Demontre limilite e aksepte ki i annan keksoz ki ou pa konnen

1. Ki abilite Zeova in donn nou e akoz?

ZEOVA in kree nou avek sa abilite pour reflesir, pour aprann nouvo keksoz, pour konpran sa ki nou aprann e pour demontre lasazes. Akoz in kree nou koumsa? Parski i anvi ki nou “konn Bondye” e ki anmezir ki nou servi li, nou fer bann desizyon ki saz ki baze lo konnesans egzakt.—Prov. 2:1-5; Rom. 12:1.

2. (a) Ki nou bezwen rekonnet? (Zob 37:23, 24) (Vwar portre.) (b) Ki byenfe nou gannyen ler nou rekonnet ki nou pa bezwen konn tou keksoz?

² Zeova in kree nou avek sa abilite pour aprann bann nouvo keksoz. Me kantmenm sa, i annan en kantite keksoz ki nou pa konnen. (Lir Zob 37:23, 24.) Annou vwar legzanp Zob. Zeova ti demann Zob en kantite kestyon ki ti ed Zob konpran ki i ti annan en kantite keksoz ki i pa ti konnen. Sa konversasyon ti ed Zob realize ki i ti bezwen demontre limilite e sanz son fason panse. (Zob 42:3-6) I byen pour nou rekonnet ki nou pa konn tou keksoz. Ler nou rekonnet ki i annan en kantite keksoz ki nou pa konnen, sa pou ed nou pour demontre limilite e pour annan konfyans ki Zeova pou toultan dir nou sa ki nou vreman bezwen konnen pour fer bann bon desizyon.—Prov. 2:6.

3. Ki nou pou vwar dan sa lartik?

³ Dan sa lartik, nou pou diskit lo serten keksoz ki nou pa konnen e lefe ki sa i kapab annan lo nou. Nou pou osi vwar akoz i bon ki nou pa konn serten keksoz. Sa ki nou pou aprann pour ed nou pour annan konfyans ki Zeova, “sa Enn ki son konnesans i parfe” i dir nou tou sa ki nou bezwen konnen.—Zob 37:16.

NOU PA KONNEN KAN LAFEN POU ARIVE

4. Dapre Matye 24:36, ki en keksoz ki nou pa konnen?

⁴ Lir Matye 24:36. Nou pa konnen kan lafen pou arive. Ler Zezi ti lo later, i pa ti konn “sa zour ek sa ler.”a Pli tar, i ti dir son bann zapot ki Zeova i sa Enn ki “annan drwa deside kan” serten keksoz pou arive. (Akt 1:6, 7) Zeova in fini deside kan lafen pou arive. Me nou, nou pa konnen kan egzakteman i pou arive.

5. Vi ki nou pa konnen kan lafen pou arive, ki mannyer sa i kapab fer nou santi?

⁵ Nou pa konnen ki kantite letan nou bezwen espere ziska lafen i arive. Alor i kapab ki nou vin enpasyan oubyen nou dekouraze sirtou si i fer en pe letan ki nou pe esper zour Zeova arive. Oubyen nou kapab dekouraze ler nou fanmir oubyen lezot dimoun i boufonn nou. (2 Pyer 3:3, 4) Nou kapab krwar ki si nou konn dat egzakt ki lafen pou vini, nou pou annan plis pasyans e nou pou pli kapab andire ler lezot i boufonn nou.

6. Akoz i en bon keksoz ki nou pa konnen kan lafen pou arive?

⁶ Lefet ki Zeova pa’n dir nou egzakteman kan lafen pou arive, nou annan sa loportinite pour montre Zeova ki nou servi li akoz nou kontan li e nou annan konfyans dan li. Nou anvi servi Zeova pour touzour pa zis pour en serten letan setadir ziska ki lafen i arive. Olye konsantre lo kan ki “zour Zeova” pou arive, i ti pou byen ki nou konsantre lo sa ki pou arive apre sa zour. Sa pou ed nou vin pli pros avek Zeova, pour annan konfyans dan li e pour fer tou sa ki nou kapab pour fer li plezir.—2 Pyer 3:11, 12.

