“Reste ferm [e] solid”

1-2. Ki mannyer en Kretyen i kapab ganny konpare avek en gran batiman? (1 Korentyen 15:58)

AN 1978, en gran batiman ti ganny konstrir Tokyo, Zapon. Dimoun ti pe mazinen ki mannyer i ti pou reste debout, vi ki dan sa lavil i ti souvan annan bann tranblemandter. Ki bann enzenyer in fer pour ki sa batiman i reste debout ler i annan tranblemandter? Zot in fer sa batiman solid e an menm tan dan en fason ki i pou kapab tenir sekous tranblemandter. Bann Kretyen i parey sa batiman. Dan ki fason?

² En Kretyen i bezwen reste ferm e pare pour adapte. I bezwen reste ferm e determinen pour toultan obei bann lalwa ek standar Zeova. (Lir 1 Korentyen 15:58.) I “pare pour obei” e reste fidel avek Zeova. De lot kote, i bezwen “rezonnab” oubyen pare pour adapte dapre sirkonstans ouswa ler i neseser. (Zak 3:17) En Kretyen ki fer sa, pa pou vin tro strik oubyen annan en latitid lesefer. Dan sa lartik, nou pou vwar ki mannyer nou kapab reste solid. Nou pou osi vwar senk taktik ki Satan i servi pour fer li difisil pour nou reste ferm, setadir obei bann lalwa ek standar Zeova. Apre, nou pou vwar ki mannyer nou kapab reziste Satan e reste ferm.

KI MANNYER NOU KAPAB RESTE SOLID?

3. Ki bann lalwa ki Zeova in donnen ki trouve dan Akt 15:28, 29?

³ Zeova i sa Enn ki annan tou drwa pour fer bann lalwa e i toultan fer bann lalwa ki fasil pour son pep konpran. (Iza. 33:22) Par egzanp, konsey direkter dan premye syek ti koz lo trwa keksoz ki bann Kretyen i bezwen fer pour reste ferm: (1) pa ador zidol, ador zis Zeova, (2) obei lalwa Zeova ki dir ki disan i sakre e (3) obei sa lord ki dan Labib pour reste lwen avek imoralite seksyel. (Lir Akt 15:28, 29.) Ki mannyer bann Kretyen ozordi i reste ferm ler zot fer sa trwa keksoz?

4. Ki mannyer nou montre ki nou ador zis Zeova? (Revelasyon 4:11)

⁴ Nou pa ador zidol, nou ador zis Zeova. Zeova ti donn lord bann Izraelit pour ador zis li. (Det. 5:6-10) Ler Dyab ti tant Zezi, Zezi ti dir ki nou devret ador zis Zeova. (Mat. 4:8-10) Alor, nou pa ador zidol. Nou pa tret okenn zonm konmsi zot bann bondye, ki swa zot bann sef relizye, dirizan politik, bann atlet popiler, akter oubyen mizisyen. Nou pran kote avek Zeova e nou ador sa enn ki’n “kree tou keksoz.”​—Lir Revelasyon 4:11.

5. Akoz nou obei lalwa Zeova konsernan lavi ek disan ki sakre?

⁵ Nou obei bann standar Zeova konsernan lavi ek disan ki sakre. Akoz? Parski Zeova i dir ki disan i reprezant lavi ki en kado presye sorti kot li. (Lev. 17:14) Premye fwa ki Zeova ti permet imen pour manz zannimo, i ti donn zot lord pour pa manz disan. (Zen. 9:4) Ler i ti donn bann Izraelit Lalwa Moiz, i ti repet sa menm lord. (Lev. 17:10) Zeova ti ed konsey direkter dan premye syek pour konpran ki tou Kretyen pa devret servi disan. (Akt 15:28, 29) Nou obei sa lord ler nou pe deside ki tretman medikal ki nou pou aksepte.b

6. Ki nou fer pour nou kapab obei sa lord ki dan Labib pour nou reste lwen avek imoralite seksyel?

⁶ Nou obei sa lord dan Labib pour reste lwen avek imoralite seksyel. (Ebr. 13:4) Zapot Pol ti donn nou sa konsey pour “met amor” bann move dezir, setadir pour fer tou sa ki nou kapab pour rezet okenn move dezir. Nou evite get oubyen fer okenn keksoz ki kapab fer nou komet imoralite seksyel. (Kol. 3:5; Zob 31:1) Ler nou ganny tante, deswit nou rezet okenn panse oubyen aksyon ki kapab gat nou lanmitye avek Bondye.

