Ki mannyer ou kapab reste zwaye dan ou vye zour?

1-2. Ki mannyer Zeova i vwar son bann serviter aze ki fidel? (Psonm 92:12-14; vwar portre.)

DAN serten parti lemonn dimoun i krwar ki i en loner pour vin vye. Me dan lezot landrwa, dimoun i fer tou sa ki zot kapab pour zot pa paret vye. Par egzanp, eski ou rapel ler ou ti ganny ou premye seve blan? Petet ou ti anvi tir li avan ki dimoun i vwar me ou ti realize ki menm si ou tir sa seve blan, sa pa pou anpes lezot pouse. Sa legzanp i montre ki serten pa anvi vin vye.

² Me ki mannyer nou Papa ki dan lesyel i vwar son bann serviter ki pe vin vye? (Prov. 16:31) I ti dir ki zot parey bann pye dibwa ki pe prospere. (Lir Psonm 92:12-14.) Akoz sa legzanp i apropriye? Souvandfwa bann pye dibwa ki annan en kantite fler ek fey, i annan plizyer dizenn lannen. Enn bann pye dibwa pli zoli i Japanese flowering cherry. Serten parmi sa bann pye dibwa i annan plis ki mil an e zot vreman zoli. Parey sa bann pye dibwa, bann serviter fidel Zeova ki aze i zoli dan son lizye. Zeova pa zis vwar zot bann seve blan me i apresye bann zoli kalite ki zot annan. Zot in servi li pour plizyer lannen, zot in andire e zot fidel.

3. Donn en legzanp pour montre lafason ki Zeova in servi bann dimoun aze pour fer bann travay enportan.

³ Menm si en dimoun i vyeyi i pa perdi son valer dan lizye Zeova.a Anfet, Zeova i souvan servi bann dimoun aze pour fer bann travay enportan oubyen bann keksoz merveye. Par egzanp, Sara ti annan en bon laz ler Zeova ti dir ki i pou vin manman en gran nasyon e en zanset Mesi. (Zen. 17:15-19) Moiz osi ti annan en bon laz ler Zeova ti swazir li pour gid pep Izrael ler zot ti sorti Lezip. (Egz. 7:6, 7) Zapot Zan osi ti annan en bon laz ler Zeova ti enspir li pour ekri senk liv Labib.

4. Dapre Proverb 15:15, kwa ki kapab ed bann frer ek ser aze pour fer fas avek bann problenm ki zot rankontre? (Vwar portre.)

⁴ Anmezir ki en dimoun i vin pli vye, sa i kapab fer li annan en kantite problenm ki i ti napa avan. En ser ti fer en dyok e i ti dir: “Ou bezwen brav pour ou fer fas avek lavyeyes.” Me ler bann aze i zwayeb sa i kapab ed zot pour fer fas avek bann difikilte ki vin avek lavyeyes. (Lir Proverb 15:15.) Dan sa lartik, nou pou vwar serten keksoz ki bann dimoun aze i kapab fer pour ed zot reste zwaye. Nou pou osi vwar ki mannyer bann frer ek ser dan kongregasyon i kapab ed bann frer ek ser aze. Me premyerman annou vwar akoz i kapab difisil pour reste zwaye anmezir nou vin pli vye.

AKOZ I KAPAB DIFISIL POUR RESTE ZWAYE ANMEZIR OU VIN VYE?

5. Kwa ki kapab fer serten dimoun aze dekouraze?

⁵ Kwa ki kapab fer ou dekouraze? Petet ou santi koumsa parski ou pa kapab fer sa ki ou ti abitye fer. Petet ou swete ki ou ti ankor zenn e an bonn sante. (Ekle. 7:10) Par egzanp, en ser ki apel Ruby i dir: “I difisil pour mwan met lenz lo mwan parski mon lekor i fermal e mon pa kapab fer bokou mouvman. I menm difisil pour fer keksoz senp parey lev mon lipye pour met soset. Mon ganny rematis e mon lanmen i anmorti e sa i fer li difisil pour fer menm bann pti keksoz.” En frer ki apel Harold, ki ti servi dan Betel, i dir: “Mon nepli parey avan e parfwa sa i fer mwan fristre. Mon ti en dimoun atletik. Mon ti kontan zwe baseball. Ler mon ti pe zwe, lezot ti pou dir, ‘Donn boul Harold parski zanmen i manke li.’ Me aprezan mon pa krwar mon kapab menm anvoy boul.”

