Demontre limilite parey Zeova

1. Akoz limilite Zeova i enpresyonan?

LER ou get bann dirizan ki o pouvwar ozordi, eski ou pou dir ki zot annan limilite? I tre probab ki non. Pourtan, Zeova ki Tou Pwisan i annan limilite. (Ps. 113:5-8) I demontre limilite dan tou sa ki i fer e i pa zanmen arogan. Nou pou vwar kat kalite ki Zeova i annan e nou pou vwar ki mannyer sak sa bann kalite i montre ki i annan limilite. Nou pou osi vwar ki mannyer Zezi ti demontre limilite parey son Papa. Ler nou etidye sa bann kalite, sa pou ed nou pour vin pli pros avek Zeova e pour demontre plis limilite parey li.

ZEOVA I FER LI FASIL POUR NOU APROS LI

2. Ki Psonm 62:8 i montre nou konsernan Zeova? (Vwar portre.)

² Normalman i pa fasil pour apros en dimoun ki orgeye. Zot sitan krwar ki zot enportan ki zot azir dan en fason ki fer lezot ezite pour apros zot oubyen ki fer lezot evit zot. Me Zeova i vreman diferan. Vi ki nou Papa ki dan lesyel i annan limilite, i envit nou pour apros li e dir li kwa ki pe fatig nou. (Lir Psonm 62:8.) Zis parey en papa ki kontan son zanfan i kontan pour ekoute ler son zanfan i dir li kwa ki pe fatig li, Zeova i vreman anvi ekout lapriyer son bann serviter. Anfet, Zeova in fer ki plizyer parmi sa bann lapriyer in ganny rikorde dan Labib. Sa i montre ki Zeova i fer li fasil pour son bann serviter apros li. (Zoz. 10:12-14; 1 Sam. 1:10-18) Me kwa ki kapab ed ou si parfwa ou santi ki ou pa merite pour apros Zeova?

3. Akoz ou kapab asire ki Zeova i anvi ki ou apros li dan lapriyer regilyerman?

³ Nou kapab apros Zeova dan lapriyer menm si nou santi ki nou pa merite ki i kontan nou. Akoz nou kapab dir sa? Dan sa legzanp ki Zezi ti donnen konsernan sa garson perdi, Zezi ti konpar Zeova avek en bon papa ki son garson ti santi ki son papa pa ti pou aksepte li dan fanmir menm si i ti’n repantir. Ki mannyer sa papa ti reazir ler son garson ti retourn kot lakour? Zezi ti dir ki dek ki sa papa ti vwar son garson pe vini, sa papa “ti tay kot li, may li e anbras li.” (Lik 15:17-20) Zeova i parey sa papa. Dek ki i tann lapriyer bann dimoun ki annan leker brize akoz zot santi zot koupab oubyen enkyet, son limilite i motiv li pour donn zot tou son latansyon e ekout zot. (Lam. 3:19, 20) I pran pitye pour zot e parey sa papa ki taye pour akey son garson, Zeova pa tarde pour rekonfort e reasir zot ki i’n pardonn zot e i kontan zot. (Iza. 57:15) Dan nou letan, ki mannyer Zeova i “tay” kot nou? I souvandfwa fer sa atraver bann ansyen, bann manm fanmir ki en Temwen Zeova e bann frer ek ser dan kongregasyon. (Zak 5:14, 15) Zeova i donn nou sa kalite led parski i anvi nou reste pros avek li.

4. Akoz i ti fasil pour dimoun apros Zezi?

⁴ Zezi i swiv legzanp son Papa. Parey son Papa, Zezi i demontre limilite. Sa ti fer ki dimoun ti santi zot konfortab pour apros li. Zot pa ti per pour demann li kestyon. (Mark 4:10, 11) Ler i ti demann zot, zot pwennvi lo en keksoz, zot ti pou dir li ki mannyer zot ti pe vreman santi. (Mat. 16:13-16) Ler zot ti fer fot, zot pa ti per parski zot ti konnen ki Zezi i annan labonte, i pran pitye e i annan pasyans. (Mat. 17:24-27) Vi ki Zezi i swiv legzanp son Papa sitan byen, son bann disip ti aprann konn Zeova pli byen. (Zan 14:9) Zot ti aprann ki Zeova pa ti parey bann sef relizye sa letan, ki ti brit, orgeye e ki pa ti enterese avek lezot. O kontrer, i ti annan limilite e i ti fer li fasil pour lezot apros li.

