Gard antet ki Zeova i “sa Bondye vivan”

1. Kwa ki ed pep Bondye pou kontinyen servi li menm si zot fer fas avek problenm?

LABIB i dir ki nou pe viv dan “en letan vreman difisil.” (2 Tim. 3:1) Pep Zeova i fer fas avek menm problenm ki tou dimoun dan sa lemonn i fer fas avek. Me an plis ki sa, nou ganny persekite akoz nou servi Zeova. Kwa ki pou ed nou pour kontinyen servi Zeova menm si nou fer fas avek sa bann problenm? En rezon prensipal ki nou kontinyen servi Zeova i akoz nou’n vwar lafason ki Zeova in ed nou dan lepase e sa i fer nou konnen ki Zeova i “sa Bondye vivan.”—Zer. 10:10; 2 Tim. 1:12.

2. Dan ki fason Zeova i sa Bondye vivan?

² Zeova i en personnaz reel ki vwar tou bann difikilte ki nou fer fas avek e i toultan anvi ed nou. (2 Kron. 16:9; Ps. 23:4) Ler nou vwar Zeova konman sa Bondye vivan, sa i kapab ed nou pour fer fas avek okenn difikilte ki nou rankontre. Annou vwar ki mannyer sa ti arive dan ka Lerwa David.

3. Ki David ti pe dir ler i ti dir ki “Zeova i vivan”?

³ David ti konn Zeova e i ti depan lo li. Ler Lerwa Sail ek lezot ti pe esey touy David, David ti priy Zeova pour demann li led. (Ps. 18:6) Apre ki Bondye ti’n reponn lapriyer David e sov li, David ti dir: “Zeova i vivan!” (Ps. 18:46) David pa ti pe zis dir ki Bondye i egziste. En liv referans i dir ki David ti pe eksprim son konfyans ki Zeova i sa Bondye vivan ki toultan pe fer keksoz pour ed son pep. David ti eksperyans pour li menm ki Bondye i vivan e sa ti fer li pli determinen pour kontinyen servi e loue Zeova.—Ps. 18:28, 29, 49.

4. Ki byenfe nou gannyen ler nou vwar Zeova konman sa Bondye vivan?

⁴ Ler nou asire ki Zeova i sa Bondye vivan, sa i kapab ed nou pour vin pli devoue dan nou servis. Nou pou annan lafors pour andire ler nou annan problenm e nou pou anvi kontinyen travay dir dan nou servis pour Bondye. Nou pou osi pli determinen pour reste pros avek Zeova.

SA BONDYE VIVAN POU DONN OU LAFORS

5. Kwa ki fer nou annan konfyans ki nou kapab fer fas avek problenm? (Filipyen 4:13)

⁵ Ler nou gard antet ki Zeova i vivan e ki i toultan la pour ed nou, nou pou kapab fer fas avek okenn problenm ki swa i en pti problenm ouswa en gro problenm. Apre tou i napa en problenm ki tro difisil pour nou Bondye. I Tou Pwisan e i kapab donn nou lafors pour andire. (Lir Filipyen 4:13.) Alor sa i fer nou konfidan ki nou kapab fer fas avek nou bann problenm. Vi ki nou’n vwar ki Zeova in ed nou ler nou’n pas dan bann pti problenm, sa i fer nou asire ki i pou osi ed nou fer fas avek bann gro problenm.

6. Ki ti arive avek David ler i ti ankor zenn, ki ti fer li annan plis konfyans dan Zeova?

⁶ Annou vwar de sityasyon ki David ti pas ladan ki ti fer li annan plis konfyans dan Zeova. Ler David ti ankor zenn, i ti vey mouton son papa. En fwa en lours ti vin pran en mouton e en lot fwa en lyon osi ti fer parey. Tou le de fwa David ti demontre kouraz e i ti tay deryer sa bann zannimo e sov sa bann mouton. David pa ti krwar ki i ti’n fer sa lo li menm. I ti konnen ki Zeova ki ti’n donn li sa lafors. (1 Sam. 17:34-37) David pa ti zanmen oubliy sa bann moman. Ler i ti medit lo sa ki ti arive, sa ti fer li asire ki sa Bondye vivan ti pou donn li lafors dan lavenir.

