Zeova i nou “gran lazwa”

1-2. (a) Ki mannyer en kantite dimoun ozordi i santi? (b) Ki nou pou vwar dan sa lartik?

EN KANTITE dimoun ozordi i fer tou sort kalite keksoz pour zot zwaye. Me malgre tou zot zefor, zot pa zwaye. An realite, en kantite dimoun i santi zot vreman sagren e zot santi ki keksoz pa pou zanmen amelyore. Serten parmi pep Zeova i kapab santi koumsa zot osi. Vi ki nou pe viv dan “bann dernyen zour” nou ekspekte pas dan bann sityasyon e annan bann santiman ki “vreman difisil” pour fer fas avek.—2 Tim. 3:1.

² Dan sa lartik, nou pou vwar kwa ki kapab fer nou perdi nou lazwa e ki nou kapab fer pour retrouv nou lazwa. Me premyerman nou pou vwar kwa ki sa vre Sours lazwa.

VRE SOURS LAZWA

3. Ki kreasyon i ansenny nou lo Zeova? (Vwar portre.)

³ Zeova in toultan zwaye e i anvi ki nou osi nou zwaye. Alor nou pa sirprann ki i’n fer en kantite keksoz ki fer nou zwaye. Par egzanp, nou zoli plannet ki ranpli avek en varyete kouler, lafason ki bann zannimo i azir ler zot pe zwe e diferan kalite bon manze. Bondye i vreman kontan nou e i anvi ki nou zwaye.

Piti lelefan: Image © Romi Gamit/Shutterstock; bann piti pengwen: Vladimir Seliverstov/500px via Getty Images; bann piti kabri: Rita Kochmarjova/stock.adobe.com; de marswen: georgeclerk/E+ via Getty Images

4. (a) Akoz Zeova i kapab reste zwaye menm si i vwar sa kantite soufrans ki i annan dan lemonn? (b) Ki kado Zeova in donn nou? (Psonm 16:11)

⁴ Menm si Zeova i “sa Bondye ki ere,” i konn byen bann soufrans ki imen i pas ladan. (1 Tim. 1:11) Me i pa les sa fer li perdi son lazwa. I konnen ki tou soufrans i tanporer parski i’n swazir en zour kot i pou tir tou sa ki fer nou sagren e soufer. Me ziska ki sa zour i arive, Zeova pe kontinyen andire e demontre pasyans. Antretan, Zeova i konpran sa ki nou pe pas ladan e i anvi ed nou. Ki mannyer i fer sa? En fason ki i’n fer sa i par donn nou en kado, setadir i ed nou pour zwaye. (Lir Psonm 16:11.) Annou vwar lafason ki i ti donn Zezi sa kado.

5-6. Akoz Zezi i zwaye?

⁵ Parmi tou sa ki Zeova in kree, Zezi i sa enn ki pli zwaye. Akoz? Annou vwar de rezon. (1) “Li menm resanblans sa Bondye envizib” e dan tou laspe i reflekte personnalite son Papa dan en fason parfe. (Kol. 1:15; vwar not letid “happy” dan nwtsty-E dan 1 Timote 6:15.) (2) Zezi i sa enn ki’n pas plis letan avek son Papa ki Sours lazwa.

⁶ Zezi in toultan zwaye parski i fer sa ki son Papa i demann li pour fer. (Prov. 8:30, 31; Zan 8:29) Sa i fer ki i ganny laprouvasyon Zeova.—Mat. 3:17.

7. Ki mannyer nou kapab vreman zwaye?

⁷ Nou osi nou kapab vreman zwaye par kontinyen vin pros avek Zeova ki sa Sours lazwa. Pli nou pran letan pour aprann konsernan Zeova e swiv son legzanp, pli nou pou ere. Nou pou osi zwaye ler nou fer lavolonte Bondye e nou konnen ki nou annan son laprouvasyon.a (Ps. 33:12) Me si parfwa nou santi nou sagren oubyen nou kontinyen santi koumsa pour en kantite letan, eski sa i vedir ki nou napa laprouvasyon Bondye? Non. Nou enparfe e parfwa nou soufer akoz douler, sagrinasyon ek depresyon. Zeova i konpran sa. (Ps. 103:14) Annou vwar serten keksoz ki kapab fer nou perdi nou lazwa e ki mannyer nou kapab retrouv nou lazwa.

PA LES NANRYEN FER OU PERDI OU LAZWA

8. Ki mannyer bann problenm lavi i kapab afekte nou?

⁸ Bann problenm lavi. Eski ou pe soufer akoz persekisyon, dezas natirel, lapovrete, maladi oubyen lavyeyes? Bann problenm koumsa i kapab fer nou perdi nou lazwa sirtou ler nou pa kapab fer nanryen pour sanz nou sityasyon. Labib i dir ki “sagrinasyon i fer [dimoun] dekouraze.” (Prov. 15:13) En ansyen ki apel Barbis ti santi koumsa. Dan lespas kat-r-an son frer ek tou le de son paran ti mor. Barbis i dir: “Mon ti santi mwan tousel e santi ki personn pa kapab ed mwan. Parfwa mon ti santi mwan anba presyon parski menm si mon ti anvi pas plis letan avek mon paran ek mon frer avan zot mor, mon pa ti kapab akoz mon ti annan en kantite keksoz pour fer.” Anfet bann problenm lavi i kapab fer nou santi nou vreman fatige e dekouraze.

