Akoz non Zeova i sitan enportan pour Zezi?

1-2. (a) Ki Zezi ti fer sa zour swar avan i mor? (b) Ki nou pou vwar dan sa lartik?

ZEDI swar le 14 Nizan lannen 33, Zezi ti fer en repa spesyal avek son bann zapot fidel. Zezi ti konnen ki byento i ti pou al ganny trai, zize, kondannen, tortire e apre ganny touye. Alor ler zot ti’n fini sa repa, Zezi ti dir son bann zapot bann parol ankourazan. Me pa bokou letan avan ki zot ti kit sa lasanm, Zezi ti fer en lapriyer vreman enportan. Nou kapab lir sa lapriyer dan Zan sapit 17.

² Ki lapriyer Zezi i montre nou konsernan sa ki ti lo lespri Zezi avan i mor? Ki mannyer sa lapriyer i montre nou sa ki ti enportan pour Zezi ler i ti lo later? Annou vwar larepons sa bann kestyon.

“MON’N FER ZOT KONN OU NON”

3. Ki Zezi ti dir konsernan non Zeova e ki i ti pe esey dir? (Zan 17:6, 26)

³ Dan son lapriyer, Zezi ti dir: “Mon’n fer zot konn ou non.” Anfet, Zezi ti dir sa de fwa. (Lir Zan 17:6, 26.) Me ki i ti pe esey dir? Eski i ti eksplik son bann disip ki non Bondye i Zeova? Son bann disip ti bann Zwif alor zot ti deza konnen ki Bondye i apel Zeova. Sa non i dan Lekritir Ebre apepre 7,000 fwa. Alor Zezi pa ti pe ansenny zot ki non Bondye i Zeova. O kontrer i ti pe ansenny zot konsernan sa kalite Bondye ki Zeova i ete. Zezi ti’n ed son bann disip pour konn Zeova pli byen. Sa ti enkli plan Zeova pour later ek bann imen, sa ki Zeova in fer e pou fer e osi bann zoli kalite ki Zeova i annan. Zis Zezi ki konn Zeova sitan byen koumsa.

4-5. (a) Ki mannyer non en dimoun i kapab vin pli presye pour nou? Donn en legzanp. (b) Ki mannyer bann disip Zezi ti aprann konn Zeova pli byen?

⁴ Annou vwar en legzanp ki pou ed nou konpran lafason ki Zezi ti ed son bann disip pour konn Zeova pli byen. Meton i annan en ansyen dan ou kongregasyon ki apel David ki osi en sirizyen. Ou’n konn li pour plizyer lannen. Me en zour, ou fer en aksidan loto e ou ganny anmennen dan sa lopital kot i travay. David i sa sirizyen ki pran swen avek ou e i sov ou lavi. Aprezan ou kontan li plis ki oparavan e ler ou tann son non, sa i fer ou mazin sa ki i’n fer pour ou. Aprezan David pa zis en ansyen ki ou konnen depi lontan me i osi sa sirizyen ki ti sov ou lavi.

⁵ I menm parey pour bann disip Zezi. Zot ti deza konnen ki Bondye i apel Zeova me sa non ti vin pli presye pour zot parski Zezi ti ed zot pour konn Zeova pli byen. Akoz nou kapab dir sa? Parski Zezi ti imit son Papa dan tou sa ki i ti dir e fer. Alor bann zapot Zezi ti aprann “konn” Zeova pli byen ler zot ti ekout lafason ki Zezi ti ansennyen e ler zot ti vwar lafason ki Zezi ti tret bann dimoun.—Zan 14:9; 17:3.

“OU NON KI OU’N DONN MWAN”

6. Ki Zezi ti pe dir ler i ti dir ki Zeova in donn li son non? (Zan 17:11, 12)

⁶ Dan son lapriyer, Zezi ti osi priy pour son bann disip. I ti dir: “Vey lo zot akoz ou non ki ou’n donn mwan.” (Lir Zan 17:11, 12.) Eski sa ti vedir ki aprezan Zezi ti pou osi ganny apele Zeova? Non. Ler Zezi ti koz konsernan non Zeova, i ti dir “ou non.” Sa i montre ki Zezi pa ti pou ganny apele Zeova. Alor, ki Zezi ti pe esey dir ler i ti dir “ou non ki ou’n donn mwan”? Premyerman, Zeova ti’n anvoy Zezi pour reprezant li e pour koz pour li. I ti’n vin lo later o non son Papa e i ti pe fer bann mirak o non son Papa. (Zan 5:43; 10:25) Dezyenmman, non Zezi i vedir “Zeova i sover.” Alor, dan sinifikasyon non Zezi i annan non Zeova.

7. Akoz Zezi ti kapab koz o non Zeova? Eksplike.

⁷ Pour ed nou konpran akoz Zezi ti kapab koz o non Zeova, annou vwar en legzanp. En dirizan i kapab anvoy en anbasader pour reprezant li e pour koz pour li. Alor ler sa anbasader i koze, son parol i annan menm lotorite avek sa ki pour sa dirizan. Dan menm fason, Zezi ti reprezant Zeova e i ti koz o non son Papa.—Mat. 21:9; Lik 13:35.