6. (a) Ki lezot rezon ki kapab fer serten frer ek ser aze dekouraze? (b) Kwa ki kapab ed bann frer ek ser aze pour deside si zot pou aret dray oubyen non? (Vwar sa lartik dan sa nimero ki annan pour tit “Eski mon devret aret dray?”)

⁶ Petet ou dekouraze parski ou nepli kapab fer serten keksoz lo ou menm. Ou kapab santi koumsa sirtou si ou bezwen led en carer oubyen si ou bezwen al reste avek enn ou zanfan. Oubyen petet ou kapab dezapwente akoz ou lasante in deteryore oubyen ou pa kapab vwar byen e sa i fer ki ou pa kapab al landrwa ou tousel oubyen dray en transpor. Sa i kapab fer ou vreman sagren. Me sa ki kapab ed nou i ler nou gard antet ki nou presye pour Zeova e pour lezot, menm si nou pa kapab pran swen avek nou lekor, reste nou tousel oubyen dray en transpor. Osi, nou kapab asire ki Zeova i konpran nou santiman. Sa ki enportan pour Zeova, i sa dimoun ki nou ete anndan, setadir ki nou kontan li e kontan nou bann frer ek ser.—1 Sam. 16:7.

7. Kwa ki kapab ed bann ki sagren akoz zot krwar zot pa pou vwar lafen sa move lemonn?

⁷ Petet ou sagren akoz ou krwar ki ou pou vwar ler Zeova i detrir sa move lemonn. Si ou santi koumsa kwa ki kapab ed ou? Esey rapel ki Zeova pe demontre pasyans e i pe espere pour detrir sa move lemonn. (Iza. 30:18) Me i annan en rezon akoz Zeova pe demontre pasyans. Son pasyans pe donn plizyer milye dimoun sa letan ek loportinite pour aprann konn li e pour servi li. (2 Pyer 3:9) Alor ler ou dekouraze, esey mazin lakantite dimoun ki pou benefisye avek pasyans Zeova avan lafen i vini. I kapab ki serten parmi zot i ou fanmir.

8. Ki i kapab arive avek bann dimoun aze anmezir ki zot vin pli vye?

⁸ Ki swa nou zenn oubyen aze, ler nou pa santi nou byen, sa i kapab fer nou dir oubyen fer en keksoz ki nou regrete pli tar. (Ekle. 7:7; Zak 3:2) Par egzanp, ler Zob, ki ti en zonm fidel ti pe soufer, i ti “koze san reflesir.” (Zob 6:1-3) I osi annan bann maladi ki kapab fer bann dimoun aze fer oubyen dir bann keksoz ki normalman zot pa ti pou dir oubyen fer. Byensir menm si nou malad oubyen vye, sa pa donn nou en leskiz pour koz dan en move fason oubyen pour toultan ekspekte ki lezot i fer keksoz pour nou. Si nou konnen ki nou pa’n koz byen avek en dimoun, nou devret demann leskiz deswit.—Mat. 5:23, 24.

KI MANNYER OU KAPAB KONTINYEN RESTE ZWAYE?

9. Akoz ou devret aksepte led lezot? (Vwar portre.)

⁹ Aksepte led lezot. (Gal. 6:2) Petet o konmansman ou pou vwar li difisil pour fer sa. En ser ki apel Gretl i dir: “Parfwa mon vwar li difisil pour aksepte led lezot parski mon krwar ki mon pou en fardo pour zot. I’n pran letan pour mwan sanz mon fason panse e pour admet ki mon bezwen led.” Ler ou aksepte led lezot, ou permet zot pour eksperyans sa lazwa ki en dimoun i gannyen ler i ed lezot. (Akt 20:35) San dout, ou kontan pour vwar ki lezot i kontan ou e zot anvi pran swen avek ou.

