LARTIK LETID 23
KANTIK 2 Zeova i ou non
Non Zeova i enportan pour nou
“La sa ki Zeova i dir, ‘Zot mon bann temwen.’”—IZA. 43:10.
TOPIK
Nou pou vwar ki nou kapab fer pour sanktifye non Zeova e defann non Zeova.
1-2. Ki mannyer nou konnen ki non Zeova i enportan pour Zezi?
NON Zeova i sa keksoz pli enportan pour Zezi. Zezi i sa enn ki’n fer plis pour ed dimoun konn non Zeova. Parey nou’n vwar dan sa lartik avan, Zezi ti pare pour mor pour sanktifye non Zeova e pour montre ki fason fer Zeova i sa enn ki pli bon. (Mark 14:36; Ebr. 10:7-9) Apre sa mil an ki Zezi pou’n dirize, i pou rann Zeova tou lotorite parski i anvi ki Zeova i ganny tou laglwar. (1 Kor. 15:26-28) Tou sa ki Zezi in fer pour Zeova i montre ki Zezi i kontan Zeova en kantite.
2 Zezi ti vin lo later o non son Papa, setadir pour dir dimoun tou bann keksoz ki Zeova ti anvi zot konnen. (Zan 5:43; 12:13) I ti fer son bann disip konn non son Papa. (Zan 17:6, 26) Ler i ti ansennyen e fer bann mirak, i ti fer kler ki i ti Zeova ki ti’n donn li sa lasazes ek pouvwar pour fer sa bann keksoz. (Zan 10:25) Dan en lapriyer, Zezi ti demann Zeova pour vey lo son bann disip. Zezi ti demann Zeova pour fer sa “akoz [Son] non.” (Zan 17:11) I kler ki non Bondye ti sa keksoz pli enportan pour Zezi. Alor ki mannyer en dimoun ki dir i en Kretyen pa konn oubyen pa servi non Zeova?
3. Ki nou pou vwar dan sa lartik?
3 Konman bann Kretyen ki swiv legzanp Zezi, nou montre ki non Zeova i presye pour nou. (1 Pyer 2:21) Dan sa lartik, nou pou vwar ki mannyer non Zeova i idantifye bann ki pe anons “sa bon nouvel lo Rwayonm.” (Mat. 24:14) Nou pou osi vwar ki non Zeova i devret vedir pour sakenn parmi nou.
“EN PEP POUR SON NON”
4. (a) Ki Zezi ti demann son bann disip pour fer avan i retourn dan lesyel? (b) Ki kestyon sa i fer nou demande?
4 Zis avan ki Zezi ti retourn dan lesyel, i ti dir son bann disip: “Zot pou ganny pwisans ler lespri sen pou desann lo zot. Zot pou vin mon bann temwen Zerizalenm, partou dan Zide ek Samari e ziska dan bann landrwa pli elwannyen lo later.” (Akt 1:8) Sa i montre ki sa bon nouvel ti pou ganny anonse partou, pa zis Izrael. Avek letan, dimoun partou dan lemonn ti pou ganny sa loportinite pour vin disip Zezi. (Mat. 28:19, 20) Me Zezi ti dir: “Zot pou vin mon bann temwen.” Eski sa bann nouvo disip ti pou bezwen konn non Zeova oubyen zot pou bezwen zis vin bann temwen Zezi? Sa ki ganny dir dan Akt sapit 15 i ed nou konn larepons sa kestyon.
5. Ki mannyer bann zapot ek bann ansyen Zerizalenm ti montre ki tou dimoun ti bezwen konn non Zeova? (Vwar portre.)
5 Lannen 49, bann zapot ek bann ansyen Zerizalenm ti zwenn ansanm pour diskite si bann dimoun ki pa ti Zwif ti bezwen sirkonsi pour zot kapab vin Kretyen. Apre ki zot ti’n fini diskite, Zak, ki ti demi frer Zezi, ti dir: “[Pyer] in rakont an detay ki mannyer, pour premye fwa, Bondye in aksepte pour rasanble bann dimoun parmi lezot nasyon pour ki zot vin en pep pour son non.” Non lekel ki Zak ti pe koz lo la? Apre i ti sit sa ki profet Amos ti dir: “Pour ki bann zonm ki reste, ansanm avek dimoun lezot nasyon, bann ki port mon non, i kapab rod Zeova avek devouman. Sanmenm sa ki Zeova in dir.” (Akt 15:14-18) Sa bann nouvo disip ti pou aprann konsernan Zeova e zot ti pou osi ‘port son non.’ Sa i vedir ki zot ti pou fer lezot konn non Bondye e dimoun ti pou konn zot konman bann ki reprezant sa non.