8. Akoz Zeova ti dir ki Zezi i port son non menm avan ki Zezi ti vin lo later? (Egzod 23:20, 21)

⁸ Dan Labib, Zezi i ganny apele Parol parski Zeova ti servi li pour donn lenformasyon ek lenstriksyon avek bann lanz ek bann imen. (Zan 1:1-3) I tre probab ki Zezi ti sa lanz ki Zeova ti anvoye pour pran swen avek bann Izraelit ler zot ti dan dezer apre ki zot ti’n kit Lezip. Ler Zeova ti dir bann Izraelit akoz zot devret obeir sa lanz, Zeova ti dir: “Parski i port mon non.”a (Lir Egzod 23:20, 21.) Zeova ti dir sa parski Zezi ti pe reprezant li e i ti sa personnaz prensipal ki ti montre ki tou sa ki Zeova i fer i byen e ki non Zeova i sen.

“PAPA GLORIFYE OU NON”

9. Ki kantite non Zeova ti enportan pour Zezi? Eksplike.

⁹ Parey nou’n vwar, menm avan ki Zezi ti vin lo later, non Zeova ti vreman enportan pour li. I ti menm parey ler i ti vin lo later. I pour sa rezon ki tou sa ki i ti fer, ti annan pour fer avek non Zeova. Ver lafen son lavi lo later, Zezi ti dir Zeova: “Papa glorifye ou non.” Deswit son Papa ti reponn avek en lavwa for sorti dan lesyel: “Mon’n glorifye li e mon pou glorifye li ankor.”—Zan 12:28.

10-11. (a) Ki mannyer Zezi ti glorifye non Zeova? (Vwar portre.) (b) Akoz Zezi ti bezwen sanktifye non Zeova e defann Son repitasyon?

¹⁰ Zezi ti osi glorifye non son Papa. Ki mannyer i ti fer sa? En fason, i par koz avek lezot konsernan bann zoli kalite ki son Papa i annan ek bann keksoz merveye ki I’n fer. Me i ti osi fer en lot keksoz. Zezi ti bezwen sanktifye non Zeova e defann repitasyon Bondye pour montre ki tou sa ki Satan in dir lo Li i bann mansonz.b Zezi ti montre son bann disip ki kantite sa i enportan ler i ti ansenny zot sa lapriyer model. I ti dir: “Nou Papa ki dan lesyel, ki ou non i ganny sanktifye.”—Mat. 6:9.

¹¹ Akoz Zezi ti bezwen sanktifye non Zeova e montre ki tou sa ki Zeova i fer i byen? Parski dan zarden Edenn, Satan ti dir bann mansonz lo Zeova. Satan ti dir konmkwa ki Zeova i en manter e ki i pe priv Adan ek Ev en bon keksoz. (Zen. 3:1-5) Satan ti osi donn lenpresyon ki fason fer Zeova pa byen. Sa bann mansonz ki Satan in dir, in sali repitasyon oubyen non Zeova. Pli tar, dan letan Zob, Satan ti dir ki bann serviter Zeova, i servi Zeova zis pour sa ki zot kapab gannyen. Sa manter ti osi dir ki dimoun pou aret servi Zeova ler zot fer fas avek difikilte parski zot pa vreman kontan Zeova. (Zob 1:9-11; 2:4) I ti pou pran letan pour montre si Zeova ki ti en manter oubyen si Satan ki ti en manter.

“MON PARE POUR DONN MON LAVI”

12. Vi ki Zezi ti kontan non Zeova, ki i ti pare pour fer?

¹² Zezi ti kontan Zeova en kantite alor i ti anvi fer tou sa ki i ti kapab pour sanktifye non Zeova e defann Son repitasyon. I ti dir: “Mon pare pour donn mon lavi.” (Zan 10:17, 18) I kler ki i ti menm pare pour mor pour non Zeova.c Adan ek Ev ti sa de premye imen e zot ti parfe. Me zot ti dezobei Zeova e pran kote avek Satan. De lot kote, Zezi ti pare pour vin lo later e demontre son lanmour pour Zeova. I ti fer sa par obeir Zeova dan tou sa ki i ti dir e fer. (Ebr. 4:15; 5:7-10) I ti reste fidel avek Zeova ziska ki i ti mor lo en poto martir. (Ebr. 12:2) Dan sa fason, i ti montre ki i kontan Zeova ek Son non.