10. Akoz ou pa devret oubliye pour demontre rekonesans? (Vwar portre.)

¹⁰ Demontre rekonesans. (Kol. 3:15; 1 Tesa. 5:18) Nou rekonesan ler lezot i fer bann bon keksoz pour nou. Me parfwa nou kapab oubliye remersye zot. Me si nou fer en sourir e nou dir mersi, nou fer nou bann zanmi santi ki zot annan valer e ki nou apresye zot. Leah, ki pran swen avek bann frer ek ser aze dan Betel, i dir: “Enn bann ser ki mon pran swen avek, i kontan kit bann pti not remersiman pour mwan. I pa bann gran mesaz me zot vreman tousan. Mon vreman kontan pour ganny sa bann pti not e mon kontan pour konnen ki i apresye mon led.”

11. Ki mannyer ou kapab ed lezot? (Vwar portre.)

¹¹ Fer zefor pour ed lezot. Ler ou servi ou letan ek lenerzi pour ed lezot, sa pou ed ou pour pa tro konsantre lo ou prop problenm. En proverb Afriken i konpar bann dimoun aze avek en bibliotek ki ranpli avek bann liv ki annan en kantite lasazes. Me bann liv ki ganny kite lo letazer pa ansenny personn oubyen rakont bann zistwar. Alor parey en bibliotek, fer zefor pour partaz ou konnesans ek leksperyans avek bann zenn. Demann zot bann kestyon e apre ekout zot. Ansenny zot akoz i toultan pli bon pour viv dapre bann standar Zeova e ki zot pou ere si zot fer sa. Ler ou rekonfort e ankouraz ou bann zanmi ki pli zenn, ou pou zwaye.—Ps. 71:18.

12. Dapre Izai 46:4, ki Zeova i promet pour fer pour bann frer ek ser aze? (Vwar portre.)

¹² Demann Zeova pour donn ou lafors. Menm si ou fatige fizikman oubyen emosyonnelman, Zeova li “i pa zanmen fatige oubyen perdi son lafors.” (Iza. 40:28) I toultan annan lenerzi. Ki mannyer i servi sa lenerzi? En fason, i par donn bann frer ek ser aze lafors. (Iza. 40:29-31) Anfet Zeova i promet pour ed zot. (Lir Izai 46:4.) Zeova i toultan gard son bann promes. (Zoz. 23:14; Iza. 55:10, 11) Ler ou priy Zeova e apre ou santi son lanmour ek sipor, sa pou fer ou zwaye.

13. Dapre 2 Korentyen 4:16-18, ki nou devret gard antet? (Vwar portre.)

¹³ Gard antet ki ou sityasyon i tanporer. Ler nou gard antet ki en sityasyon difisil i tanporer, sa pou fer li pli fasil pour nou andire. Labib i asir nou ki lavyeyes ek maladi i tanporer. (Zob 33:25; Iza. 33:24) Alor, ou kapab zwaye parski ou konnen ki dan lavenir, ou pou pli an bonn sante, pli for e pli zoli ki ou deza ete la konmela. (Lir 2 Korentyen 4:16-18.) Ki mannyer lezot i kapab ede?

KI MANNYER LEZOT I KAPAB EDE?

14. Akoz i enportan pour vizit e telefonn bann frer ek ser aze?

¹⁴ Vizit e telefonn bann frer ek ser aze regilyerman. (Ebr. 13:16) Bann frer ek ser aze i kapab santi zot tousel. En frer ki apel Camille e ki pa kapab kit son lakaz, i dir: “Depi bomaten ziska aswar mon reste anndan. Alor mon santi mwan annwiye. Parfwa mon santi mon parey en vye lyon dan en kazo. Mon ankoler e fristre.” Ler nou vizit bann ki aze, nou asir zot ki zot enportan pour nou e ki nou kontan zot. Nou tou nou kapab rapel en moman kot nou ti plàn pour telefonn oubyen vizit en frer oubyen ser aze dan kongregasyon me apre nou pa’n fer li. Nou tou nou annan en kantite keksoz pour fer. Alor kwa ki kapab ed nou pour “verifye sa ki pli enportan,” enkli vizit bann aze? (Fili. 1:10) Petet ou kapab ekri en not lo ou kalandriye pour fer ou rapel pour anvoy en mesaz oubyen pour telefonn en frer oubyen en ser aze dan ou kongregasyon. Ou kapab osi plàn davans e fer letan pour vizit zot.

