Apresye sa privilez ki ou annan pour fer lapriyer

1. Ki mannyer nou devret santi konsernan lefet ki Zeova i permet nou pour koz avek li dan lapriyer?

SA ENN ki’n kree lesyel ek later, in donn nou sa zoli privilez pour koz avek li dan lapriyer. Zis mazin sa: Nou kapab koz avek Zeova nenport ler e dan nenport langaz san bezwen annan en lapwentman. Nou kapab annan konfyans ki nou Papa ki kontan nou pou tann nou lapriyer ki swa nou lopital oubyen dan prizon. Nou vreman apresye sa privilez ki nou annan.

2. Ki mannyer Lerwa David ti montre ki i apresye sa privilez ki i ti annan pour koz avek Zeova dan lapriyer?

² Lerwa David ti apresye sa privilez ki i ti annan pour koz avek Zeova dan lapriyer. I ti dir Zeova: “Ki mon lapriyer i parey lansan ki’n ganny prepare devan ou.” (Ps. 141:1, 2) Dan letan David, sa lansan spesyal ki bann pret ti servi dan ladorasyon pir ti ganny byen prepare. (Egz. 30:34, 35) Zis parey sa lansan ti ganny byen prepare, David ti anvi reflesir byen lo sa ki i ti pou dir Zeova dan lapriyer. Nou osi nou anvi fer sa. Nou anvi ki nou lapriyer i fer plezir Zeova.

3. Ki mannyer nou devret koz avek Zeova dan lapriyer e akoz?

³ Ler nou fer lapriyer, nou devret demontre respe pour Zeova. Reflesir lo bann vizyon ki Izai, Ezekyel, Danyel ek Zan ti gannyen. Sa bann vizyon ti diferan avek kanmarad me zot annan en keksoz ki parey. Zot tou zot dekrir Zeova konman en Lerwa ki glorye. Izai ti “vwar Zeova pe asize lo en tronn byen eleve.” (Iza. 6:1-3) Ezekyel ti vwar Zeova pe asize lo son saret dan lesyel. I ti “briye toultour. Sa lalimyer otour li ti parey en larkansyel dan nyaz.” (Ezek. 1:26-28, Labib an Kreol Seselwa) Danyel ti vwar “Ansyen bann Zour” dan en lenz blan e laflanm ti pe sorti avek son tronn. (Dan. 7:9, 10) Zan ti vwar Zeova pe asize lo en tronn e toultour sa tronn, i ti annan en zoli larkansyel ki ti briye parey en pyer emerod. (Rev. 4:2-4) Zeova i sitan glorye e napa personn ki parey li. Ler nou reflesir lo sa, i fer nou rapel ki i en gran privilez ki nou kapab koz avek li dan lapriyer e ki ler nou fer lapriyer, nou devret demontre respe pour li. Me ki mannyer nou devret priye?

“SE KOUMSA KI ZOT DEVRET PRIYE”

4. Ki nou aprann avek sa ki Zezi ti mansyonn premye dan lapriyer model ki dan Matye 6:9, 10?

⁴ Lir Matye 6:9, 10. Dan Sermon lo Montanny, Zezi ti montre son bann disip ki mannyer pour priy dan en fason ki fer plezir Bondye. Apre ki Zezi ti’n dir “se koumsa ki zot devret priye,” i ti mansyonn bann keksoz enportan avan setadir bann keksoz ki annan pour fer avek plan Bondye. Par egzanp, i ti demande ki non Zeova i ganny sanktifye, ki Rwayonm i vini pour detri tou bann ki opoz Bondye e i ti priy pour bann bon keksoz ki Bondye pou fer pour later ek bann imen dan lavenir. Ler nou mansyonn sa bann keksoz dan nou lapriyer, nou osi montre ki plan Bondye i enportan pour nou.

5. Eski i normal pour nou priy konsernan bann keksoz personnel?

⁵ Dan lot bout sa lapriyer, Zezi ti montre ki i normal pour priy konsernan bann keksoz personnel. Nou kapab demann Zeova pour donn nou nou manze toulezour, pardonn nou nou bann pese, ed nou pour ki nou pa fer pese e protez nou kont sa enn move. (Mat. 6:11-13) Ler nou priy konsernan sa bann keksoz, nou pe montre Zeova ki nou konnen ki nou bezwen son led e ki nou anvi fer li plezir.

6. Eski nou devret priy konsernan zis sa bann keksoz ki dan lapriyer model? Eksplike.

⁶ Zezi pa ti ekspekte ki son bann disip i dir egzakteman sa ki i ti dir dan sa lapriyer model. Dan lezot lapriyer ki Zezi ti fer, i ti mansyonn lezot keksoz ki ti enportan pour li dan sa moman. (Mat. 26:39, 42; Zan 17:1-26) Pareyman, nou osi nou kapab priy konsernan lezot keksoz ki fer nou enkyet. Ler nou annan en desizyon pour fer, nou kapab demann Zeova lasazes e pour ed nou konpran ki desizyon nou pou fer. (Ps. 119:33, 34) Ler nou pe al konmans en servis ki difisil, nou kapab demann Zeova pour ed nou konpran ki mannyer pour fer sa servis. (Prov. 2:6) Paran i kapab priy pour zot zanfan e zanfan i kapab priy pour zot paran. Nou tou nou devret priy pour nou bann etidyan Labib e pour bann ki nou anons sa bon nouvel avek. Byensir nou pa devret zis demann Zeova keksoz, i annan lezot keksoz ki nou devret fer.