Pandan en renyon konsey direkter dan premye syek, sa bann zonm fidel ti konpran ki bann Kretyen i en pep pour non Bondye (Vwar paragraf 5)
6-7. (a) Akoz Zezi ti vin lo later? (b) Ki sa rezon pli enportan Zezi ti vin lo later?
6 Non Zezi i vedir “Zeova i sover” e Zezi i sa mwayen ki Zeova i servi pour sov tou dimoun ki annan lafwa. Zezi ti vin lo later pour donn son lavi pour bann imen. (Mat. 20:28) Ler Zezi ti pey sa ranson, i ti fer li posib pour bann imen ganny sove e ganny lavi eternel.—Zan 3:16.
7 Me akoz bann imen ti bezwen sa ranson? Zot ti bezwen sa ranson akoz sa ki ti arive dan zarden Edenn. Parey nou’n vwar dan sa lartik avan, Adan ek Ev ki ti sa premye koup imen, ti rebel kont Zeova e sa ti fer ki zot ti perdi sa loportinite pour viv pour touzour. (Zen. 3:6, 24) Alor Zezi ti vin lo later pour sov bann desandans Adan ek Ev. Me Zezi ti osi vin lo later pour fer en keksoz pli enportan. Rapel ki dan zarden Edenn, Satan ti dir bann mansonz lo Zeova. (Zen. 3:4, 5) Alor non Zeova ti bezwen ganny sanktifye. Vi ki Zezi ti reprezant Zeova e i ti port non Zeova, i ti sa pli bon dimoun pour sanktifye non Zeova.
Ki mannyer en dimoun ki dir i en Kretyen pa konn oubyen pa servi non Zeova?
8. Ki tou disip Zezi ti pou bezwen konpran?
8 Tou bann ki ti pou demontre lafwa dan Zezi, ki swa zot ti Zwif oubyen bann dimoun lezot nasyon, ti pou bezwen konpran ki i ti pou Zeova Papa Zezi ki ti pou sov zot. (Zan 17:3) Osi, parey Zezi, non Zeova ti pou idantifye zot. Zot ti pou bezwen osi rekonnet lenportans pour sanktifye non Zeova pour zot ganny sove. (Akt 2:21, 22) Alor tou bann disip Zezi ti pou bezwen aprann konsernan Zeova e osi konsernan Zezi. I pour sa rezon ki Zezi ti fini son lapriyer ki ganny trouve dan Zan sapit 17 avek sa bann parol: “Mon’n fer zot konn ou non e mon pou kontinyen fer li, pour ki zot kapab kontan lezot parey ou kontan mwan e pour ki mwan mon ini avek zot.”—Zan 17:26.
“ZOT MON BANN TEMWEN”
9. Ki mannyer nou kapab montre ki non Zeova i enportan pour nou?
9 Parey nou’n vwar, tou bann disip Zezi i bezwen sanktifye non Zeova. (Mat. 6:9, 10) Nou bezwen vwar non Zeova konman sa non pli enportan. Nou bezwen montre sa par nou aksyon. Me ki nou kapab fer pour sanktifye non Zeova e pour montre ki sa ki Satan in dir lo Zeova pa vre?
10. Ki nou lir dan Izai sapit 42 ziska 44? (Izai 43:9; 44:7-9) (Vwar portre.)
10 Izai sapit 42 ziska 44 i montre ki nou kapab fer pour sanktifye non Zeova. Dan sa bann sapit Zeova i demann bann dimoun ki pa pe ador li pour donn levidans ki zot bondye i egziste. Parey dan en ka ankour, Zeova i demande si i annan bann temwen ki kapab donn levidans me i napa personn ki kapab.—Lir Izai 43:9; 44:7-9.
