Liv Zob i kapab ed ou ler ou pe donn konsey

1-2. Ki sa trwa zanmi Zob ek Eliou ti bezwen fer ler zot ti vin vizit Zob?

SA NOUVEL ti’n propaze partou parmi bann dimoun dan Les. Zob, en zonm ki bokou dimoun i konnen konman en zonm ris, in perdi tou keksoz. Ler Elifaz, Bildad ek Zofar, trwa parmi bann zanmi Zob i tande ki’n arive avek Zob, zot vin Ouz pour vin rekonfort li. Me sa ki zot vwar ler zot arive, i sok zot.

² Imazin sa ki zot vwar. Dan en sans, Zob in perdi tou sa ki i ti annan. I ti annan en kantite mouton, bef, samo ek bourik e tousala ti’n swa ganny touye oubyen vole. Son bann zanfan ek laplipar son bann servant ti’n ganny touye. Sa lakaz kot bann zanfan Zob ti’n ganny touye ti’n vin en ta debri. An plis ki sa, Zob ti malad. I ti ganny bann klou vreman fermal. Depi kot sa trwa zonm ti vini, zot ti vwar Zob pe asiz dan lasann e i ti vreman sagren. Ki mannyer zot reazir? Pandan set zour, zot pa dir Zob nanryen parski zot vwar ki i pe soufer. (Zob 2:12, 13) Pandan sa letan, en zenn garson ki apel Eliou i vini e i asiz pa tro lwen avek zot. Finalman Zob i koze e i modi sa zour ki i ti ne e demann lanmor. (Zob 3:1-3, 11) I kler ki Zob i bezwen led! Sa ki sa bann zonm i dir e lafason ki zot koze pou montre si vreman zot zanmi Zob e si zot enterese avek son byennet.

3. Ki nou pou vwar dan sa lartik?

³ Zeova ti fer Moiz ekri sa ki sa trwa zanmi Zob ek Eliou ti dir e fer. I bon pour gard antet ki Eliou ti dir sa ki Zeova ti anvi i dir. Tandis ki serten keksoz ki Elifaz ti dir, i paret ki en demon ki ti’n dir li. (Zob 4:12-16; 33:24, 25) I pour sa rezon ki dan liv Zob, i annan serten bann pli bon konsey me i osi annan serten bann pli move konsey. Enn bann byenfe ki nou kapab gannyen ler nou etidye liv Zob, i ki i kapab ed nou ler nou bezwen donn konsey. Premyerman, nou pou vwar move legzanp ki sa trwa zanmi Zob in kite. Apre, nou pou vwar bon legzanp Eliou. Atraver sa bann legzanp, nou pou vwar bann byenfe ki bann Izraelit ti’n kapab gannyen avek liv Zob e bann byenfe nou gannyen ozordi.

LAFASON KI SA TRWA ZANMI ZOB TI DONN LI KONSEY

4. Akoz sa trwa zanmi Zob pa ti arive rekonfort Zob? (Vwar portre.)

⁴ Labib i dir ki apre ki sa trwa zanmi Zob ti’n tann konsernan bann problenm ki Zob ti’n pas ladan, zot ti anvi “rekonfort e senpatiz avek Zob.” (Zob 2:11) Me zot pa ti arive fer sa. Akoz? Pour omwen trwa rezon. Premyerman, zot ti vitman tonm lo move konklizyon. Par egzanp, zot ti krwar ki Zob ti pe ganny pini pour bann pese ki i’n fer.a (Zob 4:7; 11:14) Dezyenmman, laplipar bann konsey ki zot ti donn Zob, pa ti ed li, pa ti zantiy e ti bles li. Par egzanp, tou le trwa zonm ti dir bann keksoz ki ti paret saz me ki pa ti itil. (Zob 13:12) De fwa, Bildad ti dir ki Zob ti koz tro bokou. (Zob 8:2; 18:2) Me Zofar li, i ti dir ki Zob ti “bet.” (Zob 11:12) Trwazyenmman, menm si zot pa ti kriy avek Zob, zot ton lavwa ti montre ki zot ti krwar ki zot pli siperyer, zot ti pe akiz li e koz li mirak. (Zob 15:7-11) Sa bann zonm ti pli anvi montre ki Zob ti’n fer en keksoz mal olye rekonfort li e batir son lafwa.