15. Ki bann zenn ek bann aze i kapab fer ansanm?

¹⁵ Si ou en zenn, petet ou kapab mazinen ki ou pou dir oubyen ki kalite aktivite ou kapab fer avek bann aze. Me pa tro enkyet lo la. Zis vin en bon zanmi pour zot. (Prov. 17:17) Pran letan pour koz avek bann aze avan oubyen apre renyon. Petet ou kapab demann zot pour dir ou zot verse prefere oubyen pour rakont ou en souvenir zot lanfans ki ti gou. Ou kapab osi envit zot pour get en progranm Televizyon JW^® ansanm avek ou. Ou kapab osi ed zot dan bann fason pratik par egzanp ou kapab ed zot pour fer sir ki zot lekipman elektronik pe mars byen e ki zot annan bann dernyen piblikasyon. En ser ki apel Carol i dir: “Demann bann frer ek ser aze si zot ti ava kontan fer bann keksoz ki ou kontan ansanm avek ou. Menm si mon pli vye, mon ankor anvi annan en lavi ki gou. Mon kontan fer shopping, manze dan restoran e vizit bann zoli landrwa.” En ser ki apel Maira i dir: “Enn mon bann zanmi i annan 90 an. Sa ser i 57 an pli vye ki mwan me souvandfwa mon oubliy sa parski nou rikannen ansanm e nou get film. Ler nou fer fas avek bann problenm, nou rod konsey avek kanmarad.”

16. Akoz i ti pou byen pour al avek bann frer ek ser aze zot bann lapwentman dokter?

¹⁶ Al avek zot ler zot annan lapwentman dokter. Ou kapab anmenn zot zot lapwentman dokter me ou osi kapab fer sir ki bann dokter ek ners i tret zot byen e donn zot sa led ki zot bezwen. (Iza. 1:17) Ou kapab osi ed zot par ekri sa ki dokter i dir. En ser ki apel Ruth i dir: “Parfwa ler mon al mon bann lapwentman dokter mon tousel, dokter pa ekout mwan. Bann dokter i kapab dir bann keksoz parey, ‘Ou pa malad ou, ou lespri ki pe fer ou krwar ou malad.’ Me ler en dimoun i al avek mwan, bann dokter i tret mwan pli byen. Mon remersye bann frer ek ser ki pran letan pour al avek mwan mon bann lapwentman.”

17. Ki mannyer ou kapab fer predikasyon avek bann frer ek ser aze?

¹⁷ Al predikasyon avek zot. Serten frer ek ser aze napa lafors pour fer predikasyon kaz an kaz. Par egzanp, eski ou kapab envit en ser aze pour fer prezantwar ansanm avek ou? Ou kapab menm anmenn en sez pour li asiz o bor prezantwar. Oubyen ou kapab demann en frer aze pour al en letid ansanm avek ou. Petet ou kapab menm fer sa letid kot son lakour. Bann ansyen i kapab fer renyon predikasyon dan lakour en frer oubyen en ser aze pour zot kapab partisipe zot osi. Tou sa ki nou fer pour onor bann aze i vo lapenn.—Prov. 3:27; Rom. 12:10.

18. Ki nou pou vwar dan sa lartik ki swiv?

¹⁸ Sa lartik in fer nou rapel ki Zeova i kontan e apresye bann frer ek ser aze. Nou osi nou apresye sa bann frer ek ser. Frer ek ser aze, menm si ou rankontre problenm akoz lavyeyes, Zeova pou ed ou gard ou lazwa. (Ps. 37:25) I ankourazan pour konnen ki dan lavenir ou pour pli zwaye ki ou’n deza ete. Me serten frer ek ser i annan en lot problenm. Zot pran swen avek en manm fanmir ki aze, en zanfan oubyen en zanmi ki malad. Ki mannyer zot zot kapab reste zwaye? Nou pou vwar larepons sa kestyon dan sa lartik ki swiv.