7. Ki nou konnen?

⁷ I ti pou byen ki nou konsantre lo sa ki nou konnen. Sa i ki dernyen zour ti konmans an 1914. Zeova in donn nou bann profesi Labib ki montre sa. Sa bann profesi i osi donn nou en kantite detay konsernan ki mannyer lemonn ti pou ete apartir 1914. Sa i fer ki nou asire ki “gran zour Zeova i pros.” (Zef. 1:14) Nou osi konn sa ki Zeova i anvi nou fer. I anvi ki nou koz avek maksimonm dimoun konsernan “sa bon nouvel lo Rwayonm.” (Mat. 24:14) Sa bon nouvel pe ganny anonse dan apepre 240 pei e dan plis ki 1,000 langaz. Nou pa bezwen konn sa zour ek sa ler pour nou devoue dan sa travay enportan.

NOU PA KONNEN KI MANNYER ZEOVA POU AZIR

8. Ki sa lekspresyon “travay sa vre Bondye” pe refer avek? (Eklezyas 11:5)

⁸ Nou pa toultan konn “travay sa vre Bondye.” (Lir Eklezyas 11:5.) Sa lekspresyon i refer avek sa ki Zeova i fer arive oubyen sa ki i les arive pour li akonpli son plan. Sa i vedir ki nou pa konn egzakteman akoz Zeova i les en keksoz arive oubyen ki mannyer i pou ed nou. (Ps. 37:5) Labib i konpar lefet ki nou pa konn travay sa vre Bondye avek lefet ki nou pa konnen ki mannyer en pti baba i devlope dan matris en madanm. Menm bann syantis pa vreman konn sa. Zis parey nou pa konnen ki mannyer sa pti baba i devlope, nou pa konnen ki mannyer Zeova pou azir.

9. Lefet ki nou pa konnen ki mannyer Zeova pou azir, ki mannyer sa i kapab fer nou santi?

⁹ Lefet ki nou pa konnen ki mannyer Zeova pou ed nou, sa i kapab fer nou ezite pour fer serten desizyon. Petet nou kapab ezite pour fer bann sakrifis pour nou kapab fer plis dan predikasyon par egzanp, senplifye nou lavi oubyen al reste dan en landrwa kot i annan bezwen pour plis proklanmater. Oubyen i kapab ki nou pe travay dir pour atenn nou lobzektif spirityel me kantmenm sa, nou pa reisi atenn sa lobzektif. I kapab osi ki nou bizi dan predikasyon me kantmenm sa nou napa okenn letid. Ouswa i kapab ki nou pe travay dir lo en proze spesyal pour lorganizasyon e malgre sa, nou rankontre en kantite problenm. Tou sa bann keksoz i kapab fer nou santi ki nou napa laprouvasyon Zeova.

10. Lefet ki nou pa konnen ki mannyer Zeova pou azir, ki kalite sa i ed nou devlope?

¹⁰ Lefet ki nou pa konnen ki mannyer Zeova pou azir, sa i kapab ed nou pour devlop serten kalite parey limilite. Nou rekonnet ki fason panse ek fason fer Zeova i pli siperyer ki sa ki pour nou. (Iza. 55:8, 9) Nou osi aprann pour annan plis konfyans dan Zeova e pour depan lo li pour nou reisi. Ler nou ganny bann bon rezilta dan predikasyon oubyen dan en proze, nou donn Zeova sa laglwar ki i merite. (Ps. 127:1; 1 Kor. 3:7) Si keksoz pa ariv parey nou ti pe ekspekte, nou bezwen gard antet ki Zeova i kontrol tou keksoz. (Iza. 26:12) Nou fer nou par e nou kontinyen annan konfyans ki Zeova pou ed nou. Menm si i pa fer mirak pour gid nou parey i ti fer dan lepase, nou asire ki i pou donn nou sa gidans ki nou bezwen.—Akt 16:6-10.