5. Ki ti arive apre ki sa trwa zanmi Zob ti’n donn li konsey?

⁵ Nou pa sirprann ki konsey sa trwa zanmi Zob pa ti anmenn bann bon rezilta. Sa ki zot ti dir ti dekouraz Zob. (Zob 19:2) Alor nou kapab konpran akoz i ti santi ki i bezwen defann son repitasyon. Me sa ti fer ki i pa ti rezonn byen e i pa ti dir bann keksoz saz. (Zob 6:3, 26) Bann zanmi Zob pa ti mazin parey Zeova e zot pa ti demontre konpasyon anver Zob. San realize, Satan ti pe servi zot pour dekouraz Zob. (Zob 2:4, 6) Ki byenfe bann Izraelit dan lepase ti’n kapab gannyen avek sa resi e ki byenfe nou kapab gannyen ozordi?

6. Ki bann ansyen dan Izrael ti’n kapab aprann avek move legzanp sa trwa zanmi Zob?

⁶ Ki byenfe bann Izraelit ti’n kapab gannyen? Apre ki Zeova ti’n fer bann Izraelit vin en nasyon, i ti apwent bann zonm kalifye, setadir bann ansyen, pour ziz zot dapre son bann standar drwat. (Det. 1:15-18; 27:1) Sa bann zonm ti bezwen ekout byen avan zot donn konsey oubyen pas zizman. (2 Kron. 19:6) Zot ti osi bezwen demann kestyon olye krwar ki zot annan tou lenformasyon. (Det. 19:18) Sa bann ki ti’n ganny apwente pour donn konsey bann Izraelit, ti bezwen koz dan en fason zantiy avek bann ki ti vin kot zot pour rod led. Akoz? Parski si zot ti ankoler, sa ti kapab dekouraz en dimoun e anpes li eksprim son santiman. (Egz. 22:22-24) Bann ansyen dan Izrael ti pou’n kapab aprann en kantite leson dan liv Zob.

7. Apard bann ansyen, lekel an Izrael ki ti’n kapab donn konsey e ki byenfe zot ti’n kapab gannyen avek liv Zob? (Proverb 27:9)

⁷ Pa zis bann zonm matir an Izrael ki ti kapab donn konsey. Nenport Izraelit ki swa zot ti zenn, aze, zonm oubyen madanm, ti kapab donn konsey son zanmi ki ti bezwen led pour amelyor son ladorasyon pour Zeova oubyen pour aranz son kondwit. (Ps. 141:5) Bann vre zanmi i pare pour donn bann konsey koumsa. (Lir Proverb 27:9.) Sa ki sa trwa zanmi Zob ti dir e fer, ti’n kapab vin en legzanp pour bann Izraelit konsernan kwa ki zot pa devret dir e kwa ki zot pa devret fer ler pe donn konsey.

8. Ki nou devret fer atansyon ler nou pe donn konsey? (Vwar portre.)

⁸ Ki byenfe nou kapab gannyen? Konman bann Kretyen, nou anvi ed nou bann frer ek ser ler zot pas dan problenm. Me pour fer sa, nou devret pa fer sa ki sa trwa zanmi Zob ti fer. Premyerman, nou bezwen fer sir ki nou evite tonm lo en konklizyon vitman e ki nou annan tou lenformasyon avan ki nou donn en konsey. Dezyenmman, nou konsey pa devret baze zis lo nou leksperyans, parey Elifaz ti fer plizyer fwa. Me i devret baze lo Parol Bondye ki en fondasyon solid. (Zob 4:8; 5:3, 27) Trwazyenmman, nou pa devret brit oubyen kritik sa dimoun. Rapel ki serten keksoz ki Elifaz ek son de zanmi ti dir ti vre e pli tar zapot Pol ti menm sit sa ki Elifaz ti’n dir. (Konpar Zob 5:13 avek 1 Korentyen 3:19.) Me kantmenm sa, laplipar keksoz ki zot ti dir lo Bondye pa ti vre e zot ti bles Zob. Sa ti fer ki Zeova ti dir ki sa ki zot ti’n dir ti mansonz. (Zob 42:7, 8) Ler nou donn konsey, nou bezwen fer sir ki sa ki nou dir, pa fer Zeova paret konman en Bondye ki pa rezonnab oubyen fer Son bann serviter krwar ki Zeova pa kapab kontan zot. Aprezan annou vwar ki nou kapab aprann avek legzanp Eliou.

