Zeremi

36 Dan katriyenm lannen ki Zeoyakim garson Zosya ti lerwa Zida, Zeova ti koz avek Zeremi e i ti dir: 2 “Pran en roulo* e ekri tou sa ki mon ti dir ou kont Izrael, kont Zida e kont tou bann nasyon, depi sa premye zour ki mon ti koz avek ou ler Zosya ti lerwa ziska ozordi. 3 Petet ler pep Zida pou tann tou sa bann maler ki mon ti’n deside pour anmenn lo zot, zot pou sanz zot move fason viv e apre, mon pou pardonn zot fot ek zot pese.”

4 Apre sa, Zeremi ti kriy Barouk garson Neriya. Zeremi ti dir li tou sa ki Zeova ti’n dir li e Barouk ti ekri sa ki i ti dir li dan sa roulo.* 5 Apre Zeremi ti donn Barouk sa lord: “Mon’n ganny fermen e mon pa kapab antre dan lakaz Zeova. 6 Alor ou ki pou bezwen antre laba e lir byen for sa bann keksoz ki Zeova in dir, sa ki mon’n dir ou ekri dan sa roulo. Lir zot pour bann dimoun dan lakaz Zeova tande, sa zour ki zot pe zennen.* Alor ou pou lir zot avek pep Zida antye ki sorti dan zot bann lavil e ki’n vin laba. 7 Petet Zeova pou tann zot siplikasyon e zot pou sanz zot move fason viv parski Zeova in dir ki i vreman ankoler avek sa pep.”

8 Alor Barouk garson Neriya ti fer tou sa ki profet Zeremi ti’n donn li lord pour fer. I ti al dan lakaz Zeova e i ti lir byen for sa bann keksoz ki Zeova ti’n dir ki ti dan sa roulo.*

9 Dan senkyenm lannen ki Zeoyakim garson Zosya ti lerwa Zida, dan nevyenm mwan, tou dimoun dan Zerizalenm ek tou dimoun ki ti sorti dan bann lavil Zida e ki ti’n vin Zerizalenm ti zennen devan Zeova. 10 Apre Barouk ti lir byen for tou sa ki Zeremi ti’n fer li ekri dan sa roulo,* kot lakaz Zeova, dan lasanm* Gemarya garson Safann ki ti kopye parol Bondye,* dan lakour ki anler, dan larantre sa nouvo baro kot lakaz Zeova, pour tou dimoun tande.

11 Ler Mikaya garson Gemarya garson Safann ti tann tou sa ki Zeova ti’n dir dan sa roulo,* 12 i ti desann kot lakaz* lerwa, kot lasanm sekreter. Tou bann prens* ti pe asize laba: Elisama ki ti sekreter, Delaya garson Semaya, Elnatann garson Akbor, Gemarya garson Safann, Zedekya garson Ananya ek tou lezot prens. 13 Mikaya ti dir zot tou sa ki i ti’n tande ler Barouk ti lir sa ki ti dan sa roulo* pour tou dimoun tande.

14 Apre, tou bann prens ti fer Zeoudi garson Netanya garson Selemya garson Kousi, al kot Barouk pour dir li: “Vini e anmenn sa roulo ki ou ti lir pour tou dimoun tande.” Alor Barouk garson Neriya ti pran sa roulo e i ti al kot zot. 15 Zot ti dir li: “Silvouple, asize e lir sa ki dan sa roulo byen for avek nou.” Alor Barouk ti lir sa ki ti dan sa roulo avek zot.

16 Dek ki zot ti tann tou sa bann keksoz, zot ti per e zot ti get kanmarad. Zot ti dir Barouk: “Nou bezwen al dir lerwa tou sa bann keksoz.” 17 Zot ti demann Barouk: “Silvouple, dir nou ki mannyer ou’n ekri tou sa bann keksoz. Eski Zeremi ki’n dir ou ekri tou sa bann keksoz?” 18 Barouk ti dir zot: “I ti dir mwan tou sa bann keksoz e mon ti ekri zot dan sa roulo* avek lank.” 19 Bann prens ti dir Barouk: “Ale e al kasyet zot de Zeremi. Pa bezwen les personn konnen kot zot ete.”

20 Apre, zot ti al kot lerwa, dan lakour e zot ti met sa roulo dan lasanm Elisama ki ti sekreter. Zot ti dir lerwa tou sa ki zot ti’n tande.

21 Alor lerwa ti fer Zeoudi al sers sa roulo e i ti al sers sa roulo dan lasanm Elisama ki ti sekreter. Apre, Zeoudi ti lir sa ki ti dan sa roulo pour lerwa tande e pour tou bann prens ki ti pe debout o bor lerwa osi tande. 22 Lerwa ti pe asize dan lakaz liver, dan nevyenm mwan* e i ti pe sof li devan dife.* 23 Sak fwa ki Zeoudi ti lir trwa seksyon oubyen kat seksyon, lerwa ti koup sa bout ki Zeoudi ti’n lir avek kouto sekreter e i ti zet li dan sa dife. I ti fer sa ziska ki i ti bril sa roulo antye. 24 Lerwa ek tou son bann serviter ki ti’n tann tou sa bann keksoz pa ti per e zot pa ti desir zot lenz. 25 Menm si Elnatann, Delaya ek Gemarya ti sipliy lerwa pour pa bril sa roulo, lerwa pa ti ekout zot. 26 Apre, lerwa ti donn lord Zerameel garson lerwa, Seraya garson Azriel ek Selemya garson Abdeel pour al tyonbo Barouk ki ti sekreter ek profet Zeremi, me Zeova ti kontinyen kasyet zot.

27 Apre ki lerwa ti’n bril sa roulo ki ti annan tou sa ki Zeremi ti’n dir Barouk ekri, Zeova ti koz avek Zeremi ankor enn fwa e i ti dir: 28 “Pran en lot roulo e ekri tou sa ki ti dan sa premye roulo, sa roulo ki Lerwa Zeoyakim ti brile. 29 Ou devret dir sa kont Zeoyakim lerwa Zida, ‘La sa ki Zeova i dir: “Ou’n bril sa roulo e ou’n dir, ‘Akoz ou’n ekri sa ladan: “Lerwa Babilonn pou vini e detri sa pei e i pou fer ki i nepli annan dimoun ek zannimo sovaz laba”?’ 30 Alor la sa ki Zeova i dir kont Zeoyakim lerwa Zida, ‘I pou napa personn ki pou asiz lo tronn David e son lekor mor pou reste dan lasaler pandan lazournen e dan lafreser pandan lannwit. 31 Mon pou fer li, son bann desandans ek son bann serviter rann kont pour zot fot. Mon pou anmenn tou sa bann maler ki mon ti’n dir mon pou anmennen lo zot, lo bann zabitan Zerizalenm e lo bann dimoun Zida, me zot pa ti ekoute.’”’”

32 Apre, Zeremi ti pran en lot roulo e i ti donn Barouk garson Neriya, ki ti sekreter. Zeremi ti dir li tou sa ki ti dan sa roulo* ki Zeoyakim lerwa Zida ti’n brile e Barouk ti ekri sa ki Zeremi ti dir li. I ti osi ekri en kantite lezot keksoz ki Bondye ti’n dir.