7. Ki nou devret determinen pour fer e akoz?

⁷ Zeova i ekspekte ki nou ‘obei li avek tou nou leker.’ (Rom. 6:17) Sa ki i demann nou pour fer i toultan bon pour nou e nou pa kapab sanz son bann lalwa. (Iza. 48:17, 18; 1 Kor. 6:9, 10) Nou fer nou mye pour fer plezir Zeova e pour annan menm latitid avek sa psalmis ki ti dir: “Mon determinen pour obei ou bann lareg tou dilon mon lavi ziska lafen.” (Ps. 119:112) Me Satan pou esey fer li difisil pour nou reste ferm. Ki bann taktik ki Satan i servi?

KI MANNYER SATAN I ESEY FER LI DIFISIL POUR NOU RESTE FERM?

8. Ki mannyer Satan i servi persekisyon pour esey fer nou dezobei bann lalwa ek standar Zeova?

⁸ Persekisyon. Dyab i servi vyolans ek presyon pour fer li difisil pour nou obei bann lalwa ek standar Zeova. Satan i anvi devor nou, setadir gat nou lanmitye avek Zeova. (1 Pyer 5:8) Bann Kretyen dan premye syek ti ganny menase, bate e touye parski zot ti determinen pour reste fidel avek Zeova. (Akt 5:27, 28, 40; 7:54-60) Ozordi Satan i ankor pe servi persekisyon pour esey fer nou dezobei bann lalwa ek standar Zeova. Nou kapab vwar sa dan sa fason kriyel ki nou bann frer ek ser Larisi e dan lezot pei, pe ganny opoze. Partou dan lemonn, bann frer ek ser pe ganny persekite dan en fason oubyen en lot.

9. Akoz nou bezwen fer atansyon bann presyon anba anba? Eksplike.

⁹ Bann presyon anba anba. Apard ki persekisyon, Satan i osi servi “bann riz.” (Efe. 6:11) Annou vwar legzanp en frer ki apel Bob ki ti bezwen admit lopital pour fer en gran loperasyon. I ti dir son dokter ki malgre nenport kwa ki arive, i pa pou aksepte transfizyon disan. Sa dokter ki ti pou fer son loperasyon ti dir ki i pou respekte son desizyon. Me sa zour swar avan i fer loperasyon, en lot dokter ti vin vizit li apre ki son fanmir ti’n fini retourn kot lakour. Sa dokter ti dir Bob ki i tre probab ki zot pa pou fer transfizyon disan me zot pou annan disan dan lasal loperasyon an ka ki zot bezwen. Petet sa dokter ti krwar ki Bob ti pou sanz son nide vi ki son fanmir pa ti la. Me Bob ti reste ferm. I ti dir ki i pa pou aksepte okenn transfizyon disan nenport kwa ki arive.

10. Akoz rezonnman imen i danzere? (1 Korentyen 3:19, 20)

¹⁰ Bann rezonnman imen. Si nou mazin parey bann dimoun ki inyor bann lalwa Zeova, i kapab ki nou osi nou konmans inyor Zeova ek son bann lalwa ek standar. (Lir 1 Korentyen 3:19, 20.) Souvandfwa “lasazes sa lemonn” i enfliyans dimoun pour satisfer zot dezir egois. Detrwa Kretyen ki ti dan kongregasyon Perganm ek Tyatir ti ganny enfliyanse avek bann dimoun ki ti imoral e ki ti ador zidol. Zezi ti donn sa de kongregasyon bann konsey serye parski zot ti pe toler bann ki ti pe komet imoralite seksyel. (Rev. 2:14, 20) Ozordi dimoun otour nou i kapab esey enfliyans nou pour aksepte bann move rezonnman. I kapab ki nou fanmir ek dimoun ki konn nou i esey konvenk nou ki Zeova pe priv nou e ki nou devret kas son bann lalwa. Par egzanp, zot kapab dir ki nou pa bezwen reste prop moralman e ki bann standar moral ki dan Labib pa aplik pour nou letan.