LAFASON KI ELIOU TI DONN ZOB KONSEY

9. Akoz Zob ti bezwen led apre ki son bann zanmi ti aret koze e ki mannyer Zeova ti ed li? Eksplike.

⁹ Zob ek sa trwa zonm ti argimante pour en kantite letan. Zot ti koz pour sitan en kantite letan ki zot parol i form parti 28 sapit dan Labib e sa ki zot ti dir i montre ki zot ti ankoler oubyen fristre. Alor nou kapab konpran akoz Zob ti ankor dekouraze. I ti ankor bezwen rekonfor ek konsey. Ki mannyer Zeova ti ed Zob? I ti servi Eliou pour donn li konsey. Akoz Eliou ti esper en pe letan avan ler i koze? Li menm i dir: “Mon zenn e zot, zot aze. Sanmenm mon’n espere avan mon koze.” (Zob 32:6, 7) Menm si Eliou ti zenn, i ti konpran en keksoz ki en kantite parmi nou i realize ozordi: Bann aze in viv pli lontan e zot in aprann plizyer keksoz. Sa i fer ki zot annan lasazes ek leksperyans ki souvandfwa bann zenn napa. Me apre ki Eliou ti’n ekout Zob ek son bann zanmi, i ti nepli kapab reste trankil. I ti dir: “Pa zis laz ki fer en dimoun vin saz e pa zis bann dimoun aze ki konpran sa ki byen.” (Zob 32:9) Ki Eliou ti dir apre e ki mannyer i ti koze?

10. Ki Eliou ti fer avan i ti donn Zob konsey? (Zob 33:6, 7)

¹⁰ Avan ki Eliou ti donn Zob konsey, i ti anvi ki Zob i santi li kalm e pare pour ekout sa ki i ti pe al dir li. Ki mannyer i ti fer sa? Premyerman, i ti kontrol son prop lemosyon. Nou konn sa parski Labib i dir ki o konmansman Eliou ti ankoler. (Zob 32:2-5) Me kantmenm sa, Eliou pa ti zanmen tir son lakoler lo Zob. O kontrer i ti koz dan en fason ki ti reasir Zob. Par egzanp, i ti dir Zob: “Gete! Mon parey ou devan sa vre Bondye.” (Lir Zob 33:6, 7.) Apre sa, i ti fer Zob konpran ki i ti’n ekout li byen ler i ti pe koze. Anfet, i ti repet serten keksoz ki Zob ti’n dir. (Zob 32:11; 33:8-11) Eliou ti fer en keksoz en pe parey pli tar ler i ti donn Zob konsey.—Zob 34:5, 6, 9; 35:1-4.

11. Ki mannyer Eliou ti donn Zob konsey? (Zob 33:1)

¹¹ Ler Eliou ti donn Zob konsey, i ti fer li dan en fason ki ti demontre respe anver sa zonm fidel. Par egzanp, Eliou ti servi non Zob, en keksoz ki i paret sa trwa lezot zonm pa ti’n fer. (Lir Zob 33:1.) I kapab ki Eliou ti rapel ki kantite i ti anvi koze ler Zob ek son bann zanmi ti pe argimante, alor i ti donn Zob loportinite pour koze anmezir i ti donn Zob konsey. (Zob 32:4; 33:32) Eliou ti osi eksplik Zob dan en fason kler akoz serten keksoz ki i ti dir ti mal e i ti fer Zob rapel ki Zeova i saz, pwisan, zis e i annan lanmour fidel. (Zob 36:18, 21-26; 37:23, 24) I tre probab ki bann bon konsey ki Eliou ti donn Zob, ti fer li annan sa bon leta lespri pour li kapab ganny lezot konsey, safwasi avek son Kreater. (Zob 38:1-3) Ki byenfe bann Izraelit dan lepase ti’n kapab gannyen avek legzanp Eliou e ki byenfe nou gannyen ozordi?

