Ansenny ou Zanfan pour loue Zeova
1. Eski bann zanfan i kapab loue Zeova?
1 Psonm 148:12, 13 i ankouraz bann garson ek fiy pour loue non Zeova. I annan en kantite legzanp bann zanfan dan Labib ki ti fer sa. Par egzanp, “kan i ti ankor en pti garson, Samyel ti pe servi Zeova.” (1 Sam. 2:18) Se “en pti fiy” ki ti dir madanm Naamann ki profet Zeova an Izrael ti kapab geri lalep Naamann. (2 Rwa. 5:1-3) Kan Zezi ti antre dan tanp e fer bann gran mirak, se “bann zanfan” ki ti kriye: “Ozana Garson David!” (Mat. 21:15) Ki mannyer bann paran i kapab ansenny zot zanfan pour loue Zeova?
2. Akoz i enportan pour paran donn en bon legzanp zot zanfan?
2 Legzanp: Avan ki zot ti fer antre laverite dan leker zot zanfan, bann papa Izraelit ti ganny demande pour kontan Zeova premye e pour gard son komannman dan zot prop leker. (Det. 6:5-9) Si ou koz lo predikasyon dan en fason pozitif e fer li form parti ou progranm lasemenn, ou zanfan pou pli fasilman vwar predikasyon konman en keksoz enportan e satisfezan.
3. Ki lefe legzanp en paran ti annan lo en ser?
3 Avek lakontantman, en ser i rapel: “Kan mon ti pe grandi, nou progranm fanmiy ti enkli predikasyon tou le wikenn. Mon ti kapab vwar ki mon paran ti vreman kontan prese. Vreman predikasyon ti en keksoz gou pour nou anmezir ki nou ti grandi.” Alaz set an, sa ser ti vin en proklanmater non batize e i fer plis ki 32 an depi ki i dan servis aplentan.
4. Ki ou bezwen fer pour form ou zanfan progresivman?
4 En Formasyon progresif: Ler ou al predikasyon fer ou zanfan partisipe. Petet zot kapab tap laport, donn met lakour en trak, oubyen lir en verse Labib. Sa pou fer li pli gou e i pou ed zot ganny konfyans pour pres mesaz Rwayonm. Anmezir ki zot grandi, zot partisipasyon dan predikasyon i devret ogmante. Alors, ed zot pour progrese e pour mazin lo bann lobzektif spirityel ki zot kapab annan pour amelyor zot servis.
5. Ki en zanfan i bezwen pour vin en proklanmater non batize?
5 Koz avek bann ansyen ler ou santi ki ou zanfan in kalifye pour vin proklanmater non batize e ler zot eksprim zot dezir pour vin proklanmater. Si zot vin proklanmater, sa pou fer zot byen konpran zot responsabilite personnel pour loue Zeova. Gard antet ki en zanfan pa bezwen konn otan parey en adilt ki’n batize avan ki i kalifye pour vin en proklanmater. Eski ou zanfan i konpran bann lansennyman debaz lo Labib? Eski i atase avek bann standar moral dan Labib? Eski i anvi partisip dan predikasyon e ganny idantifye konman en Temwen Zeova? Si wi, bann ansyen pou kapab deside ki i vin en proklanmater non batize.—Vwar liv Organized to Do Jehovah’s Will, p. 79-82.
6. Akoz i vo lapenn pour bann paran form zot zanfan?
6 Ansenny bann zanfan pour loue Zeova avek tou zot leker i demann zefor. Sepandan, pa bokou keksoz ki fer bann paran vreman zwaye parey ler zot vwar zot zanfan pe progrese spirityelman. Pli enportan, Zeova i kontan ler i vwar bann zanfan pe koz lo son bann travay merveye.