9. Kwa ki kapab ed nou pour retrouv nou lazwa? (Zeremi 29:4-7, 10)

⁹ Ki mannyer nou kapab retrouv nou lazwa? Nou kapab retrouv nou lazwa si nou aret enkyet konsernan bann keksoz ki nou pa kapab sanze e nou rekonesan pour sa ki nou annan. Lemonn i fer nou krwar ki nou lavi i bezwen parfe pour nou ere me sa pa vre. Par egzanp, Zeova ti dir bann Zwif ki ti’n ganny egzile Babilonn, ki zot devret aksepte zot nouvo sirkonstans e fer zefor pour zwaye. (Lir Zeremi 29:4-7, 10.) Ki nou kapab aprann? Fer zefor pour aksepte ou sirkonstans e rekonesan pour bann bon keksoz ki ou annan. Rapel ki Zeova pou toultan ed ou. (Ps. 63:7; 146:5) En ser ki apel Effie ki ti dan en aksidan ki ti paraliz li, i dir: “Mon’n ganny en kantite led ek sipor avek Zeova, mon fanmir ek bann frer ek ser. Mon anvi montre zot ki mon rekonesan pour sa ki zot in fer e pe fer pour mwan, alor mon fer mon mye pour reste zwaye.”

10. Akoz nou kapab reste zwaye menm si nou pas dan problenm?

¹⁰ Menm si nou lavi pa sitan fasil oubyen bann move keksoz i arive avek nou ouswa avek nou fanmir, nou kapab kontinyen zwaye.b (Ps. 126:5) Akoz? Parski nou lazwa pa depan lo nou sirkonstans. En pionye ki apel Maria i dir: “Ler nou annan problenm, nou reste zwaye parski nou kontinyen gard bann promes Zeova antet. Sa pa vedir ki nou pa zanmen plere oubyen eksprim nou santiman. Me nou Papa pou ed nou reste zwaye nenport keksoz ki nou pas ladan.” Rapel ki menm si keksoz i difisil la konmela, tou nou bann problenm i tanporer zis parey bann lepa lo lans. Byento Zeova pou tir tou nou bann problenm e i pou napa okenn latras deryer.

11. Ki mannyer legzanp zapot Pol i ankouraz ou?

¹¹ Me ki nou kapab fer si nou konmans krwar ki nou bann problenm i laprev ki nou napa laprouvasyon Zeova? Si nou santi koumsa nou kapab reflesir lo legzanp lezot serviter Zeova ki ti fer fas avek bann sityasyon vreman difisil. Annou vwar legzanp zapot Pol. Zezi ti swazir Pol pour anons laverite “avek bann nasyon, bann lerwa ek pep Izrael.” (Akt 9:15) Sa ti en gran privilez! Kantmenm sa, Pol ti pas dan en kantite problenm. (2 Kor. 11:23-27) Eski lefet ki Pol ti toultan pe pas dan problenm sa ti vedir ki i ti’n perdi laprouvasyon Zeova? Non! O kontrer, son landirans ti montre ki Zeova ti pe beni li. (Rom. 5:3-5) Aprezan mazin ou prop sityasyon. Ou pe andire fidelman menm si ou pe pas dan problenm. Alor ou osi ou kapab asire ki ou annan laprouvasyon Zeova.

12. Ki mannyer ler nou pa kapab fer sa ki nou ti ava kontan fer dan servis Zeova, sa i fer nou perdi nou lazwa?

¹² Si nou pa kapab fer sa ki nou ti ava kontan dan servis Zeova. (Prov. 13:12) Vi ki nou kontan Zeova e nou rekonesan anver li, sa i motiv nou pour fer plis dan son servis. Me si nou met en lobzektif ki pa rezonnab dapre nou sirkonstans, sa i kapab fer nou dekouraze. (Prov. 17:22) En pionye ki apel Holly i dir: “Mon ti anvi asiste Lekol pour bann predikater Rwayonm, pour servi aletranze oubyen pour servi lo proze konstriksyon Ramapo. Me mon sirkonstans ti sanze e mon ti nepli kapab atenn sa bann lobzektif. Sa ti fer mwan dezapwente. Ou kapab fristre ler ou anvi akonpli bann keksoz me ou pa kapab.” En kantite dimoun i santi koumsa.