7. Ki David ti konsantre lo la e akoz sa ti ed li pour lager avek Golyat?

⁷ Pli tar ler David ti ankor en adolesan, i ti al vizit kan larme bann Izraelit. Ler i ti laba, i ti vwar ki bann solda ti vreman per parski i ti annan en zean Filisten ki ti apel Golyat ki ti’n vin “provok bann Izraelit lo fron batay.” (1 Sam. 17:10, 11) Sa bann solda ti per parski zot ti pe konsantre lo grander Golyat e lo sa ki i ti pe dir zot. (1 Sam. 17:24, 25) Me David ti vwar sa sityasyon dan en lot fason. David ti konnen ki ler Golyat ti pe ensilte larme Izrael, i ti pe ensilte “larme sa Bondye vivan.” (1 Sam. 17:26) David ti pe mazin Zeova. David ti asire ki sa Bondye ki ti ed li ler i ti ankor en berze, pou ed li dan sa sityasyon. Vi ki David ti asire ki Bondye ti pou ed li, i ti lager avek Golyat e i ti ranport laviktwar!—1 Sam. 17:45-51.

8. Kwa ki fer nou pli asire ki Zeova pou ed nou ler nou pas dan problenm? (Vwar portre.)

⁸ Nou osi nou pou kapab fer fas avek nou bann problenm si nou gard antet ki sa Bondye vivan i pare pour ed nou. (Ps. 118:6) Nou kapab devlop plis konfyans ki Zeova pou ed nou par medit lo sa ki i’n fer dan lepase. Lir bann resi dan Labib ki fer ou rapel bann fason ki Zeova ti sov son bann serviter. (Iza. 37:17, 33-37) Lir ouswa get bann rapor lo jw.org ki montre lafason ki Zeova in ed nou bann frer ek ser dan nou letan. Osi mazin bann moman kot Zeova in ed ou. Petet ou santi ki Zeova pa’n fer en keksoz sitan spektakiler pour ou, par egzanp, pour sov ou kont en lyon oubyen en lours. Me anfet Zeova in fer en kantite keksoz pour ou. Zeova in atir ou ver li pour ou vin son zanmi. (Zan 6:44) Si ou ankor pe servi Zeova ozordi, i akoz Zeova i ankor pe ed ou. Alor demann Zeova pour ed ou rapel bann moman ler i ti reponn ou lapriyer, ler i ti donn ou egzakteman sa ki ou ti bezwen dan sa bon moman oubyen ler i ti pran swen avek ou dan en sityasyon difisil. Ler ou reflesir lo bann moman koumsa, sa pou fer ou asire ki Zeova pou kontinyen ed ou.

9. Ki nou bezwen gard antet ler nou pe fer fas avek bann problenm? (Proverb 27:11)

⁹ Ler nou vwar Zeova konman en personnaz reel, sa pou ed nou pour annan en bon pwennvi konsernan nou bann problenm. Ki mannyer sa? Ler nou annan problenm, nou bezwen konsantre lo sa ki pli enportan. Dyab in dir ki ler nou annan problenm, nou pou abandonn Bondye. Alor lafason ki nou azir ler nou annan problenm, sa i annan en lefe lo lafason ki Zeova i santi. (Zob 1:10, 11; lir Proverb 27:11.) Me ler nou reste fidel avek Zeova malgre nou bann problenm, nou montre ki nou kontan Zeova e nou montre ki Dyab i en manter. Petet sa gouvernman kot ou reste pe opoz pep Zeova oubyen ou annan problenm larzan oubyen menm, dimoun dan teritwar pa enterese avek sa bon nouvel. Ouswa i kapab ki ou pe soufer dan en lot fason. Si ou dan enn sa bann sityasyon, rapel ki ou sityasyon i donn ou en loportinite pour fer leker Zeova kontan. Osi, gard antet ki Zeova pa pou zanmen les ou ganny teste plis ki ou kapab siporte. (1 Kor. 10:13) I pou donn ou sa lafors ki ou bezwen pour andire.