Dan plizyer fason, nou parey bann temwen ankour (Vwar paragraf 10-11)
11. Ki Zeova i dir son pep dan Izai 43:10-12?
11 Lir Izai 43:10-12. Zeova ti dir son pep: “Zot mon bann temwen, . . . e mwan mon Bondye.” I ti pe demann zot pour reponn sa kestyon: “Eski i annan en lot Bondye apard ki mwan?” (Iza. 44:8) Nou annan sa gran loner pour reponn sa kestyon. Par sa ki nou dir e fer, nou montre ki Zeova i sa sel vre Bondye e ki son non i pli enportan ki tou lezot non. Par lafason ki nou viv, nou montre ki nou vreman kontan Zeova e ki nou fidel avek li menm si Satan i fer li difisil pour nou. Dan sa fason, nou osi nou ede sanktifye non Zeova.
12. Ki mannyer sa profesi dan Izai 40:3, 5 ti ganny akonplir?
12 Annou vwar en profesi ki montre lafason ki Zezi ti servi konman en temwen pour Zeova e lafason ki i ti sanktifye non Zeova. Izai ti predir ki en dimoun ti pou “netway [oubyen “prepar,” not.] semen Zeova.” (Iza. 40:3) Ki mannyer sa ti ganny akonplir? Zan ki batize ti prepar semen pour Zezi me an realite i ti pe prepar semen pour Zeova parski Zezi ti vin o non Zeova e i ti koz o non Zeova. (Mat. 3:3; Mark 1:2-4; Lik 3:3-6) Sa menm profesi i dir: “Laglwar Zeova pou ganny revele.” (Iza. 40:5) Ki mannyer sa? Ler Zezi ti vin lo later, i ti reprezant Zeova dan en fason parfe ki i ti konmsi Zeova li menm ki ti’n vin lo later.—Zan 12:45.
13. Ki mannyer nou kapab swiv legzanp Zezi?
13 Parey Zezi, nou osi nou bann temwen pour Zeova. Nou port non Zeova e nou dir tou dimoun ki nou zwenn konsernan bann keksoz merveye ki i’n fer. Pour nou kapab vin en bon temwen pour Zeova, nou bezwen osi dir dimoun konsernan tou sa ki Zezi in fer pour sanktifye non Zeova. (Akt 1:8) I napa personn ki en pli bon Temwen pour Zeova ki Zezi e nou bezwen swiv son legzanp. (Rev. 1:5) Me ki bann lezot fason nou kapab montre ki non Zeova i enportan pour nou?
KI BANN LEZOT FASON NOU KAPAB MONTRE KI NON ZEOVA I ENPORTAN POUR NOU?
14. Ki mannyer nou santi konsernan non Zeova? (Psonm 105:3)
14 Nou fyer akoz non Zeova. (Lir Psonm 105:3.) Zeova i vreman kontan ler nou loue son non avek lafyerte. (Zer. 9:23, 24; 1 Kor. 1:31; 2 Kor. 10:17) En dimoun ki “fyer akoz Zeova” i fyer ki Zeova i son Bondye. Nou vwar li konman en privilez pour onor son non e pour dir lezot ki tou sa ki i fer i byen. Nou pa devret zanmen kanmi pour dir nou koleg travay, kanmarad lekol, vwazen ek lezot ki nou en Temwen Zeova. Satan i anvi ki nou aret koz avek lezot lo non Zeova. (Zer. 11:21; Rev. 12:17) Anfet Satan ek bann ki fann son bann mansonz i anvi fer dimoun oubliy non Zeova. (Zer. 23:26, 27) Me nou, nou kontan non Zeova e sa i fer nou dan lazwa “tou dilon lazournen.”—Ps. 5:11; 89:16.
