Ed bann etidyan pour vin proklanmater sa bon nouvel Rwayonm
1 Sa travay ki Zezi ti demann son bann disip pour fer, parey i ganny dekrir dan Matye 28:19, 20, ti en travay ki ti pou ariv lo en gran lesel. Bann disip Kris ti ganny demande pour fer plis disip, e an retour sa bann nouvo disip ti pou osi fer lezot disip. Pandan sa letan lafen ki nou pe viv, ki en letan spesyal, en fondasyon ti pou ganny mete pour termin sa travay kot nou pe anons sa bon nouvel Rwayonm Bondye.—Mat. 24:14.
2 Nou etidyan Labib i kapab nou prop zanfan oubyen lezot ki anvi etidye Labib avek nou. Nou vreman anvi ed zot pour aksepte sa responsabilite ki sak dimoun i annan, savedir pour ed lezot vin disip Zezi Kri.—Lik 6:40.
3 Prepar zot pour donn en temwannyaz: Ankouraz ou bann etidyan pour partaz sa ki zot pe aprann avek lezot. Rakont zot bann leksperyans byen ankourazan ki’n arive dan predikasyon. Form ou zanfan depi ptipti pour donn tou sa ki i kapab dan predikasyon dapre son abilite. (Ps. 148:12, 13) Montre zot par ou parol ek legzanp ki ou kontan predikasyon.—1 Tim. 1:12.
4 Zeova i selman servi sa bann ki aksepte e viv annakor avek son bann standar drwat. Byensir, bann nouvo proklanmater pa konn otan parey bann ki eksperyanse, ki’n dedye zot lavi avek Bondye e ki proklanmater batize. Me bann nouvo i bezwen krwar e kapab ansenny lansennyman debaz dan Labib. (Vwar Organized, paz 79-82.) Zot in konpletman sorti dan “Gran Babilonn” e nepli enplike dan politik. Bann nouvo i osi bezwen pe asiste renyon avek kongregasyon regilyerman.—Rev. 18:2, 4; Zan 17:16; Ebr. 10:24, 25.
5 Deswit apre ki ou krwar ki enn ou etidyan i kapab vin en proklanmater non batize, ou devret koz avek sirveyan prezidan lo la. Apre i pou kapab fer laranzman pour ki de ansyen i zwenn avek ou ek ou etidyan pour vwar si i vreman kalifye konman en proklanmater non batize sa bon nouvel Rwayonm, pour pres avek kongregasyon. Apre ou pou ganny sa privilez pour kontinyen form ou etidyan kan i sorti avek ou dan predikasyon.