11. Pour nou kapab reste ferm, ki nou bezwen evite fer?

¹¹ Parfwa nou kapab mazinen ki bann lenstriksyon ki Zeova i donn nou pa ase kler. Petet nou kapab menm anvi “al pli lwen ki sa ki’n ganny ekrir.” (1 Kor. 4:6) Bann sef relizye dan letan Zezi ti fer sa. Zot ti azout zot prop lareg avek Lalwa Moiz e sa ti fer li difisil pour bann dimoun obei. (Mat. 23:4) Atraver son Parol ek son lorganizasyon, Zeova i donn nou bann lenstriksyon kler. Nou napa rezon pour azout lezot lenstriksyon avek sa ki I’n deza donn nou. (Prov. 3:5-7) Alor, nou pa al pli lwen ki sa ki’n ganny ekrir dan Labib oubyen fer bann lareg pour nou bann frer ek ser konsernan bann keksoz personnel.

12. Ki mannyer Satan i servi “fo rezonnman”?

¹² Bann fo rezonnman. Satan i servi bann “fo rezonnman” ek “bann keksoz sa lemonn” pour anbet e diviz dimoun. (Kol. 2:8) Dan premye syek, sa ti enkli bann filozofi ki baze lo bann rezonnman imen, bann lansennyman Zwif ki pa baze lo Labib e sa lansennyman ki bann Kretyen i bezwen obei Lalwa Moiz. Sa ti bann fo rezonnman parski zot ti anpes dimoun konsantre lo Zeova ki Sours lasazes. Ozordi, Satan i servi medya ek rezo sosyal pour fann bann rimer ek bann nouvel ki pa vre ki sorti kot bann dirizan politik. I ti annan en kantite sa bann fo lenformasyon pandan pandemi COVID-19.c Bann Temwen Zeova ki ti ekout lenstriksyon sorti kot lorganizasyon Zeova pa ti sitan enkyet parey bann dimoun ki ti ekout sa bann fo lenformasyon.​—Mat. 24:45.

13. Akoz nou bezwen fer atansyon ki nou pa ganny distrer?

¹³ Bann keksoz ki kapab distrer nou. Nou bezwen reste konsantre lo “sa ki pli enportan.” (Fili. 1:9, 10) Ler nou ganny distrer, nou gat en kantite letan ek lenerzi. Bann keksoz ki normal parey manze, bwar, detann ek travay, i kapab distrer nou si nou les zot vin sa ki pli enportan dan nou lavi. (Lik 21:34, 35) Osi, toulezour nou tann e lir konsernan bann protestasyon ek bann deba politik. Nou bezwen fer sir ki nou pa ganny distrer avek sa bann deba. Si nou pa fer sa, i kapab ki dan nou lespri e dan nou leker, nou konmans pran kote dan bann zafer sa lemonn. Satan i servi tou sa bann metod ki’n ganny mansyonnen pour fer li difisil pour nou kontinyen fer sa ki byen. Annou vwar ki mannyer nou kapab reziste Satan e reste ferm.

KI MANNYER NOU KAPAB RESTE FERM?

14. Ki en keksoz ki kapab ed ou reste lo kote Zeova?

¹⁴ Reflesir lo akoz ou ti dedye ou lavi avek Zeova e batize. Ou ti fer sa bann keksoz parski ou ti anvi pran kote avek Zeova. Esey rapel kwa ki ti fer ou asire ki ou’n trouv laverite. Ler ou ti aprann konn Zeova, sa ti fer ou konmans annan respe ek lanmour pour li e ou ti vwar li konman ou Papa ki dan lesyel. Ou ti devlop lafwa e ou ti anvi repantir. Ou ti aret fer bann keksoz ki Zeova pa kontan e ou ti konmans fer bann keksoz ki fer li plezir. Ou ti santi ou pli mye ler ou ti realize ki Bondye in pardonn ou. (Ps. 32:1, 2) Ou ti asiste bann renyon e ou ti konmans partaz avek lezot bann zoli keksoz ki ou ti’n aprann. Konman en Kretyen ki’n dedye son lavi avek Zeova e batize, aprezan ou pe mars lo sa semen ki anmenn ver lavi e ou pou fer ou mye pour kontinyen mars lo sa semen.​—Mat. 7:13, 14.