13. Akoz Zezi ti dan sa pli bon pozisyon pour montre ki Satan i en manter? (Vwar portre.)

¹³ Par lafason ki Zezi ti viv son lavi, i ti montre ki Satan ki ti en manter e pa Zeova! (Zan 8:44) Zezi i konn Zeova pli byen ki okenn lezot dimoun e i ti pou konnen si bann keksoz ki Satan ti’n dir i vre. Me Zezi ti determinen pour defann repitasyon Zeova. Menm ler i ti paret ki Zeova ti’n abandonn li, Zezi ti pare pour mor olye dezobei son Papa.—Mat. 27:46.d

“MON’N FINI SA TRAVAY KI OU’N DONN MWAN”

14. Ki mannyer Zeova ti rekonpans Zezi pour son fidelite?

¹⁴ Dan sa lapriyer ki Zezi ti fer sa zour swar avan i mor, i ti dir: “Mon’n fini sa travay ki ou’n donn mwan pour fer.” Zezi ti annan konfyans ki Zeova ti pou rekonpans li pour lefet ki i ti’n reste fidel e Zezi ti annan rezon pour annan konfyans dan Zeova. (Zan 17:4, 5) Zeova pa ti kit li dan latonm. (Akt 2:23, 24) I ti resisit Zezi e donn li en pozisyon pli siperyer dan lesyel. (Fili. 2:8, 9) Pli tar, Zezi ti konmans dirize konman lerwa dan Rwayonm Bondye. Ki sa Rwayonm pou fer? Zezi ti donn larepons ler i ti ansenny son bann disip sa lapriyer model. I ti dir: “Ki ou Rwayonm i vini. Ki ou lavolonte i ganny fer lo later parey dan lesyel.”—Mat. 6:10.

15. Ki lezot keksoz Zezi pou fer?

¹⁵ Dan lavenir, Zezi pou lager avek bann lennmi Bondye e i pou detrir zot pandan lager Armagedon. (Rev. 16:14, 16; 19:11-16) Pa bokou letan apre sa, Zezi pou zet Satan dan “labim” kot Satan pou ganny anprizonnen e i pa pou kapab fer nanryen. (Rev. 20:1-3) Apre sa, Zezi pou dirize pour mil an. Pandan sa letan, i pou fer ki i annan lape lo later ankor e i pou ed bann imen pour vin parfe. I pou osi resisit bann dimoun mor. I pou fer later antye vin en paradi. Plan Zeova pour later pou’n ganny akonplir.—Rev. 21:1-4.

16. Ki mannyer lavi pou ete apre sa mil an ki Zezi pou’n dirize?

¹⁶ Ki mannyer lavi pou ete apre sa mil an ki Kris pou’n dirize? Imen pou nepli fer pese e zot pou nepli enparfe. Imen pou nepli bezwen sa ranson parski zot pou nepli bezwen demann pardon pour zot pese. Zot pou osi nepli bezwen sa 144,000 pou servi konman pret e zot pou nepli bezwen Zezi konman Granpret pour zot kapab annan en lanmitye avek Zeova. Osi, “dernyen lennmi, lanmor, [pou’n] ganny detrir.” Bann dimoun ki’n mor pou’n ganny resisite. Tou dimoun lo later pou parfe.—1 Kor. 15:25, 26.

17-18. (a) Ki pou arive a lafen sa mil an ki Zezi pou’n dirize? (b) Ki Zezi pou fer ler son letan pour dirize in fini? (1 Korentyen 15:24, 28) (Vwar portre.)

¹⁷ Ki lezot keksoz ki pou arive apre sa mil an ki Zezi pou’n dirize? En keksoz vreman spesyal pou arive. Personn pa pou zanmen doute ki Zeova i sen e ki i en Bondye ki zis. Akoz? Dan zarden Edenn, Satan ti dir ki Zeova i en manter e ki i pa diriz bann imen avek lanmour. Depi sa letan, bann serviter Zeova in montre plizyer fwa ki fason fer Zeova i pli bon e a lafen sa mil an ki Kris pou’n dirize, tou dimoun pou konnen ki tou sa ki Satan in dir lo Zeova i bann mansonz. Zeova pou’n montre ki i en Papa ki kontan son bann serviter e nou pou napa okenn rezon pour dout sa.

¹⁸ Apre sa mil an, tou dimoun pou konnen ki tou sa ki Satan in dir lo Zeova i bann mansonz. Ki Zezi pou fer ler son letan pour dirize in fini? Eski i pou fer sa ki Satan ti fer e rebel kont Zeova? Non! (Lir 1 Korentyen 15:24, 28.) Zezi pou rann Rwayonm avek son Papa. I pou soumet anba dominasyon Zeova. I pa pou fer parey Satan me i pou pare pour donn tou lotorite Zeova parski i kontan Zeova.

19. Ki non Zeova i vedir pour Zezi?

¹⁹ Nou kapab konpran akoz Zeova ti pare pour donn Zezi Son non. Zezi ti reprezant son Papa dan en fason parfe. Alor ki non Zeova i vedir pour Zezi? Non Zeova i sa keksoz pli enportan pour Zezi. I ti pare pour mor pour sa non e i pou pare pour rann Zeova tou keksoz apre sa mil an ki i’n dirize. Ki mannyer nou kapab swiv legzanp Zezi? Nou pou vwar larepons sa kestyon dan sa lartik ki swiv.