12. Ki mannyer Zeova ti servi bann profet pour ed son pep e ki byenfe bann Izraelit ti’n kapab gannyen avek bon legzanp Eliou?

¹² Ki byenfe bann Izraelit ti’n kapab gannyen? Tou dilon listwar bann Izraelit, Zeova ti servi bann profet pour ansenny son pep e pour donn zot konsey. Par egzanp, pandan letan bann ziz, Zeova ti servi profet Debora pour gid son pep. I ti osi servi Samyel pour ansenny son pep. I ti servi Samyel menm ler i ti ankor zenn. (Ziz 4:4-7; 5:7; 1 Sam. 3:19, 20) Pandan letan bann lerwa, Zeova ti kontinyen apwent bann profet enn apre lot pour ed bann Izraelit kontinyen ador li dan sa bon fason e pour donn konsey bann ki ti’n elwanye avek ladorasyon pir. (2 Sam. 12:1-4; Akt 3:24) Legzanp Eliou, ki’n ganny rikorde dan liv Zob, ti’n kapab ed bann zonm ek madanm fidel pour konpran ki pour dir e ki mannyer pour koze ler zot donn konsey.

13. Ki mannyer bann Kretyen ozordi i kapab ankouraz zot bann frer ek ser?

¹³ Ki byenfe nou kapab gannyen? Konman bann Kretyen, nou osi nou fer dimoun konn lavolonte Bondye par anons sa mesaz ki dan son Parol, Labib. En lot fason nou fer sa, i par servi bann parol ki batir e ankouraz nou bann frer ek ser. (1 Kor. 14:3) Bann ansyen i devret toultan fer sir ki zot “koz dan en fason ki pou konsol” bann frer ek ser, menm anver bann ki petet i ankoler oubyen bann ki tant pour “koze san reflesir.”—1 Tesa. 5:14; Zob 6:3.

14-15. Ki mannyer en ansyen i kapab swiv legzanp Eliou ler i pe donn konsey? Donn en legzanp.

¹⁴ Imazin sa sityasyon. Meton en ansyen i aprann ki en ser dan son kongregasyon i ganny depresyon e ki i santi li vreman sagren e dekouraze. Sa ansyen ansanm avek en lot frer i vizit sa ser pour ankouraz li. Pandan sa vizit, sa ser i eksplike ki menm si i kontinyen al predikasyon e asiste renyon, i pa zwaye. Ki mannyer sa ansyen pou reazir?

¹⁵ Premyerman, i tre probab ki i pou esey konpran akoz sa ser i santi koumsa. Pour fer sa, i pou bezwen ekout sa ser atantivman. Eski sa ser i santi ki i pa merite ki Bondye i kontan li? Oubyen eski bann “traka lavi” pe fer li dekouraze? (Lik 21:34) Dezyenmman, sa ansyen pou rod loportinite pour felisit sa ser. Apre tou, sa ser i ankor pe asiste renyon e partisip dan predikasyon menm si i vreman sagren e dekouraze. Trwazyenmman, ler sa ansyen in konpran sa sityasyon e i’n konpran kwa ki pe fer sa ser dekouraze, i pou servi Labib pour ed sa ser asire ki Bondye i kontan li.—Gal. 2:20.

ANNOU KONTINYEN APRANN AVEK LIV ZOB

16. Ki mannyer nou kapab kontinyen ganny byenfe avek liv Zob?

¹⁶ Nou ganny en kantite byenfe ler nou etidye liv Zob. Parey nou’n vwar dan sa lartik avan, sa resi pa zis ansenny nou rezon akoz Bondye i permet soufrans me osi ki mannyer nou kapab andire ler nou soufer. Parey nou’n vwar dan sa lartik, nou tou nou kapab donn bann bon konsey par swiv bon legzanp Eliou olye swiv move legzanp ki sa trwa zanmi Zob in kite. Petet laprosenn fwa ki ou donn en dimoun konsey, ou kapab revwar bann leson ki ou’n aprann dan liv Zob avan. Si i fer en pe letan depi ki ou’n lir liv Zob, fer li ou lobzektif pour relir sa liv enteresan. I tre probab ki ou pou vwar bokou plis leson dan sa liv.