En Let sorti kot Konsey Direkter
ANMEZIR ki nou apros larive sa nouvo sistenm, i tre irzan ki nou kontinyen esper Zeova. (Tsef. 3:8) Profet Danyel ti dir ki “Bondye . . . [i] en Revelater bann sekre, e i’n fer konnen . . . ki pou arive dan bann dernyen zour.” (Dan. 2:28) Pa i en privilez pour viv dan lafen sa letan ki’n ganny predir e pour konpran bann sekre ki Zeova pe fer nou konnen!
Atraver ‘lesklav fidel e pridan,’ Zeova in ptit-a-pti revel son plan pour rasanble en “gran lafoul” son bann adorater partou dan lemonn pandan sa bann “dernyen zour” difisil. (Mat. 24:45; Rev. 7:9; 2 Tim. 3:1) Izai 2:2, 3 i montre ki sa aktivite mondyal pou ariv “dan bann dernyen zour.” Sak lannen sa rasanbleman i kontinyen malgre sa kantite boulversman ek vyolans ki egziste dan sa lemonn.
Pandan lannen 2004, nou’n vin pli konsyan sa nesesite pour obei parol Zezi: ‘Kontinyen veye . . . Met zot pare.’ (Mat. 24:42, 44) Vreman, sa ki pe arive dan sa lemonn i annan en gran sinifikasyon pour bann Kretyen, ki rekonnet “bann siny ki konsern sa letan ki nou pe viv ladan” e ki reazir ler zot vwar sa ki pe arive. (Mat. 16:1-3) An armoni avek lakonplisman son Parol, Zeova pou kontinyen avek son pep ki i’n organize pour fer son travay malgre nenport lopozisyon ki zot kapab rankontre.
Kantmenm serten i fer zefor pour anpes oubyen aret predikasyon lo Rwayonm, nou bann frer i kontinyen koz lo laverite e rasanble ansanm. (Akt 5:19, 20; Ebr. 10:24, 25) Pandan mwan Zen 2004, en lakour-d-apel Mosko Larisi, ti siport desizyon en lakour pour met restriksyon lo bann aktivite Temwen Zeova e pour ferm zot lasosyasyon dan sa lavil. Me bann frer pa’n dekouraze; zot konnen ki Bondye i ekspekte avek zot, e zot obei li konman Sef plito ki zonm. (Akt 5:29) Nou annan konfyans ki Zeova pou gid son bann serviter malgre aksyon legal sever.
Pandan sa enn de lannen ki’n pase, bann frer dan Repiblik Lazorzi in perdi zot propriyete, ganny bate par bann geng, e zot in vwar zot piblikasyon ganny brile. Me okenn zarm ki’n ganny formen kont zot pa’n reisi. (Iza. 54:17) Pandan lannen servis 2004, Temwen Zeova ti reganny rekonnet legalman Lazorzi. Bann lasanble ti ganny fer san lenteripsyon, e bann piblikasyon i antre dan sa pei san problenm. Nouvo maksimonm proklanmater ek lasistans Memoryal ti ganny raporte.
Larmeni, Eritre, Repiblik Kore, Rwanda, ek Tirkmenistan, bann frer in ganny anprizonnen pour zot lafwa. Menm si zot ti ganny maltrete, zot konn rezon biblik pour zot leprev, e sa i ed zot reste san defo pandan ki zot depan lo Zeova pour delivrans.—1 Pyer 1:6; 2 Pyer 2:9.
Anmezir ki ou egzamin Rapor Lannen Servis 2004 dan Latour Veyer le 1 Fevriye, 2005, ou pou kontan labonte Zeova. (Ps. 31:19; 65:11) Nou espere ki sa rapor pou ankouraz ou pour kontinyen mars dan en fason ki fer plezir Bondye.—1 Tesa. 4:1.
Bokou zefor pe kontinyen ganny fer pour ki tou sort kalite dimoun i konn laverite. Par egzanp, bann video, DVD, ek lezot keksoz dan langaz siny ek bann piblikasyon an Bray in ganny prepare pour bann dimoun sourd ek bann ki pa vwar kler pour ed zot spirityelman. Bokou proklanmater Rwayonm in aprann langaz bann imigran ki pe reste dan zot teritwar.
Deplis, bokou group izole in ganny formen dan bann teritwar ki difisil pour arive. En biro brans i annan plis ki 300 group izole ki annan an tou plis ki 7,000 proklanmater. Sa i reprezant en gran potansyel pour annan nouvo kongregasyon! Deplis, parmi sa 16,760,607 ki ti asiste Memoryal sa lannen servis, plis ki 10 milyon pa Temwen. Sa i montre ki i annan en bon rekolt ki pa ankor ganny rekolte.
Nou remersi Zeova pour sa kantite benediksyon ki i donn nou e fason ki i pran swen avek nou toulezour avek lanmour. (Prov. 10:22; Mal. 3:10; 1 Pyer 5:7) Anmezir ki nou al annavan dan linite pandan sa “bann dernyen zour,” nou konfyans ek lesperans i dan Zeova. Nenport problenm nou kapab rankontre, annou pran aker nou teks pour lannen 2005: “Mon led i sorti kot Zeova.” (Ps. 121:2) Nou oule asir zot tou nou lanmour ek nou lapriyer.
Zot bann frer,
Konsey Direkter Temwen Zeova