7. Akoz nou devret loue Zeova ler nou fer lapriyer?

⁷ Ler nou fer lapriyer, nou devret rapel pour loue Zeova. Napa personn ki merit ganny loue parey nou Bondye. I “bon e pare pour pardonnen.” I en Bondye “ki pran pitye e annan konpasyon, ki pa ankoler vitman e ki annan bokou lanmour fidel ek fidelite.” (Ps. 86:5, 15) Nou annan bon rezon pour loue Zeova pour sa ki i ete e pour sa ki i fer.

8. Ki serten keksoz ki nou kapab remersye Zeova? (Psonm 104:12-15, 24)

⁸ Apard ki loue Zeova, nou devret osi remersye li pour bann bon keksoz ki i donn nou. Par egzanp nou kapab remersye li pour bann fler diferan kouler, pour sa gran varyete bon manze e pour bann bon zanmi ki nou annan. Nou Papa ki kontan nou i donn nou sa bann keksoz e plis ankor akoz i anvi fer nou zwaye. (Lir Psonm 104:12-15, 24.) Me pli enportan, nou remersye Zeova pour sa kantite manz spirityel ki i donn nou e sa zoli lespwar pour lavenir.

9. Kwa ki kapab ed nou pour rapel pour remersye Zeova? (1 Tesalonisyen 5:17, 18)

⁹ Parfwa i fasil pour nou oubliye remersye Zeova pour tou sa ki i’n fer pour nou. Kwa ki kapab ed ou pour rapel? Ou kapab fer en lalis bann diferan keksoz ki ou’n priy lo la e tanzantan ou kapab tyek sa lalis pour vwar ki mannyer Zeova in reponn ou lapriyer. Apre fer en lapriyer pour remersye li pour son led. (Lir 1 Tesalonisyen 5:17, 18.) Reflesir lo sa: Nou kontan e apresye ler lezot i remersye nou pour en keksoz ki nou’n fer. Pareyman, Zeova osi i kontan ler nou remersye li pour reponn nou lapriyer. (Kol. 3:15) Me i annan en lot rezon enportan akoz nou remersye nou Bondye.

REMERSYE ZEOVA POUR SON GARSON

10. Dapre 1 Pyer 2:21, akoz nou annan rezon pour remersye Zeova pour anvoy Zezi lo later?

¹⁰ Lir 1 Pyer 2:21. Nou devret remersye Zeova pour anvoy son Garson pour ansenny nou. Ler nou etidye lo lavi Zezi, nou aprann en kantite keksoz lo Zeova e lo ki mannyer nou kapab fer li plezir. Si nou demontre lafwa dan sakrifis Kris, nou kapab annan en bon lanmitye avek Zeova e nou pou anpe avek Li.​—Rom. 5:1.

11. Akoz nou priy o non Zezi?

¹¹ Nou remersye Zeova ki nou kapab koz avek li dan lapriyer atraver son Garson. Zezi i sa mwayen ki Zeova i servi pour donn nou sa ki nou’n demande. Zeova i ekout e reponn bann lapriyer ki ganny fer o non Zezi. Zezi ti dir: “Mon pou fer sa ki zot demande an mon non, pour ki mon Papa i ganny glorifye atraver son Garson.”​—Zan 14:13, 14.

12. Ki en lot rezon pour remersye Zeova pour lefet ki i’n donn nou son Garson?

¹² Sakrifis Zezi i fer li posib pour Zeova pardonn nou pese. Labib i dir ki Zezi i nou “granpret . . . e i [pe] asiz dan kote drwat tronn Bondye dan lesyel.” (Ebr. 8:1) Zezi i nou “asistan ki avek nou Papa.” (1 Zan 2:1) Nou vreman rekonesan ki Zeova in donn nou en Granpret ki konpran ki nou enparfe e ki “pled pour nou.” (Rom. 8:34; Ebr. 4:15) Vi ki nou enparfe, nou pa ti pou kapab koz avek Zeova dan lapriyer san sakrifis Zezi. Ou pou dakor ki nou pa pou kapab remersye Zeova ase pour lefet ki i’n donn nou son Garson konman kado!

PRIY POUR OU BANN FRER EK SER

13. Sa zour swar avan Zezi i mor, ki mannyer i ti montre ki i kontan son bann disip?

¹³ Sa zour swar avan Zezi i mor, i ti priy pour en kantite letan. I ti priy konsernan son bann disip e i ti demann son Papa pour “vey lo zot akoz sa enn move.” (Zan 17:15) Sa ti montre ki kantite Zezi ti kontan son bann disip. Menm si i ti konnen ki i ti pe al soufer en kantite, i ti enkyet pour son bann zapot.

