Eski ou rapel?

Eski ou’n lir byen bann Latour Veyer pour sa lannen? Vwar si ou kapab reponn sa bann kestyon swivan:

Akoz nou devret donn Zeova laglwar?

Nou fer sa parski nou annan bokou respe pour Zeova e nou vreman kontan li. Nou osi glorifye li parski nou anvi lezot i konn li.—w25.01, paz 3.

Si en dimoun in ofans nou, ki mannyer nou kapab pardonn li?

Nou pa inyor nou bann santiman. Me ler nou aret ankoler e nou aret gard rankin, sa i kapab ed nou pour pa tret lezot avek lakoler.—w25.02, paz 15-16.

Akoz disip Mark i en bon legzanp pour bann zenn frer?

Mark ti pare pour servi dan en lot landrwa. Menm si i ti annan en sityasyon ki ti’n bles son santiman e dezapwent li, Mark pa ti abandonnen. I ti devlop en bon lanmitye avek Pol ek lezot frer ek ser matir.—w25.04, paz 27.

Ki Zezi ti pe esey dir ler i ti dir: “Mon’n fer zot konn ou non”? (Zan 17:26)

Son bann disip ti deza konn non Bondye. Me Zezi ti ed zot pour konn Zeova pli byen. Sa ti enkli plan Zeova pour later ek bann imen, sa ki Zeova in fer e pou fer e osi bann zoli kalite ki Zeova i annan.—w25.05, paz 20-21.

Si nou annan limilite, ki nou rekonnet?

Nou rekonnet ki nou pa konn serten keksoz. Par egzanp, nou pa konnen kan lafen pou arive oubyen ki mannyer Zeova pou azir sa letan. Nou osi pa konnen ki pou arive dan lavenir oubyen ki degre Zeova i konn nou byen.—w25.06, paz 15-18.

Ki mannyer en lartik oubyen en diskour i kapab ed nou?

Nou kapab demann nou lekor: ‘Ki levidans ki pe ganny servi dan sa lenformasyon pour konvenk sa dimoun? Eski i annan en bon legzanp ki mon kapab servi ler mon pe ansenny en dimoun? Lekel ki kapab enterese avek sa topik?’—w25.07, paz 19.

Ki nou kapab aprann konsernan lafason ki Bondye i pardonn nou avek lafason ki i ti reazir anver David?

Menm si David ti fer bann pese grav, ler i ti repantir senserman, Zeova ti pardonn li. (1 Rwa. 9:4, 5) Ler Bondye i pardonnen, i pa pou akiz nou oubyen pini nou pour sa pese ankor.—w25.08, paz 17.

Ki ou kapab fer si en etidyan Labib i vwar li difisil pour konpran en keksoz?

Si i ankor vwar li difisil pour konpran en keksoz sorti dan Labib apre ki ou’n fer zefor pour ansenny li, ou kapab kontiny sa letid e pli tar retourn lo sa pwen.—w25.09, paz 24.

Labib i dir ki “pese [i kapab] anbet” nou. (Ebr. 3:13) Ki mannyer sa?

Pese i kapab enfliyans nou pour fer sa ki mal. I osi kapab anbet nou e fer nou kontinyen annan dout, par egzanp konsernan si Bondye i vreman kontan nou.—w25.10, paz 16.

Ki trwa keksoz ki kapab fer nou lapriyer pli profon?

(1) Nou kapab medit lo bann kalite ki Zeova i annan. (2) Nou kapab reflesir lo sa ki nou pe fer fas avek e koz lo la dan nou lapriyer par egzanp si nou bezwen pardonn en dimoun. (3) Nou pa fer lapriyer vitman vitman. Sa pou fer nou pli byen kapab eksplik Zeova sa ki nou pe mazinen e santi.—w25.10, paz 19-20.

Ki mannyer nou kapab ed bann frer ek ser aze?

Nou kapab vizit oubyen telefonn bann frer ek ser aze. Nou osi kapab al avek zot ler zot annan lapwentman dokter. Oubyen nou kapab al predikasyon avek zot.—w25.11, paz 6-7.

Ki bann keksoz ki fer en maryaz Kretyen respektab?

Obei bann lalwa gouvernman konsernan maryaz. Fer sir ki sa seremoni maryaz ek resepsyon i reflekte fri lespri sen Bondye. Sa koup i montre ki zot modes dan zot fason sanze e zot fer sir ki zot rezet bann koutim ki pa an armoni avek bann prensip Labib. Zot osi bezwen annan en bon kominikasyon ler zot pe plàn zot maryaz.—w25.12, paz 21-24.