Eski bann divertisman ki annan pour fer avek demon i vreman mal?

Ki ou panse?

• Eski nou pe met nou lekor dan danze ler nou get oroskop, servi bord ouija oubyen al kot en dimoun ki annan pouvwar mazik?

• Eski bann zistwar ki annan pour fer avek demon i fo ouswa i bann zistwar ki vre e danzere?

Sa lartik pou koz lo akoz bann divertisman ki annan pour fer avek bann pratik demonyak, grigri oubyen sorsye i paret atiran e akoz nou bezwen fer byen atansyon.

• Kwa ki fer li atiran?

• Akoz nou bezwen fer atansyon?

• Ki ou kapab fer?

• Ki lezot zenn i dir?

Kwa ki fer li atiran?

Bann liv, film, progranm televizyon ek zwe video i souvan koz lo bann keksoz demonyak. Sa i fer ki bokou zenn in devlop lentere dan oroskop, demon, vampire ek sorsye. Me akoz? Pour sa bann diferan rezon:

• Kiryozite: Pour konnen si vreman bann demon i egziste

• Lenkyetid: Pour esey konnen ki pou arive dan lavenir

• Kominikasyon: Pour esey kominik avek en dimoun ki zot kontan ki’n mor

Sa bann rezon lo zot menm pa mal. Par egzanp, i normal pour en dimoun enkyet lo ki kapab arive dan lavenir oubyen mank en dimoun ki i ti kontan ki’n mor. Me i annan serten danze ki nou devret konnen.

Akoz nou bezwen fer byen atansyon?

I annan bann konsey serye dan Labib konsernan okenn keksoz ki annan pour fer avek demon. Par egzanp:

“Personn parmi zot pa devre ofer son garson, oubyen son fiy an sakrifis, ni fer divinasyon, ni predir lavenir, ni pratik mazik, ni fer sorsye, oubyen zet move sor, konsilte move lespri, oubyen medyonm, oubyen konsilte dimoun mor. Annefe, [Zeova] pa kontan sa enn ki fer sa bann keksoz.”​—Deterononm 18:10-12.

Akoz Labib i kondann sa bann pratik?

• Akoz bann ki pe pratik sa bann keksoz pe fer bann demon vin zot zanmi. Labib i dir ki serten lanz ti rebel kont Bondye e fer zot vin son bann lennmi. (Zenez 6:2; Zid 6) Sa bann move lanz ki apel demon, pe anbet dimoun atraver bonnonm dibwa, bann ki predir lavenir e ki servi oroskop. Bann ki fer sa bann keksoz pe vin lennmi Bondye.

• Bann pratik demonyak i fer dimoun krwar ki serten imen i kapab predir lavenir. Par kont, zis Bondye ki kapab dir: “Depi konmansman, mon’n anons lavenir e depi lontan davans, sa ki pa ankor arive.”​—Izai 46:10; Zak 4:13, 14.

• Bann pratik demonyak i fer dimoun krwar ki bann dimoun mor i kapab kominik avek bann ki vivan. Par kont, Labib i dir: “Bann mor pa konn nanryen . . . Napa ni aktivite, ni rezon, ni konnesans, ni lasazes dan lemonn lanmor [oubyen Latonm].”​—Eklezyast 9:5, 10.

I pour sa rezon ki Temwen Zeova i rezet bann pratik demonyak. Osi, zot rezet bann divertisman ki annan pour fer avek zombie, vampire ek bann keksoz misterye. En fiy ki apel Maria i dir: “Si i annan okenn keksoz pour fer avek demon, alor mon pa devret pe gete.”a

Ki ou kapab fer?

• Determinen pour “gard en konsyans kler” devan Zeova par pa get oubyen partisip dan okenn keksoz ki annan pour fer avek bann demon.​—Akt 24:16.

• Debaras ou avek okenn keksoz ki annan pour fer avek demon. Lir Akt 19:19, 20 e vwar ki mannyer bann Kretyen dan premye syek ti byen azir dan sa menm sityasyon.

Rapel: Ler ou dir non avek bann pratik oubyen divertisman ki annan pour fer avek demon, sa i montre ki ou zanmi Zeova. Kan ou fer sa, Zeova pou vreman kontan!​—Proverb 27:11.