
3 Formasyon adapte: Pour bann zanfan kontan predikasyon, fodre ki paran i prepar zot pour zot byen partisipe zot osi. Sa ser ki’n ganny mansyonnen pli boner ti osi dir: “Nou pa ti zanmen al dan predikasyon zis pour akonpanny nou paran dan zot travay. Nou ti konnen nou annan nou par pour fer, menm si i ti zis fer sonnen laport e kit en fey lenvitasyon. Gras a en bon preparasyon avan sak aktivite wikenn, nou ti konnen ki pou dir.” Ou kapab donn ou zanfan en tel formasyon par pran ennde minit sak semenn pour prepar zot pour predikasyon, swa pandan letid fanmiy oubyen en lot ler.
4 Pres ansanm an fanmiy i donn ou loportinite pour fer antre laverite dan ou zanfan. En papa Kretyen ti anmenn son fiy avek li ler i ti mars an tou 20 kilomet pour al distribye trak avek bann vilazwa dan lot vale. Ozordi, sa ser i rapel sa letan e i dir avek lakontantman: “I ti pandan sa bann moman ki nou ti pe marse ki mon papa ti fer laverite antre dan mon leker.” (Det. 6:7) Nou swete ki ou osi ou ganny beni ler ou fer predikasyon form parti ou progranm lafanmiy sak semenn.