15. Akoz i bon pour nou etidye e medite?

¹⁵ Etidye e medit lo Parol Bondye. Zis parey en pye dibwa ki son rasin i al dan fon i debout for, nou pou kapab reste ferm si nou annan en lafwa for dan Zeova. Anmezir ki en pye dibwa i grandi, son rasin i al pli dan fon e pli lwen. Ler nou etidye e medite, nou lafwa i vin pli for e nou pli asire ki fason fer Zeova i sa enn ki pli meyer. (Kol. 2:6, 7) Medit lo lafason ki Zeova ti ed son bann serviter dan lepase. I ti donn zot lenstriksyon, konsey e i ti protez zot. Par egzanp, dan en vizyon Ezekyel ti vwar en tanp e i ti vwar en lanz pe pran letan pour mezir sa tanp byen. Sa vizyon ti ankouraz Ezekyel e i ansenny nou ki mannyer nou kapab obei bann standar Zeova konsernan ladorasyon pir.d (Ezek. 40:1-4; 43:10-12) Ler nou pran letan pour etidye e medit lo bann keksoz profon dan Parol Bondye, nou osi nou ganny bann byenfe.

16. Ki mannyer ler Bob ti annan en leker ki fidel, sa ti protez li? (Psonm 112:7)

¹⁶ Devlop en leker ki fidel. Dan en sanson, Lerwa David ti dir ki i ti pou toultan kontan Zeova. I ti sante: “Mon fidel, O Bondye.” (Ps. 57:7) Nou osi nou kapab annan en leker ki fidel e annan konfyans dan Zeova. (Lir Psonm 112:7.) Annou vwar sa ki ti ed Bob ki’n ganny mansyonnen pli boner. Ler dokter ti dir li ki zot ti pou annan disan dan lasal loperasyon an ka i bezwen, deswit i ti reponn zot ki si i annan okenn sans ki zot donn li disan, i ti pou kit lopital imedyatman. Pli tar Bob ti dir: “Mon ti konnen ki mon ti annan pour fer e mon pa ti enkyet konsernan sa ki ti kapab arive.”

17. Ki nou kapab aprann avek leksperyans Bob? (Vwar portre.)

¹⁷ Bob ti fidel avek Zeova parski byen lontan avan i antre lopital, i ti’n deside pour reste ferm. Sa i akoz premyerman, i ti anvi fer plezir Zeova. Dezyenmman, i ti’n etidye sa ki Labib ek nou bann piblikasyon i dir konsernan lefet ki lavi ek disan i sakre. Trwazyenmman, i ti asire ki si i swiv bann lenstriksyon Zeova, Zeova ti pou rekonpans li. Nenport problenm ki nou fer fas avek, nou osi nou kapab annan en leker ki fidel.

18. Ki legzanp Barak i ansenny nou konsernan annan konfyans dan Zeova? (Vwar portre lo kouvertir.)

¹⁸ Annan konfyans dan Zeova. Annou vwar legzanp Barak. Barak ti reisi parski i ti annan konfyans dan lenstriksyon ki Zeova ti donn li. Sa letan pep Izrael pa ti prepare pour lager. Zot ti napa okenn zarm. Me Zeova ti dir Barak al lager avek larme Kananeen ek zot sef, Sisera ki ti annan en kantite zarm. (Ziz 5:8) Debora, ki ti en profet, ti dir Barak sorti dan montanny e al dan en landrwa plat pour li lager avek Sisera ek son 900 saret lager. Menm si i ti pou difisil pour bann Izraelit lager avek bann solda ki ti dan saret dan en landrwa plat, Barak ti obei. Anmezir ki bann solda ti pe desann Montanny Tabor, Zeova ti fer en gro lapli tonbe. Bann saret Sisera ti pri dan labou e Zeova ti fer Barak ganny laviktwar. (Ziz 4:1-7, 10, 13-16) Dan menm fason, Zeova pou fer nou ganny laviktwar si nou annan konfyans dan li e dan lenstriksyon ki i donn nou atraver son lorganizasyon.​—Det. 31:6.

ANNOU DETERMINEN POUR RESTE FERM

19. Akoz ou anvi reste ferm?

¹⁹ Tan ki nou ankor dan sa move lemonn, nou bezwen kontinyen fer zefor pour reste ferm. (1 Tim. 6:11, 12; 2 Pyer 3:17) Annou determinen pour pa les persekisyon, presyon anba anba, rezonnman imen, fo rezonnman ek bann keksoz ki kapab distrer nou, anpes nou reste fidel avek Zeova. (Efe. 4:14) O kontrer, annou reste ferm e toultan kontinyen kontan Zeova e obei son bann lalwa. Me an menm tan, nou bezwen rezonnab. Dan sa lartik ki swiv, nou pou vwar ki mannyer Zeova ek Zezi in kit en legzanp parfe lo ki mannyer nou kapab rezonnab.