Servi byen Labib
1. Akoz Labib i vreman itil?
1 Kan nou servi byen Parol ki’n ganny enspire par Bondye, sa i permet nou pour anons e ansenny byen laverite e pour devwal bann fo lansennyman ek tradisyon zonm.—2 Tim. 2:15; 1 Pyer 3:15.
2. Kwa ki pou ed nou trouv bann verse pli byen?
2 Aprann konn ou Labib pli byen: Zis parey kan ou pe servi en nenport zouti, pli ou servi li pli ou pou konn servi li pli byen. Si ou lir Labib konmansman ziska finisyon ou pou ganny sa lide zeneral lo tenm Labib. Sa i osi kapab ed ou pour rapel bann verse e trouv zot fasilman. Anmezir ou konn pli byen bann verse Labib, ou pou koz avek plis lantouzyasm ek konviksyon kan ou pe donn temwannyaz enformel e dan predikasyon portanport.—1 Tesa. 1:5.
3, 4. (a) Ki serten fason ki nou kapab konn pli byen nou Labib? (b) Eski ou’n servi lezot fason pour konn bann verse pli byen?
3 Fer li en labitid pour ouver ou Labib e swiv ladan anmezir ki bann verse i ganny lir pandan renyon. Kan ou pe fer ou letid personnel e pe prepar renyon get bann verse ki ganny site e medit lo ki mannyer ou kapab met zot an pratik. Bokou in remarke ki kan zot lir bann verse direkteman dan Labib olye lir lo konpiter oubyen enprimen lo papye i fer li pli fasil pour zot trouv sa bann verse kan zot bezwen servi plitar dan predikasyon.—Zan 14:26.
4 Pour en pe letan serten fanmir in fer laranzman pour zot gard antet bann verse Labib. Sa i kapab ganny fer par servi bann pti papye, lo en kote ekrir sa verse e lo lot kote sa ki sa verse i dir. Sakenn son tour i servi sa bann pti papye pour esey vwar si zot kapab sit sa verse oubyen rapel kote i trouve dan Labib. Kan nou fer bann legzersis lo konman pour fer bann prezantasyon dan predikasyon e pour reponn en lobzeksyon oubyen en kestyon par servi Labib i osi fer nou ganny plis leksperyans.
5. Akoz nou anvi servi pli byen nou Labib?
5 Napa okenn lezot liv ki annan plis valer ki Labib. Zis dan Labib ki annan parol ki kapab fer dimoun ganny “lasazes ki kondir dan lavi eternel.” (2 Tim. 3:15) Vi ki lamazorite dimoun dan nou teritwar pa familye avek sa bann trezor presye ki trouve dan Labib, nou annan bon rezon pour ogmant nou abilite pour nou kapab montre zot sa ki Labib i annan pour ofer.—Prov. 2:1-5.