11. Ki bann keksoz enportan ki nou konnen?

¹¹ Medit lo lefet ki nou konnen ki Zeova i toultan demontre lanmour, i toultan demontre lazistis e i toultan saz. Nou osi konnen ki i vreman apresye sa ki nou fer pour li e pour nou bann frer ek ser. Nou konnen ki Zeova i toultan rekonpans bann ki fidel avek li.—Ebr. 11:6.

NOU PA KONNEN KI POU ARIVE DAN LAVENIR

12. Dapre Zak 4:13, 14, ki nou pa konnen?

¹² Lir Zak 4:13, 14. En laverite fondamantal i ki nou pa konnen ki pou arive avek nou demen. Dan sa lemonn, nou kapab fer fas avek bann sityasyon ki nou pa pe ekspekte oubyen ki nou napa kontrol lo la. (Ekle. 9:11) Sa i fer ki nou pa konnen si nou bann plan pour reisi oubyen si nou pou ankor vivan pour vwar zot reisi.

13. Lefet ki nou pa konnen ki pou arive dan lavenir, ki mannyer sa i fer nou santi?

¹³ I kapab ki nou vwar li difisil pour andire parski nou pa konnen egzakteman ki pou arive dan lavenir. Akoz sa? Petet nou kapab enkyet konsernan sa ki kapab arive e sa i kapab fer nou perdi nou lazwa. Nou lavi i kapab sanze dan bann fason ki nou pa pe ekspekte oubyen bann move keksoz i kapab arive en sel kou e sa i kapab fer nou vreman sagren e fristre. Ler keksoz pa ariv parey nou ti ava anvi, nou kapab dezapwente e dekouraze.—Prov. 13:12.

14. Ki nou bezwen fer e konnen pour nou vreman zwaye? (Vwar portre.)

¹⁴ Nenport kwa ki arive dan nou lavi, nou kapab montre ki nou servi Zeova akoz nou kontan li. Bann resi Labib i montre ki nou pa devret ekspekte ki Zeova i protez nou, ki i anpes tou move keksoz arive avek nou e Zeova pa plàn davans sa ki pou arive dan nou lavi. O kontrer, nou pou zwaye si nou kontinyen demann Bondye son gidans e nou obeir li. (Zer. 10:23) Si nou rod led Bondye ler nou pe fer bann desizyon, nou pa pou tro enkyet konsernan sa ki kapab arive. Nou pou annan menm latitid avek Zak, ki ti dir: “Si Zeova i oule, nou pou viv e nou pou fer sa oubyen sa.”—Zak 4:15.

15. Ki nou konnen konsernan lavenir?

¹⁵ Nou pa konnen ki pou arive sak zour. Me nou konnen ki Zeova in promet pour donn nou lavi eternel ki swa dan lesyel oubyen lo later. Nou konnen ki Bondye pa kapab koz manti e i napa nanryen ki kapab anpes li akonpli tou son bann promes. (Tit 1:2) Zis li ki kapab ‘predir sa ki pou arive e depi lontan predir bann keksoz ki pa ankor ganny fer.’ Tou sa ki Zeova ti predir pou arive dan letan Labib in vin vre e tou sa ki i’n predir pour lavenir pou osi vin vre. (Iza. 46:10) Nou asire ki napa nanryen ki kapab anpes Zeova kontan nou. (Rom. 8:35-39) Nenport ki keksoz ki arive dan lavenir, Zeova pou rekonfort nou, i pou donn nou sa lasazes ek lafors pour nou kapab andire. Nou kapab asire ki Zeova pou ed nou e i pou beni nou.—Zer. 17:7, 8.