14. Ki mannyer nou kapab montre ki nou kontan nou bann frer ek ser?

¹⁴ Parey Zezi, nou pa mazin zis lo bann keksoz ki nou bezwen. O kontrer, nou priy pour nou bann frer ek ser regilyerman. Ler nou fer sa, nou pe obei sa lord ki Zezi ti donn nou pour kontan kanmarad e nou montre Zeova ki kantite nou kontan nou bann frer ek ser. (Zan 13:34) Ler nou priy pour nou bann frer ek ser, sa pa en gaspiyaz letan. Parol Bondye i dir nou ki “siplikasyon en zonm drwat i annan bokou lefe.”​—Zak 5:16.

15. Akoz nou bann frer ek ser i bezwen nou lapriyer?

¹⁵ Nou bann frer ek ser i bezwen nou lapriyer parski zot fer fas avek en kantite problenm. Nou kapab demann Zeova pour ed zot fer fas avek maladi, dezas natirel, lager, persekisyon ek lezot problenm. Nou kapab osi priy pour bann frer ek ser ki travay dir pour ed bann ki dan bezwen. Eski ou konn serten frer ek ser ki pe fer fas avek bann problenm en pe parey? Petet ou kapab mansyonn zot non dan ou lapriyer. Nou montre ki nou vreman kontan nou bann frer ek ser ler nou demann Zeova pour ed zot andire.

16. Akoz nou devret priy pour bann ki pe dirize dan kongregasyon?

¹⁶ Bann ki pe dirize dan kongregasyon i vreman apresye ler nou mansyonn zot dan nou lapriyer e nou bann lapriyer i ed zot. Zapot Pol ti santi parey. I ti dir: “Priy osi pour mwan, pour ki ler mon pe koze, mon kapab ganny sa abilite pour koz avek lardyes pour fer konn sen sekre sa bon nouvel.” (Efe. 6:19) Ozordi, nou osi nou annan en kantite frer ki pe travay dir pour diriz kongregasyon. Nou montre ki nou kontan zot ler nou demann Zeova pour siport zot dan zot travay.

LER OU GANNY DEMANDE POUR FER LAPRIYER POUR LEZOT AN PIBLIK

17-18. Kan ki nou kapab ganny demande pour fer lapriyer pour lezot an piblik e ki nou devret gard antet?

¹⁷ Parfwa, nou ganny demande pour fer lapriyer pour lezot an piblik. Par egzanp, en ser ki pe kondwir en letid Labib i kapab demann sa ser ki pe akonpanny li pour fer lapriyer. Petet sa ser pa konn sa etidyan byen. Alor i kapab ki i pou pli anvi fer lapriyer a lafen sa letid. Koumsa i pou pli fasil pour li konnen ki i pour dir ler i pe priy pour sa etidyan.

¹⁸ En frer i kapab ganny demande pour fer lapriyer dan renyon predikasyon ouswa dan renyon kongregasyon. Bann frer ki annan sa privilez i devret gard antet bi nou bann renyon. Lapriyer pa devret ganny servi pour donn konsey kongregasyon ouswa pour fer bann lanons. Pour laplipar renyon kongregasyon, i annan senk minit ki ganny rezerve pour sant kantik e fer lapriyer. Alor sa frer ki fer lapriyer pa devret fer en “gran lapriyer” sirtou o konmansman en renyon.​—Mat. 6:7.

FER LAPRIYER EN KEKSOZ ENPORTAN DAN OU LAVI

19. Kwa ki pou ed nou prepare pour zour zizman Zeova?

¹⁹ Anmezir ki zour zizman Zeova i aprose, nou bezwen fer lapriyer vin pli enportan dan nou lavi. I pour sa rezon ki Zezi ti dir: “Reste eveye, toultan sipliy Bondye pour ki zot a kapab sap tou sa bann keksoz ki devret arive.” (Lik 21:36) Si nou fer lapriyer regilyerman, nou lafwa pou vin pli for e nou pou pare ler zizman Bondye i arive.

20. Ki mannyer nou lapriyer i kapab vin parey lansan ki santi bon?

²⁰ Ki nou’n diskite dan sa lartik? Nou vreman apresye sa privilez ki nou annan pour koz avek Zeova dan lapriyer. Bann keksoz pli enportan ki nou devret priy lo la, i bann keksoz ki annan pour fer avek lavolonte Zeova. Nou osi remersye Zeova pour son Garson ek son Rwayonm e nou priy pour nou bann frer ek ser. Byensir, nou kapab priy pour bann keksoz ki nou bezwen e pour demann Zeova pour ed nou gard nou lafwa for. Ler nou reflesir lo sa ki nou dir dan nou lapriyer, nou montre ki nou apresye sa zoli privilez. Pour Zeova, nou bann parol pour parey lansan ki santi bon e sa pou “fer Li plezir.”​—Prov. 15:8.