13. Ki bann lobzektif rezonnab nou kapab mete si nou sirkonstans i anpes nou fer sa ki nou ti ava kontan?

¹³ Ki mannyer nou kapab retrouv nou lazwa? Rapel ki Zeova pa ekspekte tro bokou avek nou e i pa ekspekte ki nou fer plis ki sa ki nou kapab. Zeova i apresye nou menm si nou pa kapab fer menm kantite ki lezot pe fer. I anvi ki nou fidel e modes. (Mik. 6:8; 1 Kor. 4:2) I pli enterese avek sa ki nou ete anndan ki sa ki nou fer. Alor, eski i rezonnab pour nou ekspekte plis avek nou lekor ki sa ki Zeova i ekspekte avek nou?c Non. Si ou sirkonstans i anpes ou fer sa ki ou ti ava kontan fer dan servis Zeova, esey konsantre lo sa ki ou kapab fer. Par egzanp, eski ou kapab ede form bann zenn oubyen ankouraz bann frer ek ser aze? Eski ou kapab annan sa lobzektif pour ankouraz en dimoun an personn, par telefonn oubyen par anvoy li en teks? Zeova pou beni ou e fer ou zwaye anmezir ou fer zefor pour atenn bann lobzektif ki rezonnab. Gard antet ki byento dan nouvo lemonn, nou pou annan en kantite loportinite pour servi Zeova dan bann fason ki nou pa ni menm kapab imazinen. Holly, ki’n ganny mansyonnen pli boner, i dir: “Si mon konmans santi mwan dekouraze, mon pran en pe letan e mon dir dan mwan menm, ‘Mon pou viv pour touzour.’ Alor avek led Zeova, mon pou kapab atenn serten mon bann lobzektif dan nouvo lemonn.”

14. Kwa ankor ki kapab fer nou perdi nou lazwa?

¹⁴ Si sa keksoz pli enportan i pour fer nou lekor plezir. Serten i servi rezo sosyal pour fer dimoun krwar ki si zot fer zot lekor plezir, zot pou vreman zwaye e satisfe. Nou kapab konmans krwar ki bann keksoz parey divertisman, shopping e vwayaze i bann keksoz ki pli enportan. I pa mal pour kontan sa bann keksoz. Zeova in kree nou dan en fason ki nou kapab apresye bann zoli keksoz. Me en kantite dimoun in vwar ki sa ki zot ti krwar pou fer zot zwaye an realite in fer zot perdi zot lazwa. En pionye ki apel Eva i dir: “Ler ou mazin zis pour fer ou lekor plezir, ou pa zanmen satisfe.” Si nou zis esey fer plezir nou prop lekor, nou pou toultan sagren e dezapwente.

15. Ki nou aprann avek Lerwa Salomon?

¹⁵ Nou kapab aprann avek leksperyans Lerwa Salomon konsernan sa ki arive ler nou fer plezir zis nou prop lekor. I ti esey trouv lazwa par satisfer son bann dezir. Par egzanp i ti manz diferan bon manze, ekout bann zoli lanmizik e i ti aste tou sa ki i ti anvi. Me sa bann keksoz pa ti fer li zwaye. I dir: “Lizye pa fatige gete e zorey pa fatige tande.” (Ekle. 1:8; 2:1-11) Sa ki bann dimoun dan sa lemonn i krwar pou anmenn vre lazwa i parey fo biye. I paret annan valer me sa pa vre. Sa bann keksoz pa pou zanmen fer nou vreman zwaye.

16. Ki mannyer ler nou donn lezot, sa i ed nou pour retrouv nou lazwa? (Vwar portre.)

¹⁶ Ki mannyer nou kapab retrouv nou lazwa? Zezi ti ansenny nou ki “i annan plis lazwa pour donnen ki pour resevwar.” (Akt 20:35) En ansyen ki apel Alekos i dir: “Mon esey fer bann pti keksoz pour lezot. Ler mon donn lezot, mon pa mazin sa ki mwan mon anvi e sa i fer mwan zwaye.” Ki ou, ou kapab fer pour lezot? Si ou vwar en dimoun i sagren, esey ankouraz li. Petet ou pa pou kapab rezourd son problenm me ou kapab rekonfort li par ekout li, esey konpran son santiman, demontre konpasyon e par fer li rapel pour zet son fardo lo Zeova. (Ps. 55:22; 68:19) Nou kapab osi fer li rapel ki Zeova pa’n abandonn li. (Ps. 37:28; Iza. 59:1) Petet ou kapab osi fer en bon keksoz pour li. Par egzanp, ou kapab prepar en repa pour li oubyen al fer en pti marse ansanm avek li. Envit li pour al predikasyon avek ou parski sa pou fer li pli zwaye. Les Zeova servi ou pour ankouraz lezot. Ler nou konsantre lo lezot olye lo nou lekor sa pou fer nou zwaye.—Prov. 11:25.

17. Ki nou bezwen fer si nou anvi vreman zwaye? (Psonm 43:4)

¹⁷ Nou kapab vreman zwaye si nou kontinyen vin pli pros avek nou Papa ki dan lesyel. Labib i asir nou ki Zeova i nou “gran lazwa.” (Lir Psonm 43:4.) Alor nenport keksoz ki nou pe pas ladan, nou pa bezwen enkyet oubyen per. Alor annou kontinyen konsantre lo Zeova ki Sours nou lazwa pour touzour—Ps. 144:15.