15. Ki i vedir kriy non Zeova?
15 Nou kontinyen kriy non Zeova. (Zoel 2:32; Rom. 10:13, 14) Ler nou kriy non Zeova, nou pa zis konn e servi sa non me nou konn bann kalite ki Bondye i annan, nou annan konfyans dan li e nou rod son led ek gidans. (Ps. 20:7; 99:6; 116:4; 145:18) Nou osi dir lezot konsernan Zeova e konsernan son bann kalite e nou ed zot pour repantir e sanz zot lavi pour zot kapab fer Zeova plezir.—Iza. 12:4; Akt 2:21, 38.
16. Ki mannyer nou kapab montre ki Satan i en manter?
16 Ler nou reste fidel avek Zeova menm ler nou pe soufer, nou montre ki Satan i en manter. (Zak 5:10, 11) Dan letan Zob, Satan ti dir sa konsernan bann ki servi Zeova: “Si en dimoun i pros pour mor, i pou donn tou sa ki i annan pour sov son lavi.” (Zob 2:4) Satan ti dir ki dimoun ti pou servi Zeova zis ler keksoz pe al byen pour zot me ler zot pas dan problenm, zot pou aret servi Zeova. Zob ti montre ki sa pa ti vre. Nou osi nou annan sa privilez pour montre ki menm ler nou lavi i vin difisil oubyen Satan i esey dekouraz nou, nou pa pou zanmen aret servi Zeova. Nou kapab asire ki Zeova pou vey lo nou akoz son non.—Zan 17:11.
17. Dapre 1 Pyer 2:12, ki lezot fason nou kapab glorifye non Zeova?
17 Nou montre ki nou annan respe pour non Zeova. (Prov. 30:9; Zer. 7:8-11) Vi ki nou reprezant Zeova e nou port son non, sa ki nou fer i kapab swa anmenn loner lo son non oubyen anmenn laont. (Lir 1 Pyer 2:12.) Alor nou anvi fer tou sa ki nou kapab pour glorifye Zeova par sa ki nou dir e sa ki nou fer. Ler nou fer sa, nou pou anmenn loner lo non Zeova menm si nou enparfe.
18. Ki en lot fason nou kapab montre ki non Zeova i enportan pour nou? (Vwar not.)
18 Non Zeova i pli enportan pour nou ki sa ki dimoun i panse lo nou. (Ps. 138:2) Akoz sa? Parski nou kontan non Zeova e sa i fer nou fer bann keksoz ki fer li plezir. Souvandfwa dimoun pa kontan sa e zot dir bann move keksoz lo nou.a Me Zezi ti pare pour mor konman en kriminel pour li kapab glorifye non Zeova. I “pa ti pran kont laont,” setadir i pa ti fatig li avek sa ki lezot i panse lo li. (Ebr. 12:2-4) I ti konsantre lo fer lavolonte Bondye.—Mat. 26:39.
19. Ki mannyer ou santi konsernan non Zeova e akoz?
19 Nou fyer akoz non Zeova e nou santi ki i en loner pour ganny apele Temwen Zeova. Sa i fer ki nou kontinyen glorifye li menm si lezot pa kontan. Non Zeova i pli enportan pour nou ki nou prop repitasyon. Alor annou determinen pour kontinyen glorifye non Zeova menm si Satan i esey dekouraz nou. Ler nou fer sa, nou pou montre ki non Zeova i sa keksoz pli enportan pour nou, zis parey i ti ete pour Zezi Kri.
KANTIK 10 Loue Zeova nou Bondye!
a Menm Zob, ki ti en zonm fidel, ti konmans konsantre lo son repitasyon ler trwa parmi son bann zanmi ti dir ki i ti’n fer bann move keksoz. O konmansman, ler bann zanfan Zob ti mor e ler i ti perdi tou son bann keksoz, “Zob pa ti fer pese e i pa ti akiz Bondye pour fer okenn keksoz mal.” (Zob 1:22; 2:10) Me ler i ti ganny akize konmkwa i’n fer move keksoz, i ti konmans “koze san reflesir.” Son repitasyon ti pli enportan ki sanktifye non Bondye.—Zob 6:3; 13:4, 5; 32:2; 34:5.