SA BONDYE VIVAN POU REKONPANS OU

10. Ki sa Bondye vivan pou fer pour bann ki servi li?

¹⁰ Zeova i sa Enn ki rekonpans bann ki ador li. (Ebr. 11:6) La konmela, Zeova i ed nou pour annan lape ek lazwa e dan lavenir, i pou donn nou lavi eternel. Nou annan konfyans ki Zeova i anvi rekonpans nou e i annan sa pouvwar pour fer li. I pour sa rezon ki nou kontinyen donn li nou meyer dan nou servis zis parey son bann serviter dan lepase ti fer. I sanmenm sa ki Timote ti fer.—Ebr. 6:10-12.

11. Akoz Timote ti travay dir dan kongregasyon? (1 Timote 4:10)

¹¹ Lir 1 Timote 4:10. Timote ti annan konfyans dan sa Bondye vivan. I pour sa rezon ki i ti travay dir pour Zeova e pour lezot. Dan ki fason? Zapot Pol ti ankouraz li pour vin en pli bon ansenyan dan predikasyon e dan kongregasyon. Pol ti osi demann Timote pour kit en bon legzanp pour son bann frer ek ser ki swa zot zenn oubyen aze. I ti osi ganny bann responsabilite ki ti difisil, ki ti enkli pour donn bann konsey ferm avek lanmour ler i ti neseser. (1 Tim. 4:11-16; 2 Tim. 4:1-5) Menm si parfwa lezot pa ti vwar sa travay ki Timote ti pe fer oubyen zot pa ti apresye son travay, Timote ti asire ki Zeova ti pou rekonpans li.—Rom. 2:6, 7.

12. Akoz bann ansyen i kontinyen travay dir dan kongregasyon? (Vwar portre.)

¹² Bann ansyen ozordi i kapab asire ki Zeova i vwar e apresye zot bon travay. Apard ki pran swen avek bann frer ek ser dan kongregasyon, ansennyen e fer predikasyon, en kantite ansyen i ede dan bann proze konstriksyon e ler i annan dezas. Lezot i servi lo Patient Visitation Groups ouswa lo Komite Lyezon Lopital. Bann ansyen ki dan sa bann servis i konnen ki kongregasyon i pour Zeova, non pa pou okenn imen. Sa i fer ki zot fer zot servis avek tou zot leker e zot annan konfyans ki Zeova pou rekonpans zot pour sa ki zot fer.—Kol. 3:23, 24.

13. Ki mannyer Zeova i santi konsernan sa ki nou fer pour li?

¹³ Pa nou tou ki kapab vin en ansyen. Me nou tou nou kapab donn Zeova en keksoz. Nou Bondye i apresye ler nou fer nou mye pour servi li. I vwar ler nou fer kontribisyon pour sa travay mondyal menm si nou pa kapab donn bokou. I kontan ler nou lev lanmen pour reponn dan renyon menm si nou en dimoun timid e i kontan ler nou pardonn bann ki’n ofans nou. Menm si ou santi ki ou pa kapab fer sa kantite ki ou ti ava kontan, annan konfyans ki Zeova i apresye sa ki ou kapab fer. Zeova i kontan ou pour sa e i pou rekonpans ou.—Lik 21:1-4.