5. Ki mannyer ler nou annan limilite, sa pou fer li pli fasil pour lezot apros nou?

⁵ Ki mannyer nou kapab swiv legzanp Zeova? Ler nou devlop limilite, sa pou fer li fasil pour lezot apros nou. Si nou napa limilite, nou pou zalou lezot, orgeye e nou pa pou oule pardonnen ler lezot i fer nou keksoz. Bann tre koumsa i fer lezot reste lwen avek nou. Me si nou annan limilite, nou pou annan labonte, pasyans e nou pou pardonn lezot. Bann kalite koumsa ki atir lezot ver nou. (Kol. 3:12-14) Bann ansyen i bezwen sirtou fer sir ki bann frer ek ser dan kongregasyon i santi zot konfortab pour apros zot. Pour zot kapab fer sa, zot bezwen pas letan avek bann frer ek ser souvan. Sa i vedir ki zot fer zefor pour asiste renyon an personn olye asiste atraver video konferans, si i pa neseser. Otan ki zot kapab, zot fer zefor pour partisip dan predikasyon kazankaz avek bann frer ek ser. Anmezir ki bann frer ek ser i konn bann ansyen pli byen, sa pou fer zot pli konfortab pour koz avek bann ansyen ler zot bezwen led.

ZEOVA I REZONNAB

6-7. Donn legzanp ki montre lafason ki Zeova ti sede ler son bann serviter ti priy li.

⁶ Souvandfwa, bann dimoun orgeye pa rezonnab avek lezot. Me vi ki Zeova i annan limilite, i rezonnab oubyen i sede menm si i pli siperyer ki tou dimoun dan tou fason. Reflesir lo lafason ki Zeova ti reazir anver Miriyam, ser Moiz. Miriyam ti koz an mal lo Moiz, ki ti reprezantan Zeova. An realite, Miriyam ti pe mank respe pour Zeova. Sa ti fer Zeova vreman ankoler e i ti fer Miriyam ganny lalep. Me ki mannyer Bondye ti reazir ler Aaron ti sipliy Moiz pour ed Miriyam e Moiz ti sipliy Zeova pour ed son ser? Bondye pa ti azir dan en fason orgeye e refize sanz son zizman. Me vi ki i annan limilite, i ti sede e geri Miriyam.—Nom. 12:1-15.

⁷ Zeova ti osi demontre limilite ler i ti ekout Lerwa Ezekya. Atraver Son profet, Zeova ti’n dir sa lerwa ki i ti pou mor. Ezekya ti plere e sipliy Zeova pour geri li. Zeova ti pran pitye pour li e i ti fer li viv pour ankor 15 an. (2 Rwa. 20:1, 5, 6) Vi ki Zeova i annan limilite, sa i motiv li pour demontre konpasyon e sede.

8. Ki legzanp ki montre ki Zezi i rezonnab? (Mark 3:1-6)

⁸ Zezi i swiv legzanp son Papa. Ler i ti lo later, Zezi pa ti ezite pour ed lezot ler i ti posib. Par egzanp, Zezi ti geri bann dimoun zour Saba menm si bann ki ti opoz li, pa ti dakor. (Lir Mark 3:1-6.) Ozordi, Zezi i sef kongregasyon e i ankor rezonnab anmezir ki i gid nou. Par egzanp, ler en dimoun dan kongregasyon i fer en pese grav, Zezi i demontre pasyans anver li e i donn li loportinite pour sanz son konportman.—Rev. 2:2-5.

9. Ki mannyer nou kapab reflesir e mazin dan en fason ki rezonnab? (Vwar portre.)

⁹ Ki mannyer nou kapab swiv legzanp Zeova? Nou bezwen fer zefor pour mazin e azir dan en fason rezonnab parey Zeova. (Zak 3:17) Par egzanp, bann paran ki rezonnab pa lesefer. Me zot osi pa ekspekte ki zot zanfan i fer keksoz ki zot pa kapab fer. Dan Zenez 33:12-14, nou vwar sa bon legzanp ki Zakob in kite. Bann paran ki annan limilite e ki rezonnab, i devret osi fer zefor pour pa konpar zot zanfan avek kanmarad. Bann ansyen osi i bezwen rezonnab. En fason ki zot kapab fer sa, i par sede e aksepte desizyon lamazorite konsey ansyen, ler sa pa pe kas en prensip Labib. (1 Tim. 3:2, 3) Nou tou nou kapab esey konpran pwennvi lezot menm si nou vwar keksoz dan en lot fason. (Rom. 14:1) Alor tou dimoun dan kongregasyon i devret fer zefor pour “montre zot rezonnab avek tou dimoun.”—Fili. 4:5.