NOU PA KAPAB KONPRAN KI DEGRE ZEOVA I KONN NOU BYEN

16. Dapre Psonm 139:1-6, ki Zeova i konnen e ki mannyer sa i fer nou santi?

¹⁶ Lir Psonm 139:1-6. Nou Kreater i konn tou keksoz lo nou. I konnen akoz nou mazin parey nou mazinen e akoz nou santi parey nou santi. I konn sa ki nou dir e sa ki dan nou leker. I osi konn tou sa ki nou fer e akoz nou fer sa bann keksoz. Zis parey Lerwa David ti dir, Zeova i toultan pare pour ed nou e napa en moman kot i pa kapab ed nou. Zeova i Souvren Sover liniver, Kreater tou pwisan sa enn ki’n kree lesyel ek later e i enterese avek nou. Pa sa i enkrwayab! David ti dir: “I tro merveye pour konn tou sa bann keksoz. I tro bokou pour mwan konpran.”—Ps. 139:6, not.

17. Akoz i kapab difisil pour krwar ki Bondye i konn nou sitan byen?

¹⁷ Petet lafason ki nou’n grandi, nou kiltir oubyen sa ki nou ti krwar ladan avan nou konn laverite, i fer li difisil pour nou vwar Zeova konman en Papa ki kontan nou e ki enterese avek nou. Oubyen nou kapab santi ki bann fot ki nou’n fer dan lepase i sitan grav ki Zeova pa pou zanmen anvi konn nou e ki i lwen avek nou. Menm David ti santi koumsa parfwa. (Ps. 38:18, 21) Oubyen en dimoun ki pe fer zefor pour sanz son fason viv e viv dapre bann standar Bondye i kapab krwar, ‘Si Bondye i vreman konn mwan, akoz i ekspekte ki mon aret viv dan en fason ki paret normal pour mwan?’

18. Ki byenfe nou gannyen ler nou aksepte ki Zeova i konn nou pli byen ki nou konn nou prop lekor? (Vwar portre.)

¹⁸ Nou kapab aprann pour aksepte ki Zeova i konn nou pli byen ki nou konn nou prop lekor e i vwar bann bon kalite dan nou ki nou pa kapab vwar. Menm si i vwar nou bann defo, i konpran akoz nou santi parey nou santi e nou azir parey nou azir e i kontan nou. (Rom. 7:15) Ler nou realize ki Zeova i toultan vwar sa kalite dimoun ki nou kapab vini, sa pou donn nou lafors ki nou bezwen pour reste fidel avek li e pour servi li dan lazwa.

19. Ki nou asire konsernan Zeova?

¹⁹ Nou konnen ki Zeova i lanmour. Nou napa okenn dout konsernan sa. (1 Zan 4:8) Nou konnen ki sa ki Zeova i dir nou fer oubyen pa fer, i akoz i kontan nou e i anvi ki nou viv sa pli bon lavi. Nou konnen ki Zeova i anvi nou viv pour touzour e in donn sa ranson pour fer sa posib. Sa ranson i fer nou asire ki menm si nou fer fot, nou kapab servi Zeova dan en fason ki fer li plezir. (Rom. 7:24, 25) Nou konnen ki “Bondye i pli gran ki nou leker e i konn tou keksoz.” (1 Zan 3:19, 20) Zeova i konn tou keksoz konsernan nou e i annan konfyans ki nou kapab fer son lavolonte.

20. Kwa ki pou ed nou pour nou pa tro enkyet konsernan sa ki nou pa konnen?

²⁰ Zeova pa priv nou bann lenformasyon ki nou bezwen konnen. O kontrer, i dir nou tou sa ki nou bezwen konnen. Alor nou pa bezwen enkyet konsernan sa ki nou pa konnen. O kontrer, nou konsantre lo sa ki vreman enportan. Ler nou fer sa, nou demontre limilite e nou annan konfyans total dan Zeova, “sa Enn ki son konnesans i parfe.” (Zob 36:4) Menm si la konmela nou pa konpran serten keksoz, nou konnen ki Zeova pou kontinyen ansenny nou bann nouvo keksoz pour touzour e nou vreman eksite akoz nou pa pou zanmen aret aprann bann nouvo keksoz konsernan nou Bondye merveye.—Ekle. 3:11.