Ed ou Zanfan progrese dan Predikasyon
1 Bann paran Kretyen i annan en gran responsabilite pour form zot zanfan dan predikasyon depi byen zenn. Sa i kapab ganny fer dan plizyer fason. Serten zanfan i kapab resit en verse Labib apropriye menm avan ki zot kapab lir. Sa i kapab fer en gran lefe lo bann ki pe ekoute. Anmezir ki sa bann zanfan i grandi, zot kapab fer plis dan predikasyon. Ki mannyer zot bann paran zot kapab ed zot zanfan pour partisipe ler pe donn en temwannyaz? Petet sa bann sizesyon swivan pou ed zot plis.
2 Apre ki ou’n dir bonzour, ou kapab dir:
◼ “Mon garson, [son non], ti pou kontan ou ekout en verse Labib enportan.” Ou zanfan i kapab dir: “Sa verse dan Psonm in fer mwan konn non Bondye. [Sa zanfan i lir oubyen i resit Psonm 83:18.] Sa magazin i koz lo sa ki Zeova pou fer pour nou. Mon kapab kit avek ou?” Ou kapab fini sa konversasyon par eksplike konman sa travay mondyal i ganny finanse.
3 Oubyen ou kapab esey sa lapros:
◼ “Bonzour. Mon pe montre mon fiy, [son non], pour montre lentere pour lezot dan kominote. I pou kontan partaz en pti mesaz sorti dan Labib avek ou.” I kapab dir: “En fason ki mon kontan ed dimoun i par partaz sa lespwar dan Labib pour lavenir avek zot. [Zanfan i lir oubyen i resit Revelasyon 21:4.] Sa magazin i eksplike ki Rwayonm Bondye pou fer pour nou. Mon krwar ou pou kontan pour lir.”
4 Ler bann zanfan i servi en prezantasyon senp toultan, sa i permet zot annan konfyans dan zot abilite pour partaz sa mesaz Rwayonm. Bann sesyon legzersis ki konsantre lo koz kler e koz for, pou ekip zot pour koz dan plizyer sitiasyon. En bon preparasyon davans ek felisitasyon senser pou ed bann zanfan eksprim zot lafwa.
5 Bokou zanfan in kalifye pour vin bann proklanmater ki pa ankor batize akoz zot in ganny en tel lankourazman. Pa i en lazwa pour vwar nou zanfan pe fer progre dan predikasyon!—Ps. 148:12, 13.