ZEOVA I ANNAN PASYANS

10. Dan ki fason Zeova in demontre pasyans?

¹⁰ Petet ou’n remarke ki bann dimoun orgeye pa kontan ler lezot i fer zot espere. Lorgey i fer zot napa pasyans. Sa i konpletman diferan avek Zeova, sa enn ki annan plis pasyans ki okenn lezot dimoun. Par egzanp, dan letan Noe, Zeova ti dir ki i pou esper 120 an avan ki i detrir bann move dimoun. (Zen. 6:3) Noe ti annan letan pour fer grandi son bann zanfan e pour konstri lars avek led son fanmir. Pli tar, en lanz ki ti pe reprezant Zeova ti ekout Abraam avek pasyans anmezir ki Abraam ti pe demann li konsernan destriksyon Sodonm ek Gomor. En dimoun orgeye ti’n kapab dir, “Ou napa drwa demann mwan sa bann kestyon.” Me parey Zeova, sa lanz ti demontre pasyans anver Abraam.—Zen. 18:20-33.

11. Dapre 2 Pyer 3:9, akoz Zeova pe demontre pasyans dan nou letan?

¹¹ Dan nou letan, Zeova pe osi demontre pasyans. I pe esper sa ler ki i’n swazir arive pour li anmenn lafen. Akoz i pe demontre pasyans? “Akoz i pa oule ki personn i ganny detrir, me i oule ki zot tou zot arive repantir.” (Lir 2 Pyer 3:9.) Eski in vo lapenn pour Zeova demontre pasyans? Wi. Parski plizyer milyon dimoun ki annan leker senser in ganny sa loportinite pour vin pros avek li. Nou swete ki plizyer milyon lezot dimoun i ganny sa loportinite pour fer sa zot osi. Me kantmenm sa, pasyans Zeova i annan limit parski menm si Zeova i kontan dimoun, i pa lesefer. I pa pou les bann move keksoz kontinyen arive pour touzour.—Aba. 2:3.

12. Ki mannyer Zezi pe demontre pasyans parey Zeova?

¹² Zezi ti swiv legzanp son Papa. Zezi in demontre pasyans parey Zeova pour plizyer milye lannen. Zezi in vwar kot Satan in dir bann mansonz lo Zeova ek bann imen fidel. (Zen. 3:4, 5; Zob 1:11; Rev. 12:10) Zezi in osi vwar bann imen pas dan en kantite soufrans. Nou kapab mazinen ki kantite i anvi “elimin lemal ki Dyab in fer.” (1 Zan 3:8) Kwa ki ed Zezi pour esper avek pasyans ziska ki Zeova i donn li permisyon pour detrir tou keksoz ki Satan in fer? En rezon i akoz Zezi i annan limilite e i konnen ki Zeova i sa enn ki annan drwa pour deside kan lafen i arive.—Akt 1:7.

13. Ki mannyer Zezi ti demontre pasyans anver son bann zapot e akoz?

¹³ Ler Zezi ti lo later, i ti osi demontre pasyans anver son bann zapot. Par egzanp, menm si son bann zapot ti dispit plizyer fwa konsernan lekel ki pli gran parmi zot, Zezi pa ti fristre avek zot. (Lik 9:46; 22:24-27) O kontrer, i ti kontinyen demontre pasyans anver zot. I ti annan konfyans ki avek letan, zot ti pou fer bann sanzman neseser. Eski ou osi ou fer menm fot tanzantan? Si wi, pa ou rekonesan pour annan en Lerwa ki annan limilite ek pasyans?

14. Ki mannyer nou kapab devlop pasyans?

¹⁴ Ki mannyer nou kapab swiv legzanp Zeova? Ler nou konn “fason panse Kris,” nou pou pli byen kapab mazin e azir parey Zeova. (1 Kor. 2:16) Me ki mannyer nou kapab konn fason panse Kris? Nou bezwen lir bann Levanzil. Apre nou bezwen pran letan pour reflesir lo ki mannyer sa bann resi i montre nou pwennvi Zezi lo bann keksoz. San dout, nou bezwen osi demann Zeova pour ed nou demontre limilite e annan menm fason panse avek Kris. Pli nou mazin parey Kris, pli nou pou kapab swiv legzanp Zeova e demontre pasyans avek nou lekor e avek lezot.—Mat. 18:26-30, 35.

