Kestyon lekter

Dan lavenir, ki “nide” Zeova pou met dan leker bann nasyon?

Revelasyon 17:16, 17 i dir sa konsernan konmansman gran ladetres: “Sa dis korn ki ou ti vwar e sa bebet sovaz pou ay sa prostitye. Zot pou depouy li e met li touni, zot pou manz son laser e zot pou konpletman bril li dan dife. Parski Bondye in met dan zot leker son nide pour ki zot fer son lavolonte, wi pour ki zot realiz zot prop nide e pour fer sa, zot donn zot rwayonm avek sa bebet sovaz.” Oparavan, nou bann piblikasyon ti dir ki sa “nide” ki Zeova pou met dan leker bann nasyon i pour detrir fo larelizyon.

Me nou bezwen fer en azisteman dan nou konprenezon. Sa “nide” ki Zeova pou met dan leker bann nasyon i pour bann nasyon “donn zot rwayonm avek sa bebet sovaz.” Pour nou konpran ki mannyer sa pou ganny akonpli, annou vwar larepons detrwa kestyon.

Lekel ki ganny mansyonnen dan sa profesi? “Sa prostitye” i osi ganny apele “Gran Babilonn” e i reprezant tou fo larelizyon. Sa “bebet sovaz rouz” i reprezant sa lorganizasyon ki gard lape dan lemonn ki ti konmans fonksyonnen an 1919. Sa letan, i ti apel Lasosyete bann Nasyon e konmela, i apel Nasyon-z-ini. (Rev. 17:3-5) “Sa dis korn” i reprezant tou bann gouvernman ki siport sa bebet sovaz.

Ki sa prostitye i annan pour fer avek sa bebet sovaz rouz? Sa prostitye “pe asize” lo sa bebet sovaz, ki vedir i pe siport li e i pe esey enfliyans e menm domin li.

Ki pou arive avek sa prostitye? Sa bebet sovaz ansanm avek sa dis korn ki siport li “pou ay sa prostitye.” Zot pou sitan ay li ki zot pou pran tou son larises e montre tou dimoun ki i move. Osi, zot pou detrir li zis parey Zeova ti’n dir pou arive. (Rev. 17:1; 18:8) Sa pou lafen tou fo larelizyon. Me avan ki sa i arive, Zeova pou fer bann nasyon fer en keksoz ki pa’n zanmen arive dan listwar imen.

Ki Zeova pou fer bann nasyon fer? I pou met dan leker sa dis korn “son nide” setadir i pou fer “zot donn zot pouvwar ek lotorite sa bebet sovaz [rouz]” setadir Nasyon-z-ini. (Rev. 17:13) Reflesir lo ki sa i vedir. Eski bann gouvernman imen pou zis deside lo zot menm pour donn sa bebet sovaz zot pouvwar ek lotorite? Non. Sa profesi i montre ki Zeova li menm ki pou enfliyans zot pour fer sa. (Prov. 21:1; konpar Izai 44:28.) Eski sa pou ariv dousman dousman? Non. I kler ki sa pou ariv en sel kou. Apre sa, sa bebet sovaz pou akonpli zizman Zeova e detrir tou fo larelizyon.

Ki nou ekspekte pou arive dan lavenir? Nou pa devret ekspekte vwar bann rapor dan nouvel ki dir ki bann gouvernman pe ptitapti siport Nasyon-z-ini plis. Me nou kapab ekspekte ki en sel kou, Zeova pou met dan leker bann nasyon pour donn zot pouvwar sa bebet sovaz. Ler sa i arive, nou pou konnen ki gran ladetres pros pour konmanse. Me antretan, “annou reste eveye e kontinyen rezonn byen.”—1 Tesa. 5:6.