Bann minis Kretyen i bezwen priye
1. Kwa ki neseser pour nou akonplir nou minister?
1 Nou pa kapab depan lo nou menm pour akonplir nou minister. Zeova i donn nou lafors pour fer sa travay. (Fili. 4:13) I servi son bann lanz pour ed nou rod bann dimoun ki parey mouton. (Rev. 14:6, 7) Se Zeova ki fer lagrenn laverite ki nou plante e aroze pouse dan zot leker. (1 Kor. 3:6, 9) Pa i vreman enportan pour bann minis Kretyen depan lo nou Papa dan lesyel dan lapriyer!
2. Ki serten keksoz nou kapab priy lo la?
2 Priy pour nou menm: Nou devret priye sak fwa ki nou al prese. (Efe. 6:18) Ki serten keksoz nou kapab priy lo la? Nou kapab priye pour nou touzour annan en pwennvi pozitif lo nou teritwar e pour annan lardyes pour prese. (Akt 4:29) Nou kapab demann Zeova pour gid nou ver bann dimoun ki annan en leker senser pour nou kapab etidye Labib avek zot. Si sa met lakour i demann en kestyon, nou kapab fer en pti lapriyer an silans pour demann Zeova pour ed nou donn li en bon larepons. (Nee. 2:4) Nou osi kapab demann li pour donn nou lasazes ki nou bezwen pour touzour fer ki nou minister i vin premye dan nou lavi. (Zak 1:5) Deplis, Zeova i kontan kan nou eksprim nou rekonesans pour sa privilez ki i’n donn nou pour vin son bann minis.—Kol. 3:15.
3. Ki mannyer priy pour lezot i kapab fer avanse sa travay predikasyon?
3 Pour lezot: Nou devret “priy pour kanmarad,” menm mansyonn zot non kan i apropriye pour fer li. (Zak 5:16; Akt 12:5) Eski ou lasante i limit en pe sa ki ou kapab fer dan sa travay predikasyon? Alor priy pour lezot minis Kretyen ki annan en bon lasante. Pa zanmen souzestim lefe ki ou lapriyer i kapab annan! I osi byen pour priye ki bann lotorite i permet ki sa travay predikasyon i kontinyen ganny fer, pour ki nou bann frer i a “kapab viv en lavi trankil [e] anpe.”—1 Tim. 2:1, 2.
4. Akoz nou devret priye tou letan?
4 Anons sa bon nouvel partou dan lemonn pa en latas ki nou kapab depan lo nou prop lafors pour fer. Si nou “priye tou letan” nou pou kapab akonplir sa travay avek led Zeova.—Rom. 12:12.