Kwen kestyon
◼ Avan ki en proklanmater i ganny aksepte pour batize, ziska ki degre i devret pe asiste renyon e partisip dan predikasyon?
Batize i sa pli gro desizyon ki en dimoun i fer. Alor, avan ki en dimoun i ganny aksepte pour batize, i devret annan en bon konprenezon lo sa ki Bondye i ekspekte avek li. An plis ki sa, i devret pare pour demontre son determinasyon pour viv dapre standar Bondye.
Bann Kretyen i ganny ankouraze pour pa abandonn zot rasanbleman, alor en proklanmater ki pa ankor batize i devret deza pe asiste renyon regilyerman. (Ebr. 10:24, 25) An zeneral, i devret osi pe reponn dan renyon. Menm si i pa en lobligasyon, me i ti a byen si i en zelev dan Lekol Minister Teokratik.
Deplis, vi ki bann Kretyen i annan sa lord pour pres sa bon nouvel Rwayonm e fer disip, en proklanmater ki pa ankor batize i devret pe partisip regilyerman dan predikasyon avan ki i batize. (Mat. 24:14; 28:19, 20) Pour konbyen letan i devret pe prese avan i kapab batize? Normalman, i devret ganny donnen ase letan pour demontre ki i determinen pour partisip regilyerman e avek devouman dan predikasyon tou le mwan. (Ps. 78:37) Me, i pa devret tro bokou letan depi ki i’n konmans prese ziska ki i kalifye pour batize, petet zis detrwa mwan. Ki kantite erdtan i devret pe mete lo son rapor? Napa okenn lareg strik pour sa. Bann ansyen i devret egzamin sirkonstans personnel sak proklanmater e zot devret rezonnab e ekilibre.—Lik 21:1-4.
Bann ansyen (ouswa asistan ministeryel dan kongregasyon kot i annan en ptigin ansyen) ki zwenn avek bann kandida batenm i devret rapel ki sak dimoun i diferan, e zot devret annan bon zizman pour konnen si en proklanmater i kalifye pour batize. Bann ansyen i devret ekspekte ki i annan sa vre dezir pour vin en Temwen Zeova e pour demontre lapresyasyon pour sa privilez pour asosye avek lorganizasyon Zeova e partisip dan minister. Bann ansyen i devret konpran si i pa ankor vin matir spirityelman ouswa ganny serten abilite ki bann evanzelizater batize ki eksperyanse i annan. Si bann ansyen i santi ki sa kandida pa ankor kalifye pour batize, zot devret zantiman dir li akoz dapre Labib e ed li pour ganny led spirityel neseser.