ZEOVA I VWAR BANN KI ANNAN LIMILITE

15. Ki mannyer Zeova in montre ki sa ki Psonm 138:6 i dir, i vre?

¹⁵ Lir Psonm 138:6. Zis mazin sa. Zeova ki Souvren liniver i remark bann ki annan limilite. Annou vwar legzanp serten dimoun ki lezot ti konsider konman pa enportan me ki Zeova ti remark zot. Petet ou pa pou mazin serten me Zeova in enkli zot dan Labib. Zeova ti enspir Moiz pour enkli non en ners ki apel Debora, ki ti viv dan letan bann patrias. Sa ners ti en serviter fidel dan lakour Izaak ek Zakob, pour apepre 125 an. Menm si nou pa konn bokou keksoz lo sa madanm fidel, Zeova in fer sir ki Moiz i ekri serten detay ki montre ki i ti vreman ganny apresye. (Zen. 24:59; 35:8) Plizyer santenn lannen pli tar, Zeova ti swazir en zenn berze ki apel David pour vin lerwa Izrael. (2 Sam. 22:1, 36) Pa bokou letan apre ki Zezi ti’n ne, Bondye ti anvoy bann lanz kot en group berze e donn zot sa loner pour vin bann premye dimoun pour konnen ki Mesi in ne, pa tro lwen dan lavil Betleenm. (Lik 2:8-11) Ler Zozef ek Mari ti anmenn Zezi kot tanp, Zeova ti donn Simeon ek Ana ki ti de dimoun aze, sa loner pour vwar Son Garson. (Lik 2:25-30, 36-38) Alor i kler ki “menm si Zeova i gran, i vwar bann ki annan limilite.”

16. Ki mannyer Zezi ti swiv legzanp son Papa dan lafason ki i ti tret lezot?

¹⁶ Zezi i swiv legzanp son Papa. Parey son Papa, Zezi i remark bann dimoun ki annan limilite. I ti ansenny bann dimoun ki ti “napa bokou ledikasyon” e ki ti “ordiner” bann laverite konsernan Rwayonm Bondye. (Akt 4:13; Mat. 11:25) Zezi ti osi geri bann malad e tret zot dan en fason ki ti fer zot santi ki i kontan zot e i ti annan respe pour zot. (Lik 5:13) Sa zour swar avan i ti mor, Zezi ti lav lipye son bann zapot, en keksoz ki zis bann servant ki ti fer. (Zan 13:5) Zis avan i retourn dan lesyel, i ti donn son bann serviter enkli nou ozordi sa loner pour fer sa travay pli enportan ki en imen i kapab fer e sa i pour ed lezot pour ganny lavi eternel.—Mat. 28:19, 20.

17. Ki mannyer nou kapab demontre lanmour ek respe anver lezot? (Vwar portre.)

¹⁷ Ki mannyer nou kapab swiv legzanp Zeova? Nou montre ki nou kontan lezot e ki nou annan respe pour zot, ler nou anons sa bon nouvel avek tou bann ki ekoute nenport landrwa kot zot sorti, zot kouler lapo oubyen ledikasyon ki zot annan. Nou osi montre ki nou kontan e annan respe pour nou bann frer ek ser ler nou konsider zot pli siperyer ki nou, nenport abilite oubyen privilez ki nou annan dan kongregasyon. (Fili. 2:3) Zeova i kontan ler nou demontre limilite e “premye” pour onor lezot dan sa bann fason e dan lezot ankor.—Rom. 12:10; Zef. 3:12.

18. Akoz ou anvi demontre limilite parey Zeova?

¹⁸ Anmezir nou fer zefor pour demontre limilite parey nou Papa ki dan lesyel, i pou pli fasil pour lezot apros nou, nou pou pli rezonnab e annan plis pasyans. Nou pou osi kapab demontre lanmour ek respe anver lezot parey Zeova i fer. Ler nou fer zefor pour vin pli pros avek nou Bondye ki annan limilite, sa pou fer sakenn parmi nou vin pli presye pour li.—Iza. 43:4.