RESTE PROS AVEK SA BONDYE VIVAN

14. Ler nou reste pros avek Zeova, ki mannyer sa i ed nou pour reste fidel avek li? (Vwar portre.)

¹⁴ I pou pli fasil pour nou reste fidel avek Zeova si nou annan en lanmitye pros avek li. Sa ti leka pour Zozef. I ti refize pour komet imoralite seksyel. Bondye ti en personnaz reel pour li e i pa ti anvi dezobei li. (Zen. 39:9) Pour Zeova vin en personnaz reel pour nou, nou bezwen fer letan pour priye e etidye son Parol. Sa pou fer nou vin pli pros avek li. Si parey Zozef, nou annan en bon lanmitye avek Zeova, nou pa pou anvi fer okenn keksoz ki pa fer li plezir.—Zak 4:8.

15. Ki nou kapab aprann avek sa ki ti arive avek bann Izraelit ler zot ti dan dezer? (Ebre 3:12)

¹⁵ Bann ki aret annan konfyans dan Zeova konman sa Bondye vivan, i kapab fasilman konmans elwannyen avek li. Annou vwar ki ti arive avek bann Izraelit ler zot ti dan dezer. Zot ti konnen ki Zeova i egziste me zot ti konmans annan dout e mazinen ki Zeova pa pou kapab pran swen avek zot. Zot ti menm demande: “Eski Zeova i avek nou oubyen non?” (Egz. 17:2, 7) Sa ti fer ki zot ti rebel kont Bondye. Nou pa anvi swiv zot move legzanp.—Lir Ebre 3:12.

16. Kwa ki kapab fer li difisil pour nou kontinyen annan en lafwa for?

¹⁶ Sa lemonn i fer li difisil pour nou reste pros avek Zeova. En kantite dimoun i refize krwar ki Bondye i egziste. Parfwa i paret ki bann ki inyor bann standar Zeova i annan en bon lavi. Ler nou vwar sa arive, sa i kapab fer li difisil pour nou reste fidel avek Zeova. Menm si nou krwar ki Bondye i egziste, i kapab ki nou konmans annan dout konsernan si i pou ed nou. Pour en pe letan, ekriven Psonm 73 ti santi koumsa. I ti vwar ki bann dimoun ti pe inyor bann lalwa Bondye me kantmenm sa, zot lavi ti gou. Sa ti fer ki i ti konmans demande si i vo lapenn servi Bondye.—Ps. 73:11-13.

17. Kwa ki pou ed nou reste pros avek Zeova?

¹⁷ Kwa ki ti ed sa psalmis pour sanz son fason panse? I ti medit lo sa ki pou arive avek bann ki oubliy Zeova. (Ps. 73:18, 19, 27) I ti osi reflesir lo bann byenfe ki bann ki servi Zeova i gannyen. (Ps. 73:24) Nou osi nou kapab mazin lo tou bann fason ki Zeova in beni nou e mazin lafason ki nou lavi ti pou ete si nou pa ti pe servi Zeova. Ler nou fer sa, sa pou ed nou pour reste fidel avek Zeova e parey sa psalmis, nou pou dir: “Me mwan, vin pli pros avek Bondye i bon pour mwan.”—Ps. 73:28.

18. Akoz nou pa bezwen per sa ki pou arive dan lavenir?

¹⁸ Vi ki nou’n “vin lesklav sa Bondye vivan e vre,” nou pou kapab fer fas avek nenport problenm ki nou rankontre pandan sa bann dernyen zour. (1 Tesa. 1:9) Nou Bondye i en personnaz reel ki enterese avek nou e ki pou toultan ed nou. I ti montre ki i ti pe ed son bann serviter dan lepase e i pe fer sanmenm avek nou ozordi. Byento nou pou fer fas avek sa pli gran ladetres, enn ki pa’n zanmen arive lo later. Me nou pa pou tousel, Zeova pou avek nou. (Iza. 41:10) I pour sa rezon ki nou tou nou pou “pran kouraz e dir: ‘Zeova i mon led, mon pa pou per.’”—Ebr. 13:5, 6.